राष्ट्रिय फुटबल टोलीं साफ च्याम्पियनसिपया नितिं कतारया दोहाय्
गुंलागा पंचमी ११४१, भाद्र ११ शुक्रवाः
राष्ट्रिय फुटबल टोलीं साफ च्याम्पियनसिपया नितिं लिपांगु तयारी कतारया दोहाय् याइगु जूगु दु ।
असोज १५ गतेनिसें माल्दिभ्सय् न्ह्याइगु साफ च्याम्पियनसिपया तयारीया नितिं फुटबल टोली भदौ २५ गते कतार वनिगु अखिल नेपाल फुटबल संघ (एन्फां) न्ह्यथंगु दु । अनपाखें टोली असोज ११ गते माल्दिभ्स वनिइ ।
मेगु वालय् भारतविरुद्ध जुइगु निगू मैत्रीपूर्ण कासाया तयारीया नितिं टोली आः पोखराय् दु । नेपाः व भारत दथुइ दशरथ रंगशालाय् भदौ १७ व २० गते मैत्रीपूर्ण कासा जुइत्यंगु दु ।
भारत नं साफ च्याम्पियनसिपया तयारीया हे झ्वयल् मैत्रीपूर्ण कासाया नितिं नेपाः वयेत्यंगु खः । ग्वसाःखलः तकं दूगु साविक त्याकुमि माल्दिभ्सलिसे असोज १५ गते म्हिता नेपालं धेंधेंबल्लाया शुरुवात याइ ।
नेपालं निगूगु कासा श्रीलंकालिसे असोज १८ गते व ३गूगु कासा भारतलिसे असोज २४ अले लिग चरणया लिपांगु कासाय् बंगलादेशलिसे असोज २७ गते म्हितिइ । ५गू देय् दुथ्याइगु धेंधेंबल्लाया लिग चरणया कासालिपा शीर्ष निगू टोलीं उपाधिया नितिं असोज ३० गते प्रतिस्पर्धा यायेत्यंगु दु ।
Categorized in कासा
