थ्व हे माघ १२ गते जुइगु राष्ट्रिय सभा निर्वाचनय् १२ दलया ब्वति निश्चित जूगु दु ।

राष्ट्रिय सभा दुजः निर्वाचनया लागिं आयोगं दल दर्ताया लागिं ब्यूगु १० पुसया ई सीमा दुने १२ दलं दर्ता याकूगु खः । आयोगया कथं नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी, नेपाल लोकतान्त्रिक पार्टी, जनता समाजवादी पार्टी नेपाल, राप्रपा, राष्ट्रिय जनमोर्चा व नेपाल परिवार दलं न्हय्गुलिं प्रदेशय् ब्वति कायेगु धासें दल दर्ता याकूगु दु ।

अथे हे, लोकतान्त्रिक समाजवादी पार्टीं प्रदेश २ व सुदूरपश्चिम प्रदेश, नेमकिपां बाग्मती प्रदेश व ऐतिहासिक प्रजातान्त्रिक जनता पार्टी नेपालं प्रदेश २ लय् जक ब्वति कायेगु कथं दल दर्ता याकूगु दु ।

आयोगं राष्ट्रिय सभा निर्वाचनया लागिं ८ मतदान स्थलय् १४ मतदान केन्द्र क्वःछ्यूगु दु । उगु मतदान केन्द्र व स्थलय् २द्वः व २५ मतदातां मतदान याइ । राष्ट्रिय सभाया १९ दुजःया पदावधि थ्व हे फागुन २० गते फुइत्यंगु दु ।

आयोगया कथं एमालेया ८, एकीकृत समाजवादीया ४, माओवादी केन्द्रया ४ व कांग्रेसया ३ दुजःया पदावधि फुइत्यंगु खः । राष्ट्रपतिं मनोनीत याःम्ह रामनारायण बिडारीया कार्यकाल नं व हे मितिइ पूवनेत्यंगु दु ।

५९ दुजःया राष्ट्रिय सभाया एक तिहाइ दुजःया प्रत्येक निदँय् पदावधि फुइगु संवैधानिक व्यवस्था दु ।

Categorized in राष्ट्रिय