राष्ट्रिय सभाय् खाली जूगु १९गू पदया लागि जूगु निर्वाचनया नतिजा गठबन्धनया ल्हाति लाःगु दु ।

सार्वजनिक नतिजा कथं लुम्बिनी, सदूरपश्चिम, बागमती, गण्डकी व कर्णालीइ गठबन्धनको प्यानलं त्याकेत ताः लाःगु दु । प्रदेश १य् धाःसा छगू सिट प्रमुख प्रतिपक्षी नेकपा एमालेया ल्हाते लाःगु दु ।

लुम्बिनीया राष्ट्रियसभा दुजःया स्वंगु खाली जूगु पदय् एमालेया उम्मेवारयात बुका सत्ता गठबन्धनपाखें खुल्ला सदस्यय् कांग्रेसया युवराज शर्मा, मिसा सदस्यय् नेकपा एकीकृत समाजवादीया राजेन्द्रलक्ष्मी गैरे व दलित सदस्यय् राष्ट्रिय जनमोर्चाया तुलप्रसाद विश्वकर्मा निर्वाचित जूगु दु ।

अथेहे सुदूरपश्चिम प्रदेशय् न सत्तारुढ गठबन्धनया उम्मेदवार निर्वाचित जूगु दु । गठबन्धनपाखें माओवादीया जगत पार्की,  एकीकृत समाजवादीया गरिमा शाह व काँग्रेसया नारायण मिश्र त्यात ।

कर्णालीइ गठबन्धनपाखें माओवादी केन्द्रया नरबहादुर विष्ट, काँग्रेसया दुर्गाकुमारी गुरुङ व एकीकृत समाजवादीया उदय बोहोरा निर्वाचित जूगु दु । बागमती प्रदेशया राष्ट्रियसभा निर्वाचनय् सत्ता गठबन्धन दलका संयुक्त उम्मेदवार गोमादेवी तिमल्सिना व गठबन्धन दलया हे कृष्णप्रसाद पौडेलं त्याकूगु दु । तिमल्सिना नेकपा एकीकृत समाजवादी पार्टी र पौडेल कांग्रेसया उम्मेदवार जुयादि । गण्डकी प्रदेशय् नं गठबन्धनया सुरेश आले मगर, कमला पन्त व भुवन सुनार निर्वाचित जुयादिल ।

उखे प्रदेश नम्बर १य् गठबन्धन उम्मेदवार बुइमाःगु दु ।  गठबन्धनपाखें जनता समाजवादी पार्टीया उम्मेदवार हेमराज राईयात बुकुसें एमाले उम्मेदवार सोनम ग्याल्जेन शेर्पां त्याकेत ताःलात । गठबन्धनया हे उम्मेदवारया अन्तर्घातया हुनिं राई बुइमाःगु धाःगु दु ।

राई जनता समाजावादी पार्टीपाखें गठबन्धनया उम्मेदवार जुयादिगु खः । मेगु सिटय् धाःसा नेकपा एकीकृत समाजवादीया जयन्ती राईं बाजी त्याकल । प्रदेश १य् अन्यपाखे सदस्यय् नेपाली कांग्रेसया गोपाल बस्नेत निर्वाचित जुयादिल ।एमालेया उम्मेदवार गुरु बराल व बस्नेतं ज्वलिज्वं मत हःबले गोला प्रथापाखें विजेता घोषणा याःगु खः ।

उखे मधेश प्रदेशय् नं सत्तारुढ गठबन्धया उम्मेदवार माओवादी केन्द्रया उर्मिला अर्याल व जनता समाजवादी पार्टीया मोहम्मद खालिद सिद्दिकी त्याःगु दु ।

Categorized in राष्ट्रिय