राष्ट्रिय युवा महासंघ, यलया अध्यक्षय् राजन
नृपेन्द्रलाल श्रेष्ठ | दिल्लागा आमै ११४०, श्रावण ५ सोमवाः
राष्ट्रिय युवा महासंघ नेपाल, यल कचाया प्यक्वःगु वार्षिक साधारणसभापाखें राजन महर्जनया नेतृत्वय् न्हूगु ज्यासना पुचः ल्यःगु दु ।
निदँया नितिं ल्यःगु उगु न्हूगु ज्यासना पुचलय् प्रनीता शाक्य न्वकू, सुरज खड्का छ्याञ्जे, प्रत्येक शाक्य दांभरिकथं ल्यःगु दुसा ल्यू–छ्याञ्जेय् सुवास बराइली व सनिल डंगोल, अथे हे ल्यू दांभरिइ अनिस महर्जन व सायरा महर्जनयात ल्यःगु दु । ज्यासना पुचःया दुजलय् रोहण महर्जन व सदिका महर्जन च्वनादीगु दु ।
महासंघया केन्द्रीय नायः सुजन घलेया उपस्थितिइ निर्वाचित जुयादीपिं पदाधिकारी व दुजःपिन्त यल कचाया निवर्तमान नायः राजेश बज्राचार्य पद लःल्हानादिसें सपथ ग्रहण याकादिल । थ्व हे झ्वलय् कचाया नवनिर्वाचित नायः राजन महर्जनं ल्याय्म्हतय्गु अधिकार व युवावर्गया ह्यूपाःया नितिं फुक्कलिसे जानाः न्ह्याःवनेगु प्रतिबद्धता प्वंकादिल ।
थ्व हे झ्वलय् यल क्षेत्र नं. ३या संघीय सांसद् नवराज सिलवाल, पूर्व प्रहरी नायब महानिरीक्षक पिताम्बर अधिकारी, नेपाल प्रहरी लागू औषध दुव्र्यसन ब्युरोया प्रहरी वरिष्ठ उपरीक्षक दीलिप चौधरी, अरनिको साँस्कृतिक तथा व्यावसायिक प्रर्वद्धन समाजया नायः अजरमान जोशी, ललितपुर महानगरपालिकाया विपद् शाखा प्रमुख हरिश्चन्द्र लामिछाने, महानगरपालिका समाजकल्याण महाशाखाया अधिकृत सरिता महर्जनपिन्सं न्हूगु कार्यकाल सुथांलाक्क न्ह्याकेफय्मा धकाः भिन्तुना देछानादिल ।
