राष्ट्रियस्तरं हनेमाःम्ह ब्यक्तित्व सत्यमोहन
जुजुमान महर्जन
 
 
नेपालभाषाया ख्यलय् जक मखु, नेपाःया भाषा, साहित्य ख्यलय् विशिष्ट योगदान बियादीम्ह वाङमय शताब्दी पुरुषलिसें वरिष्ठ संस्कृतिविद् डा. सत्यमोहन जोशी सच्छिदँ क्यंगु लसताय् यल महानगरपालिकापाखें थीथी ज्याझ्वः यासें हनेगु ज्या जुल । 
 
 
छम्ह बहुआयामिक ब्यक्तित्व कथं नांजाःम्ह वरिष्ठ संस्कृतिविद् सत्यमोहन जोशी सच्छिदँ थ्यंगु लसताय् यल महानगरपालिकापाखें थुकथं हनेगु ज्या जूगु तसकं लसताया खँ जुल । यल महानगरपाखे ंहने त्यंगु थुगु ज्याझ्वःया लसताय् यलया महानगरपालिका अन्तरर्गतया शिक्षालिसें थीथी ख्यलय् विदा तकं बीगु ज्या जुल ।
 
 
वाङमय शताब्दीपुरुष डा. सत्यमोहन जोशी छम्ह साहित्यकार जक मखु, वय्कः प्रशिक्षकलिसें अनुसन्धानकर्ता, समावेशी पत्रकारिता यानादीम्ह पत्रकार नं खः । अथे हे नेपाल राजकीय प्रज्ञा प्रतिष्ठानया न्हापांम्ह उपकुलपति, नेपालभाषा एकेदमिया चान्सलर जुयाः नेपालभाषालिसें खस नेपालीभाषा व थीथी भाषाभाषी उत्थानया नितिं उत्तिकं योगदान बियादीगु दु धकाः झीसं सकस्यां स्यू ।
 
 
वय्कलं नेपाःया नांजाःगु सिरपाःमदन पुरस्कार न्हापांखुसी स्वक्वः तक त्याकादीम्ह छम्ह जक विशिष्ट ब्यक्ति खः । वय्कःया नेपालभाषालिसें नेपाःया थीथी ख्यलय् यानादीगु योगदानयात कयाःन्ह्याक्व चर्चा याःसां म्हो हे जक जुइ । नेपालय् सुलाच्वंगु संस्कृतियात न्ह्यःने हय्गु जक मखु, नेपाःया कला संस्कृतिया पिने देशय् प्रचारप्रसार याय्गु ज्याय् नं उलि हे योगदान बियादीगु दु ।
 
 
नेपालभाषाया ख्यलय् जक मखु, नेपाःया हे ज्वःमदुम्ह ब्यक्तित्व डा. सत्यमोहन जोशी सच्छिदँ क्यंगु लसताय् हना ज्याझ्वःयाःसां नं थुगु ज्याझ्वःयात कयाः भचा बिचाः याय ्माःगु खनेदु । डा. जोशीय लया स्थानीयबासी जूगुलिं यल महानगरपाखें हनीगु स्वभाविक खः, तर वय्कःया योगदानयात लुमंकाः नेपाल सरकारं राष्ट्रिय स्तरं हे हनेमाःगु जक मखुला? थौं न्ह्यस दना ब्यूगु दु ।
 
 
नेपाःया हे ज्वःमदुम्ह ब्यक्तित्व डा. जोशीया सम्मानित याःगु ज्याझ्वलय् नेपाल सरकारया उपप्रधानलिसें रक्षामन्त्री ईश्वर पोखरेल झायादीगु खः । तर वय्कःया उपस्थितिं जक वय्कःयात याःगु सम्मान ज्याझ्वःया स्तर उलि दइ मखु, गुलि नेपाल सरकारपाखें हे सम्मान बी माःगु खः । नेपालय् राष्ट्रियस्तर स्तरं हे सम्मानित याय् माःपिं ब्यक्तित्व धइपिं छम्ह वाङमय शताब्दी पुरुषलिसें वरिष्ठ संस्कृतिविद् डा. सत्यमोहन जोशी खःसा मेम्ह राष्ट्रकवि माधवप्रसाद घिमिरे खः ।
 
 
डा. सत्यमोहन जोशीयात वाङमय शताब्दीपुरुष, महाविद्यावारिधिलिसें आपालं उपाधिलिसें सिरपालं छाय् पियातःम्ह ब्यक्तित्वयात राष्ट्रियस्तर हे सम्मान बी केगु नितिं धाय् नेपाल सरकारपाखें हे हनेज्या याकेगु नितिं झी नेवाः तय्सं पहल याय् माःगु खः वा मखु, थुकी नं बिचाः याय् माःगु खनेदु ।