राष्ट्रिय परीक्षा बोर्डया मुँज्या च्वनिगु
दिल्लागा चतुर्दशी ११४१,साउन २३ सनिवाः
स्वास्थ्य मन्त्रालयं थी थी तगिंया परीक्षा लिछ्यायेत सिफारिस यायेधुंका थुगु खँय् निर्णय यायेत राष्ट्रिय परीक्षा बोर्डया मुँज्या थौं च्वनेत्यंगु दु ।
कोरोना संक्रमण अप्वयावंगुलिं १२ गू तगिं लिसे मेगु परिक्षा दिकेत मन्त्रालयं म्हिगः सिफारिस याःगु खः । १२गू तगिंया परीक्षा थ्वहे साउन ३१ गते निसें न्ह्यायेत्यंगु दु ।
मन्त्रालयया सिफारिसलिपा परीक्षा छु जुइ धइगुलिइ ब्वंमि व शिक्षक अन्योलय् दु । १२गू तगिंया परीक्षाय् थ्यंमथ्यं ४गू लख परिक्षार्थी दुथ्यायेत्यंगु दु । परीक्षाया खँय् थौं निर्णय जुइगु बोर्डं न्ह्यथंगु दु ।
थ्वया न्ह्यः वंगु जेठ २६ गतेया नितिं क्वजिउगु परिक्षा बोर्ड लिछ्यागु खः । कोरोना संक्रमण न्यनावनाच्वंगुलिं १२गू तगिं लिसें लिक्कसं वयाच्वंगु फुक्क परिक्षा लिछ्यायेत शिक्षा मन्त्रालय व कोभिड–१९ संकट व्यवस्थापन केन्द्रयात सिफारिस जूगु स्वास्थ्य राज्यमन्त्री उमेश श्रेष्ठं जानकारी बियादील ।
Categorized in राष्ट्रिय
