Display Style:
Column Style
नेपालभाषा परिषदया न्हुगु नेतृत्वय् सुवर्ण शाक्य
नृपेन्द्रलाल श्रेष्ठ | अनलाथ्व चौथी ११३८ (मे १९ २०१८)
थौं जुगु नेपालभाषा परिषदया झींस्वक्वःगु साधारण सभां प्रा. सुवणं शाक्ययात अध्यक्ष पदय् र्निबिरोध निर्वाचित यागु दु ।
अथेहे उपाध्यक्ष नबिन चित्रकार, सचिव धुब्र मधिकर्मि, दांभरी मंगला कारंजित, ल्यु दांभरी सरस्वती तुलाधरयात सर्वसम्मत जुगु दु ।
अथेहे दुजलय् छत्रबहादुर कायस्थ, मदनसेन बज्राचार्य, नरेशबीर शाक्य,प पुष्परत्न तुलाधर, भवानी तुलाधर व बिमलप्रभा बज्राचार्ययात न सर्वसम्मत ल्यगु खः।
जगतसुन्दर ब्बनेकुथि जुगु उगु साधरणसभाय् छ्याञ्जे नबिन चित्रकार प्रगति विवरण न्ह्यब्बयादीग् खःसा दांभरी डा. केशरीलक्ष्मी मानन्धरं ल्याःचाः न्ह्यब्बयादीगु खः ।
सरस्वति तुलाधरं न्ह्यकादीगु उगु ज्याझ्व परिषदया नायः सुवर्ण शाक्यया सभाधक्ष्य जुगु खः ।
परिषदं भाषाथुवाया यज्ञरत्न धाख्वयात बिइगु
नृपेन्द्रलाल श्रेष्ठ | अनलाथ्व चौथी ११३८ (मे १९ २०१८)
नेपालभाषा परिषदं थुगुसी भाषाथुवाया उपाधी बरिष्ठ साहित्यकार यज्ञरत्न धाख्वयात बिइगु क्वःछिगु दु ।
थौं जुगु परिषदया झींस्वक्वःगु तँमुज्याय् सचिव नबिन चित्रकारं उगु खँया जानकारी बियादीगु खः ।
अथेहे चित्तधर सिरपा साहित्यकार डा.योगेन्द्रमान श्रेष्ठ, ठाकुरलाल सिरपा डा.पुष्पराज राजकर्णिकार, मोतिलानि सिरपा लोचनतारा तुलाधर, केशवलाल सिरपा अनिता तुलाधर व पुर्णहिरा सिरपा मोतिलक्ष्मी शाक्ययात बिइगु धकाः थां जानकारी बियादीगु खः ।
च्वसू कासा क्वचाल
लहनान्युज | अनलाथ्व चौथी ११३८ (मे १९ २०१८)
नेवाः बस्ती नेवाः स्कूल अभियानया ग्वसालय् जनबाःद्यवबुंगद्यःया याःया बारे च्वसू कासा शनिवाः मोर्डन नेवाः इंगलिस स्कूलय् क्वचाःगु दु ।
नेवाः बस्ती नेवाः स्कूल अभियानया कजिं दिपक तुलाधरया नायःसुइ मूपाहाँ कथं मिस नेवाः आइकन दिया श्रेष्ठ झायादीगु ज्याझ्वलय् थीथी ब्वनेकुथिया मुक्कं झिंखुम्ह ब्बमिपि इशिका महर्जन थेच्व नेवाः ई. स्कूल, उध्यान शाह, सामना महर्जन भास्सरा स्कूल, तृष्णा महर्जन, दीपा गदाइली, प्रिया शाही, मिनल शाही, सनिशा थापामगर जगतसुन्दर ब्वनेकुथि,नस्वाः जोशी पाठशाला नेपाल ।
अथेहे विपश्यना बज्राचार्य डल्लु आ. मा. बि., मतिना तुलाधर सेन्टमेरिज स्कुल, रोभास्का बजिमय आइडल मोडल हाइयर सेकेन्डरी स्कूल, लुभा महर्जन मैत्री स्कूल, सचेतना मानन्धर ज्ञानकुञ्ज स्कूल, सुकीति कंसाकार जेम्स स्कूल, श्लेष्मा बाबा बज्राचार्य शांकरी स्कूलमध्ये न्हाप श्लेष्मा बाबा बज्राचार्य, ल्यू नस्वाः जोशी व लियांल्यू सनिशा थापामगर लाःगु दुसा इसिका महर्जन, सामना महर्जन, सचेतना मानन्धर व लुभा महर्जनपिन्त हःपा सिरपाः लागु दु ।
सिरपाः न्हाप लाःम्हेसित ७ द्वः तका, ल्यू लाम्हेसित ५ द्वः तका, लियांल्यू लाम्हेसित ३ द्वः तका व हःपा सिरपाःकथं म्हति द्वःछि तका दां व दसिपौ मूपाहाँ श्रेष्ठं लःल्हानादीगु खः ।
अथेहे कासाय् ब्वति काःपिं सकसितनं हःपाः कथं दसिपौ व दां मूपाहाँ श्रेष्ठं लःल्हानादीगु दु ।
बुखँ अमिर मैया रञ्जित
‘हेमबहादुर मल्ल सम्मान’ उमेश प्रसाद मैनालीयात
लहनान्युुज | अनलाथ्व तृतिया ११३८ (मे १८ २०१८)
साल्ट ट्रेडिङ कर्पोरेशनया पुलांम्ह अध्यक्ष हेमबहादुर मल्लया नामं नीस्वनातःगु ‘हेमबहादुर मल्ल सम्मान’ वि.सं. २०७० सालया निंतिं लोकसेवा आयोगया अध्यक्ष व पुलांम्ह मुख्य सचिव उमेश प्रसाद मैनालीयात छगू ज्याझ्वःया दथुइ उपराष्ट्रपति नन्द बहादुर पुनः सम्मानपत्र व नगद सिरपाः लःल्हानादीगु खः ।
साल्ट ट्रेडिङं नगद सौजन्यय् नेपाल जनप्रशासन संघपाखें बिया वयाच्वंगु थुगु सिरपाः निगू लाख तका व सम्मान पत्र खः ।
उगु ज्याझ्वलय् न्ववानादिसें साल्ट ट्रेडिङया अध्यक्ष लक्ष्मीदास मानन्धरं कर्पोरेशनं सामाजिक दायित्व अन्तर्गत ३६ दँ तक थीथी पदय् च्वनाः ज्या यानाः साल्ट ट्रेडिङयात बांलाःगु अवस्थाय् थ्यंकादीम्ह कुशल प्रशासक व व्यवस्थापक हेमबहादुर मल्लया नामय् थुगु सम्मान नीस्वनातयागु खँ कनादिल ।
लोकसेवा आयोगया अध्यक्ष मैनालीं सम्मान लःल्हाना कयादिसें कर्मचारी प्रशासन सम्बन्धी ‘कि नोट’ न्वचु नं बियादीगु खः ।
वंगु झिदँ न्ह्यवनिसें बिया वयाच्वंगु थुगु सिरपा आतकं प्रशासकत केदारभक्त माथेमा, महावीर पुन, डा भगवान कोइराला, चाँदनी जोशी यात बीधुंकूगु दु ।
न्हापा छगु लखतक बियावया च्वंगु थुगु सिरपा थुगुसि निसें निगु लखतक याःगु खः ।
न्हापांगु मातृभाषा (राष्ट्रभाषा) पत्रकारिता सम्मेलन क्वचाल
लहनान्युज | अनलाथ्व द्धितीया ११३८ (मे १७ २०१८)
नेपालय् हे न्हापांखुसि २६ गू आदिवासी जनजातिया मातृभाषया पत्रकारतय्गु ब्वति दुगु संघीय संरचनाय् संचार मातृभाषा पत्रकारिताया आधार धइगु नारा थ्वयेका नेवाः पत्रकार राष्टिय दबू राष्ट्रिय दबूया ग्वसालय् अले नेपाल आदिवासी जनजाति पत्रकार महासङ्घया संयोजनय् नेसं ११३८ अनलाथ्व पारु (सन् २०१८ मे १६) कुन्हु तःजिक क्वचाःगु दु ।
येय् जूगु उगु सम्मेलनयात ऐतिहासिक सम्मेलन खः धकाः सरोकारवालातय्सं धयादीगु दु । नेपालय् वंगु ९३ दँ न्ह्यःनिसें न्ह्यानाच्वंगु नेपाःया मातृभाषाया पत्रकारितायात अझ सशक्त याना यंकेमाःगुलिं उगु कथंया सम्मेलन यानागु खः धकाः धाःगु दु ।
मातृभाषा पत्रकारिता सम्मेलनय् ब्वति कयादीपिं २६ गू आदिवासी जनजाति समुदायया पत्रकारपिं ः
१) नेवाः, २) मगः, ३) राई, ४) तामाड, ५) लिम्बु, ६) थारु, ७) गुरुड, ८) शेर्पा, ९) बराम, १०) उराँब, ११) धिमाल, १२) माझी, १३) ताजपुरिया, १४) किसान, १५) दुनवार, १६) जिरेल, १७) सुनवार, १८) थामी, १९) ल्होमी, २०) कुमाल, २१) दराई, २२) चेपाड, २३) बान्तवा राई, २४) मुगाल, २५) मेचे २६) राजवंशी
सार्वजनिक जूगु घोषणा पतिइ न्ह्यथनातःगु बुँदात ः
१) नेपाःया संचार जगतय् आदिवासी जनजाति पत्रकारिताया न्यून उपस्थितियात नीति निर्माण तहलं समस्याया रुपय् आत्मसात् यायेमाःगु व उकिया समाधानया नितिं बहुआयामिक सकारात्मक पहल न्ह्यःने यंकेमाःगु
२) थौंकन्हय् गोरखापत्र न्हिपतिइ अभ्यास जुयाः वयाच्वंगु बहुभाषिक पत्रकारितायात समावेशी पत्रकारिताया छगू नमूनाया रुपं कयाः प्रत्येक प्रदेशया जनसंख्या, भाषा, सांस्कृतिक बाहुल्यताया आधारय् मातृभाषी संचारकःमिपिनिगु सक्रिय सहभागिता सुनिश्चित यायेमाःगु लिसें सरकारी संचार माध्यमय् मातृभाषा पत्रकारिता यानाः वयाच्वंगु जनशक्तिया पेशागत सुनिश्चितता कायम यायेमाःगु
३) नीति निर्माण तहलय् आदिवासी जनजाति पत्रकारपिनिगु प्रतिनिधित्व सुनिश्चित यायेमाःगु
४) नेपाली संचार माध्यमया अन्तर्वस्तुइ नेपाःया विविधता प्रतिविम्बित जुइमाःगु व उकिया नितिं समाचार कक्षय् आदिवासी जनजाति समुदायया समानुपातिक प्रतिनिधित्व जुइमाःगु
५) गैरमातृभाषी संचार क्षेत्रय् संलग्न आदिवासी जनजाति संचारकःमिपिन्त उगु क्षेत्रय् परिचालन जुइत प्रोत्साहित व आकर्षित यायेमाःगु
६) जनजाति संचारकःमिया क्षमता विकासया नितिं माःगु ज्याझ्वःत संचालन यायेमाःगु, ७) पत्रकारितायात समानता व सामाजिक न्याय, पहिचानया नितिं आदिवासी जनजातिं यानाः वयाच्वंगु आन्दोलनया अभिन्न अंकया रुपं आत्मसात् यायेमाःगु
८) आदिवासी जनजाति संचार पहलया नितिं विशेष सुविधा व प्रोत्साहनया व्यवस्था जुइमाःगु
९) राज्यं समानुपातिक व समानताया आधारय् अनुदान वितरण प्रणाली संचालन जुइमाःगु
१०) राज्यं राष्ट्रिय स्तरय् प्रत्येक दँ मातृभाषा पत्रकारिता दिवसया ग्वसाः ग्वयेमाःगु ।
मातृभाषा पत्रकारिताया विकासं प्रेस व अभिव्यक्ति स्वतन्त्रताया उच्चतम अभ्यास याकेगु व नेपाली पत्रकारिताया परिभाषायात व्यापकता प्रदान याइगु जूगुलिं आमसंचारय् फुक्कसिगु पहुँच सुनिश्चित यायेत च्वय् न्ह्यथंगु बुँदात कार्यान्वयनय् हयेत सम्बद्ध निकाययात आह्वान यानाच्वना धकाः नेवाः पत्रकार राष्ट्रिय दबूया नायः श्रीकृष्ण महर्जनपाखें घोषणा पौ सार्वजनिक यानादीगु खः ।
थौंसिबें ९३ दँ न्ह्यः धर्मादित्य धर्माचार्यं नेपालभाषां दक्ले न्हापां नेपाःया आदिवासी जनजातिया मातृभाषां पत्रिका पिथनादीगुलिं वय्कःया लुमन्तिइ दँय् दसं नेवाः पत्रकार राष्टिय दबूपाखें मातृभाषा पत्रकारिता दिवस बुद्ध जयन्तीया छन्हु न्ह्यः याना वयाच्वंगु खःसा मातृभाषाया सवालय् सकल आदिवासी जनजाति छगू हे थासय् च्वना सहलह ब्याका न्ह्यः वनेगु यायेमाः धकाः दबूपाखें न्हापांगु मातृभाषा पत्रकारिता सम्मेलन ग्वसाःग्वःगु खः ।
सम्मेलनं धर्मादित्यं सुरु यानादीगु नेपालभाषा पत्रकारितायात हे न्हापांगु आदिवासी जनजाति पत्रकारिताया निंितं पलाः खः धकाः मातृभाषा पत्रकारिता सम्मेलनं स्वीकार याःगु दुसा आः मातृभाषा पत्रकारिता दिवस तकं राज्यं हनेमाः धकाः तकं माग याःगु दु ।
उद्घाटन समारोह
बुधवाः येँय् २६ गू जनजातिया मातृभाषाया पत्रकारतय्त दुथ्याका न्हापांगु मातृभाषा पत्रकारिता सम्मेलन याःगु खःसा उगु सम्मेलनया उलेज्या येँ महानगरपालिकाया मेयर विद्यासुन्दर शाक्यं यानादीगु खः । नेवाः पत्रकार राष्टिय दबूया केन्द्रीय नायः श्रीकृष्ण महर्जनया सभापतित्वय् जूगु उगु ज्याझ्वलय् सम्मेलनया कजि नापं दबूया न्वकू नृपेन्द्रलाल श्रेष्ठं लसकुस न्वचू बियादीगु खःसा ज्याझ्वःया बारे मूछ्याञ्जे सुनिल महर्जनं यानादीगु खः ।
छ्याञ्जे केके मानन्धरं संचालन यानादीगु उद्घाटन समारोहलय् पाहां कथं प्रदेश नंं ३ या सांसद राजेश शाक्य, नेपाल प्रेस कान्सीलया दुजः सुभेक्षा विन्दु, नेपाल आदिवासी जनजाति पत्रकार महासंघया नायः डण्ड गुरुड, दबूया सल्लाहकारपिं नरेशवीर शाक्य, राजा शाक्य, सुरेश किरण मानन्धर, सुजिप बज्राचार्य, नेपाल पर्यटन बोर्डया कृष्ण अर्याल लगायतपिं जुयादीगु खः ।
सल्लाहकार सुजिप बज्राचार्य, फोनिजया नायः डण्ड गुरुड, नेपाल प्रेस काउन्सीलया दुजः सुभेक्षा विन्दु, पर्यटन बोर्डया कृष्ण अर्यालपिन्सं भिंतुना न्वचू बियादीगु खः । ज्याझ्वलय् येँ महानगरपालिकाया प्रमुख विद्यासुन्दर शाक्यं मातृभाषा पत्रकारिता यानादीपिं संचारकःमित छप्पँ छधी जुया मवन धाःसा थुगु आन्दोलन न्ह्याकेत थाकुइ धकाः धयादिल ।
वय्कलं मातृभाषा व विपिया विकासया व विस्तारया नितिं येँ महानगरपालिका न्ह्याबलें तयार दु धयादिल । ज्याझ्वलय् मेम्ह पांहा प्रदेश नम्बर ३ या सांसद राजेश शाक्यं मातृभाषा सम्वन्धी ऐन दयेकेगु इलय् मातृभाषाया पत्रकारतय्गु सुझाव नं कायेगु जुइ धयादिल । अथे हे संचार नीति व समानुपातिक विज्ञापनया सवालय् मातृभाषाया पत्रकारपिन्त बः बिइमाः धकाः धयादिल ।
