राष्ट्रिय म्हसीका पतिइ मांया नां
लहनान्युज | गुंलाथ्व दुतिया ११३७ (जुलाई २५ २०१७)
गृहमन्त्री जनार्दन शर्मां राष्ट्रिय म्हसीका पतिइ मांया नां त्वःफित धकाः पिकाःगु समाचार फय्गं खः धयादीगु दु । सोमवाः व्यवस्थापिका संसदय् न्वंवासें मांया नां जक मखुसे म्हसीका पतिइ बजेमांया नां नं मदु धकाः स्पष्ट यानादीगु दु ।
वय्कलं सत्य तथ्य समाचारया आधारय् विषय प्रवेश याकेत संसदया ध्यानाकर्षण तकं यानादिल । थ्वसिबें न्ह्यः छगू राष्ट्रिय न्हिपतिइ मांया नां मतःगु व देय्या नां नं गलत जूगु समाचार पिहां वःगु खः । उगु विषय आइतवाःया बैठकय् सांसदतय्सं बिचाः प्वंकादीगु खः ।
गृह मन्त्रालयपाखें जारी याःगु विज्ञप्तिइ राष्ट्रिय परिचयपत्रया नमूना नं समावेश दुगु गृहमन्त्री शर्मां जानकारी बियादिल । वय्कलं मिसापिं विरुद्धया हिंसाया घटनयात मानव सभ्यताया कलंक खः धकाः तकं धयादिल । घाःपाः जूपिन्त वासः यायेगु व सामाजिक पुनस्र्थापनाया ज्या राज्यं यानाच्वंगु दु धयादिल ।
गृहमन्त्री शर्मां सिन्धुपाल्चोकया लार्चा पुलया रिपोर्ट वये धुनेवं हे बेलिव्रिज नापंया माःगु व्यवस्था जुइ धयादिसें आवागमनयात तत्काल सुचारु यायेत नं सरकार सचेत दु धयादिल ।
