Display Style:
Column Style
नेपालभाषा केन्द्रीय विभागया प्रमुखयात लसकुस
लहनान्युज | अनलागा सप्तमी ११३८ ( जुन ८ २०१८ )
विश्व वातावरण दिवसया लसताय् नेपालभाषा केन्द्रीय विभाग पाटन क्याम्पस दुने विभागया ल्यूने सिमा पीगु व न्हूम्ह विभागया प्रमुख सह–प्राध्यापक डा. ओमकारेश्वर श्रेष्ठयात लसकुस यायेगु ज्याझ्वः जुगु दु ।
मूपाहाँ यल महानगरपालिकाया प्रमुख चिरिबाबु महर्जन, यल १० नं वडा नायः नर्सिंङ व्यञ्जनकार, विभागया पूर्व प्रमुखपिं प्रा. प्रेमशान्ति तुलाधर, सह–प्रा. तुलसी लाल सिंह, सिर्जना प्रधान, शिक्षक शिक्षिकापिं, लुमन्ति दबूया नायः किरण केन रञ्जित, दबूया पुलांपिं नायःपिं व ब्वंमिपिसं थी थी जातया सिमा प्यूगु ज्या जुगु खः ।
मूपाहाँ यल महानगरपालिकाया प्रमुख चिरिबाबु महर्जनं सिमा पीगु जक मखु उकियात थः मस्त भाःपिना इलय् बलय् लः व साः बिया सुसाकुसाः यानाः मा थकाये फत धाःसा जक सिमा पिनागुया औचित्य दइ धकाः थःगु नुगः खँ तयादीगु खः ।
न्हूम्ह प्रमुख श्रेष्ठं थःगु प्यदँया कार्यकालय् नेपालभाषा केन्द्रीय विभागयात स्तरीय यायेगु नापं अध्ययन अनुसन्धान केन्द्रया रुपय् विकास यायेत यल महानगर पालिकानाप समन्वय व सहकार्य याना वनेगु बचं न बियादिल ।
उगु ज्याझ्वलय् नायः डा. गौतमं क्याम्पस दुने वाङ्मय शताब्दी पुरुष सत्यमोहन जोशीया म्यूजियम दयेकेया नितिं यल महानगर प्रमुख महर्जननाप माःगु कथंया ग्वाहालिया आसा नं यानादिल ।
पाटन क्याम्पस प्रमुख डा. माधव गौतमया नायःसुइ जुगु उग ज्याझवः विभागया शिक्षक राजित बहादुर श्रेष्ठं न्ह्याकादीगु खः ।
बुखँ अमिर मैया रञ्जित
किपा नेवाः सूचना केन्द्र
हिरण्यवर्ण महाबिहार दँ मुँज्या क्वचाल
नृपेन्द्रलाल श्रेष्ठ | अनलागा सप्तमी ११३८ ( जुन ८ २०१८ )
यलया हिरण्यवर्ण महाबिहार सुधार समितिया ने.स. ११३७ दँमुज्या छगु ज्याझ्वः दथुइ मूपाँहा सस्कृति पर्यटन तथा नागरिक उड्डयन मन्त्री रविन्द्रप्रसाद अधिकारीं उलेज्या यानादीगु दु ।
उगु ज्याझ्वलय् मूपाँहा सस्कृति पर्यटन तथा नागरिक उड्डयन मन्त्री रविन्द्रप्रसाद अधिकारीं नेपाःया सस्कृति हे झीगु पहिचान खः धयादीसे झीगु सस्कृतियात झीसं हे संरक्षण यायेमाः धकाः धयादीगु खः ।
यल महानगरपालिकाया मेयर चिरिबाबु महर्जन, प्रतिनिधिसभा सदस्य कृष्णलाल महर्जन, पुलाम्हमन्त्री बुद्धिराज बज्राचार्य, पुलाम्ह सांसद सिद्धिलाल सिंह, पुलाम्ह मेयर बेखामान शाक्य, पुलाम्ह मुख्यसचिव तिर्थमान शाक्य, धर्मोदय सभाका का.वा.अध्यक्ष लक्ष्मीदास मानन्धर, बौद्ध विहार संघया पुष्परत्न शाक्य व १६ वडा अध्यक्ष निर्मल रत्न शाक्य पाहा कथं झायादीगु खः।
समितिया नायः विकास रत्न धाख्वाया सभाधक्ष्यय् ज्ुगु उगु ज्याझ्वलय् सचिव राम बहादुर शाक्यं प्रगति बिवरण न्ह्यब्बयादीगु नाप दांभरी किरणनर्सिङ्ग शाक्य समितिया ल्याःचाः न्ह्यब्बयादीगु खःसा ज्याझ्वः सहसचिव ईन्द्रवीर शाक्यं न्ह्याकादीगु खः ।
उगु ज्याझ्वलय् दशपारमिता आजुपिं थपा आजु तिर्थराज शाक्य, चक्रेश्वर आजु रत्नराज बज्राचार्य, पञ्चस्थविर आजु आशारत्न बज्राचार्ययात मन्त्री अधिकारीं डोसल्ला न्ययेका सम्मान यानादीगु खः ।
अथेहे अखिल नेपाल भिक्षु महासंघया अध्यक्ष, बौद्ध अध्ययन यानादीम्ह भिक्षु मैत्री महास्थविर, डा. करुणा लक्ष्मी शाक्य, मिगुन शाक्य, ई. अमृतरत्न शाक्य, राहुल मान शाक्य, पदमरत्न धाख्वा व नरेश शाक्ययात न हना दीगु खः ।
जनसेवा सामुदायिक केन्द्रया खुक्वःगु दँमुँज्या
नृपेन्द्रलाल श्रेष्ठ | अनलागा पंचमी ११३८ ( जुन ३ २०१८ )
जनसेवा सामुदायिक केन्द्रया खुक्वःगु दँमुँज्या जूगु दु । उगु दँमुज्याया उलेज्या येँ महानगरपालिकाया प्रमुखलिसें केन्द्रया पुलांम्ह नायः विद्यासुन्दर शाक्यं यानादीगु खः ।
उगु दँमुँज्यापाखें विकासभक्त श्रेष्ठया अध्यक्षताय् १७ म्हेसिगु न्हूगु ज्यासना पुचः नं नीस्वंगु दु । श्रेष्ठया अध्यक्षताय् गठन जूगु न्हूगु ज्यासना पुचलय् पवित्र वज्राचार्य न्वकू, विजयकृष्ण श्रेष्ठ मूछ्याञ्जे, सुभानकुमार श्रेष्ठ छ्याञ्जे व चिनियामान वज्राचार्य दांभरि जुयादीगु दु ।
अथे हे दुजलय् शशिलाल श्रेष्ठ, बाबुराजा महर्जन, श्याम चित्रकार व हरिकृष्ण डंगोल च्वनादीगु दु । न्हूगु ज्यासना पुचलय् ल्यं दुपिं खुम्ह समावेशीताया लिधंसाय् मिसापिं नं दुथ्याकाः मनोनित याय्गु केन्द्रं जानकारी ब्यूगु दु ।
स्थानीय जनता व नेपाल प्रहरीया मंकाः कुतलय् नीस्वनातःगु केन्द्रं येँ महानगरपालिकाया वडा नं. १८, १९, २०, २१, २२, २३, २४, २५ व २७ यानाः गुंगू वडायात कार्यक्षेत्र दय्काः सामुदायिक प्रहरी सेवा केन्द्रलिसें थीथी सामाजिक व विकासया ज्याझ्वःत याना वयाच्वंगु दु ।
नापं उगु ज्याझ्वलय् जनसेवा सामुदायिक प्रहरीया हवल्दार पदम भट्टराईयात नं नगद व दसिपौपाखें हनेगु ज्या जूगु खः ।
“मिसेस नेवाः ११३८” जुइगु
नृपेन्द्रलाल श्रेष्ठ | अनलागा पंचमी ११३८ ( जुन ३ २०१८ )
देय्न्यंकया नेवाः मिसापिन्त जागरण व सबलीकरण याय्गु तातुनां के.टि.एम. मिडिया एण्ड इभेन्ट्सपाखें नेवाः समुदायया इहिपाः जुइधुंकूपिं मिसापिन्त लक्षित यासें थीथी शीर्षक व विषयस अनौपचारिक शिक्षा तालिम व प्रतिस्पर्धाया तयारी जुयाच्वंगु जानकारी छगू पत्रकार सम्मेलनय् ब्यूगु दु ।
थ्व हे झ्वलय् नेवाः समुदायया इहिपाः मजूपिनिगु मिसा वर्गया ल्याय्म्ह पुस्तायात लक्षित यासें ‘न्हापांगु मिस नेवाः आइडल’ याय्गु नं उगु पत्रकार सम्मेलनय् जानकारी ब्यूगु दु ।
यलया लगनखेलय् च्वंगु ललितपुर मलय् जूगु उगु पत्रकार सम्मेलनय् ‘मिसेस नेवाः २०१८’या फर्म इनेज्या जेष्ठ २० गतेनिसें याःगु जानकारी ब्यूगु दुसा अडिसन असार १५ व १६ गते जुइगु जानकारी नं ब्यूगु खः ।
अथेहे ट्रेनिङ श्रावण ३ गतेनिसें ललितपुर मल लगनख्यलय् जुइगु व ग्राण्ड फिनाले भदौ १ गते येँया राष्ट्रिय नाचघर जमलय् जुइगु जानकारी नं उगु पत्रकार सम्मेलनय् ब्यूगु दु ।
निक्वःगु “मिसेज नेवाः ११३८” जुइत्यंगु उगु ज्याझ्वःया प्रचारात्मक ज्याझ्वःकथं जूगु पत्रकार सम्मेलनय् रेणुका बज्राचार्यं प्रेस विज्ञप्ति ब्वनाः न्यकांदीगु खः ।
ज्याझ्वलय् न्हापांम्ह मिसेज नेवाः २०१७ रेजिना शाक्य व रनर अप सरीता नेम्कुल प्रधानं थगुने कासाय् ब्वति कयाः थःपिनिगु न्हूगु हे म्हसीका दय्केत ताःलाःगु लिसें न्हू न्हू खँत सय्केगु ह्वःताः चूलाःगु धयादिल ।
श्री हल्चोक आकाश भैरव समन्वय समुह गठन
नृपेन्द्रलाल श्रेष्ठ | अनलागा तृतिया ११३८ ( जुन १ २०१८ )
येँया हल्चोकय् च्वंगु श्री हल्चोक आकाश भैरव गुथीया जात्रा नाप थी थी कथंया ग्वाहालि यायेगुया नितिं थौं छगु ज्याझ्व दथुइ गुथीया हे नायःया सागर पुतुवारया नेतृत्वय् श्री हल्चोक आकाश भैरव समन्वय समुह गठन जुगु दुु ।
उगु हुगु ज्यासना पुचलाय् उपाक्ष्यक्ष सुरज पुतुवार, सचिव सुरेन्द्रभक्त श्रेष्ठ व कोषाक्ष्यक्षय् नृपेन्द्रलाल श्रेष्ठ च्वनादीगु खः ।
अथेहे दुजलय् बिश्व शाक्य, पुरुषोत्तम महर्जन, राजु डंगोल, श्याम महर्जन, दलबहादुर पुतुवार, शुक्रबहादुर पुतुवार व अर्जुन पुतुवार च्वनादीगु खः । नाप समुहया सल्लाहकारय् माईलाप पुतुवार, शरद कुमार डंगोल व रविकृष्ण श्रेष्ठ च्वनादीगु खः ।
समुहया न्हुम्ह नायः सागर पुतुवारं थुगु ज्यासना पुचलं न्हापा श्री हल्चोक आकाश भैरव गुथीया गुथीयार पिन्स जक जात्राय् ग्वाहालियाना वयाच्वंगु खःसा आः थुगु श्री हल्चोक आकाश भैरव समन्वय समुहपाखे न ग्वाहलि आ गुथिया थी थी ज्याय् ग्वाहालि जुइगुलि लसता प्वका दिल ।
