प्रमुख प्रतिपक्षी नेकपा एमालें अवरोधया कारण राष्ट्रिय सभाया बैठक स्थगित जुगु दु। शुक्रवाः बजेटय् थीथी मन्त्रालयगत शीर्षकय् छलफल यायेगु कार्यसूची दु।

तर एमालें प्रधानमन्त्रीया राजीनामा माग यासे संसदय् अवरोध याःगु खः। प्रधानमन्त्री पुष्पकमल दाहाल प्रचण्डं थःत प्रधानमन्त्री दयकेत सरदार प्रितम सिंह पटक–पटक दिल्ली वःगु धका सार्वजनिक कथं अभिव्यक्ति बिःगुयात कया एमालें राष्ट्रिय सभा व प्रतिनिधिसभाया बैठक न्ह्याके मबिगु खः।

थौं शुक्रवाः न एमालें बैठक सुरु जुइवं दना विरोध याःगु खः। वया लिपा राष्ट्रिय सभाया अध्यक्ष गणेश प्रसाद तिमिल्सिनां एमाले सांसद विमला घिमिरेयात न्ववायेगु ई बिःगु खः। सांसद घिमिरें प्रधानमन्त्रीया राजीनामा मवतले संसदया कार्यसूची न्ह्याके बिइ मखु धका धाःगु खः। तर, अध्यक्ष तिमिल्सनां प्रधानमन्त्रीया लिसः बिइगु वातावरण दयकेत इनाप याःगु खः ।

एमालें माने मजू व करिब २० मिनेट (१९ मिनेट ४६ सेकेण्ड) तक एमाले सांसदपि दना च्वनेवं अध्यक्ष तिमिल्सनां बैठक हे स्थगित याना बिःगु खः। राष्ट्रिय सभाया मेगु बैठक थ्व हे वइगु आइतवाः सुथय् साढे ११ बजेय् सःतूगु दु।

Categorized in राजनीति