Display Style:
Column Style
नृत्य निर्देशक हनि श्रेष्ठयात हनीगु
नृपेन्द्रलाल श्रेष्ठ | चौलागा दुतिया ११३८ (अप्रिल २ २०१८)
स्रष्टा व सृजनाया सम्मान याय्गु परम्परायात निरन्तरता बीगु झ्वलय् नृत्य निर्देशक संघ नेपालपाखें नृत्य निर्देशक हनी श्रेष्ठयात सम्मान याइगु जूगु दु । थ्व हे झ्वलय् येँया राष्ट्रिय नाचघरय् ‘नृत्य गुरुआमा हनी श्रेष्ठ सम्मान साँझ २०७४ तथा सांस्कृतिक कार्यक्रम’ याइगु पत्रकार सम्मेलन यासें ग्वसाः खलकं जानकारी ब्यूगु दु ।
नृत्य विधाय् पद्मकन्या बहुमुखी क्याम्पसय् निगू दशक स्वयां अप्वः अध्यापन याकादीम्ह श्रेष्ठ थौंकन्हय् श्रृजना कलेज अफ आर्टपाखें स्नातक तगिंया शिक्षा बिया वयाच्वनादीगु दुसा थीथी संघसंस्थाय् आबद्ध जुयाः मदिक्क नृत्य प्रशिक्षण बियाः निरन्तरकथं थुगु क्षेत्रय् सक्रिय जुयाः ज्वःमदुगु योगदान बियादीगुलिं वय्कःयात नृत्य निर्देशक संघपाखें हनेत्यंगु खः ।
वय्कःयात दोसल्लां न्यय्काः नीन्याद्वः न्यासः व न्यय्तकालिसें सिजःपौ व डि–डान पदकपाखें हनीगु नं ग्वसाः खलकं जानकारी बियादीगु दु ।
सम्मान ज्याझ्वलय् नृत्य निर्देशक संघ नेपालया येँ, यल, ख्वप, काभ्रे, चितवनलिसेंया थीथी शाखा व कलालिसे सम्बद्ध संघसंस्थाया ग्वाहालिइ सांस्कृतिक ज्याझ्वः नं न्ह्यब्वइगु जूगु दु ।
थ्व हे झ्वलय् नृत्य निर्देशक संघ नेपाल पलिस्था जूगु दिं श्रावण २६ गतेयात “राष्ट्रिय नृत्य दिवस” घोषणा याय्त नं सरकारलिसे माग याःगु दु ।
स्वक्वःगु हलिं नेवाः दवूया तःमुँज्या येँ याइगु
नृपेन्द्रलाल श्रेष्ठ | चौलाथ्व पुन्हिं ११३८ (मार्च ३१ २०१८)
हलिं नेवाः दवूया ग्वसालय् येँ निन्हु न्हयाःच्वंगुु हलिं नेवाः दिवस थौं क्वचाःगु दु ।
थौं जुगु उगु समापन समारोहय् दबूया नायः सिजन श्रेष्ठं स्वक्वःगु हलिं नेवाः दवूया तःमुँज्या येँ यायेगु धकाः न घोषणा यानादीगु दु ।
निन्हुया दु ने झींच्याःगु ज्यापौंया सहलह जुु गु खः। थौंया ज्याझ्वलय् घोषणा पत्र १११८ जारी यासें दवूया प्रवक्ता कृष्ण चखुं घोषणा यानादिगु खः । उगु जारी याःगु घोषणापत्रय् नेपाल भाषा
साहित्य, संस्कृतिया, पत्रकारीता, संकिपा बिकासया नितिं हलिं नेवाः कोष निंस्वनेगु धकाः घोषणा याःगु खः ।
थौं या हलिं नेवाः दिवस क्वचाःगु घोषणा याना दीसें दवूया नांयः सिजन श्रेष्ठं ज्याझ्वलय् तःजिक क्वचायेकेगु नितिं ग्वहालि याःपिं सकसितं सुभाय् नं देछानादिगु खः । नाप आः मार्चया दकलय् लिपाःगु शनिवाः हलिं नेवाः दिवस हनिगु जुइ धका नं थौंया ज्याझ्वलय् घोषणा यानादीगु खः ।
न्हापांगु हलिं नेवाः दिवस दवूया बरिष्ठ न्वकू दया रत्न शाक्यया संयोजनय् जुगु खः ।
थौंया औपचारिक ज्याझ्वः लिपा सास्कृति ज्याझ्वः नं जुगु खः ।
राष्ट्रपति भण्डारीें संघीय संसदयात १५ गते सम्बोधन याइगु
लहनान्युज चौलाथ्व दशमी ११३८ (मार्च २६ २०१८)
राष्ट्रपति विद्यादेवी भण्डारीें संघीय संसदयात थ्व हे वइगु १५ गते सम्बोधन याइगु जुगु दु ।
मन्त्रिपरिषद्या थौंया मुज्यां प्रतिनिधिसभा व राष्ट्रियसभाया मकाः मुज्यां राष्ट्रपतिया सम्बोधनया तिथि क्वःछिगु दु ।
राष्ट्रपति भण्डारीं थ्व हे वइगु १५ गते ४ ताः इलय् सम्बोधन याये त्यःगु खः ।
राष्ट्रपति भण्डारीया निक्वःगु कार्यकालया थ्व न्हापांगु संसदय् सम्बोधन खः ।
विश्वक्षयरोग दिवसया झ्वलय् स्वास्थ्यशिविर
लहनान्युज | चौलाथ्व दशमी ११३८ (मार्च २६ २०१८)
१३६क्वःगु विश्वक्षयरोग दिवसया झ्वलय् ‘फुक्कतगिंया नेतृत्वपिनिगु प्रतिबद्धता, क्षयरोग मुक्त नेपाःया सुनिश्चितता’ मू नारायालिसें ख्वपयाथीथी संघसंस्थातजानाः स्वास्थ्यशिविर यासें हंगु दु ।
ग्लिटर फ्यूचर माध्यामिक विद्यालय, बाराहीस्थान ख्वपय् जूगु उगु निःशुल्क स्वास्थ्य शिविरय् मिसा व मिजं यानाःमुक्कं ४१२ म्हेस्यां उसाँय् परीक्षण याकूगु खः । शिविरय् मिसानापं मस्तय्गु ल्वय्, हाडजोर्नी, फिजियोथेरापी, छातिया ल्वय्, खै परीक्षण नापं वाया जाँचयाःगु खः । उगु शिविरय् वासः नं निःशुल्क इनेगु ज्या जूगु खः ।
उगु ब्वनेकुथिया प्रिन्सिपलनापं नेपाल रेडक्रस सोसाइटी, बाराही उपशाखाया सभापति राम प्रसाद खाताख्वया सभाध्यक्षताय् जूगु शिविरया उलेज्या ख्वपनगरपालिका ४ या वडानायः कुमार चवालं यानादीगु खः ।
ज्याझ्वलय् जिल्ला जनस्वास्थ्य अधिकृत तारा शर्मा, बासुदेव प्रसाद जोशी स्मृति प्रतिष्ठानया ओमचरण अमात्य, नेरेसो जिल्लाशाखा ख्वपयामन्त्री परशुराम, नेपालक्षयरोग निवारण संस्था, जिल्लाशाखा ख्वपया सभापति रामसिख्वपिन्सं विश्वक्षयरोग दिवसयात कयाःन्ववानादीगु खः ।
नेपाल रेडक्रस सोसाइटी जिल्लाशाखा भक्तपुर मन्त्री परशुराम, नेपालक्षयरोग निवारण संस्थाजिल्लाशाखा भक्तपुरका सभापति रामसिख्वः न्ववानादीगु खः ।
नेपाल क्षयरोग निवारण संस्था, बासुदेव प्रसाद स्मृति प्रतिष्ठान, ग्लिटर फ्यूचर माध्यमिक विद्यालय, नेपाल रेडक्रस सोसाइटी बाराही उपशाखा, लाय्न्स क्लबअफ काठमाडौं समर्पित, तारा मण्डल महिला शसक्तिकरण अभियान, खुड्किलो नेपाल व उपकार सेवा संस्था नेपालया मंकाःग्वसालय् निःशुल्क स्वास्थ्य शिविर जूगु खः ।
भिन्तुना गुथिया वसन्त उत्सव झःझः धाय्क क्वचाल
लहनान्युज | अष्टमी ११३८ (मार्च २५ २०१८)
असंया थाकुलियात सम्मान यासें भिन्तुना गुथि, असंया भिन्तुना वसन्त उत्सव ज्याझ्वः झःझः धाय्क क्वचाःगु दु ।
गुथिं थौं येँया असन न्याक्वःगु भिन्तुना वसन्त उत्सव ज्याझ्वःया ग्वसाः ग्वसें असंया थाकुलि १०४दँयाम्ह मोतिकृष्ण तुलाधरयात हंगु खः । उगु हे ज्याझ्वलय् छुं दिं न्ह्यःतिनि क्वचाःगु स्थानीय तहया निर्वाचनय् येँ महानगरपालिका वडा ल्याः २५पाखें वडाअध्यक्ष निर्वाचित नीलकाजी शाक्य व वडा नम्बर २७ पाखें वडाअध्यक्षय् निर्वाचित चिनियाँमान बज्राचार्ययात नं बधाई लिसें हंगु खः ।
सम्मानित स्वम्हेसितं गुथिया संस्थापक नायः कृष्णमान तुलाधरं दोसल्लां न्ययेकाः हनादिल सा गुथिया वर्तमान नायः उपेन्द्रकाजी शाक्यं हनापौ लःल्हानादिल ।ज्याझ्वलय् सम्मानित वडाध्यक्षद्वय शाक्य व बज्राचार्यं येँया प्राचीन बजार असंयात आः आधुनिकीकरणपाखे यंकुसें थुकिया पराम्परागत पहिचानयात नं ल्यंका तयेमाःगु धयादिल ।
येँया पर्याय थें हे जुयाच्वंगु थनया प्राचीन वस्ती असंया परम्परागत संस्कृति, सम्पदाया अध्ययन अनुसन्धान यासें थुकिया संरक्षण यायेगु नितिं थःपिं न्ह्याःवनेगु प्रतिवद्धता वडाअध्यक्षद्वय शाक्य ज बज्राचार्यं प्वंकादिल ।
व स्वयां न्ह्यवः असंया थाकुलि १०४दँयाम्ह मोतिकृष्ण तुलाधरं त्वाःदेवाय् मत च्याकाः ज्याझ्वःया औपचारीक उलेज्या यानाद्यूगु खः । ज्याझ्वलय् गुथिया नायः उपेन्द्रकाजी शाक्यं लसकुस यानादिल सा गुथिया छ्यान्जे अमुलकाजी तुलाधरं सुभाय् देछानादिल ।
ज्याझ्वलय् थीथी सांस्कृतिक न्ह्यब्वयाया लिसें कविता वाचन व ख्यालः नं न्ह्यब्वःगु खः । सांस्कृतिक न्ह्यब्वयाया झ्वलय् १५०दँ पुलांगु दाफा भजन, मृदंग भजन, ज्ञानमाला भजन, मोडर्न नेवाः इंगलिस स्कूलया विद्यार्थीपिनिगु हुलाप्याखं, जाय्ज संगीतय् कत्थक हुलाप्याखं नं न्ह्यब्वःगु खः ।
लिसें इमेज च्यानलष लोकंव्हाःगु नेपालभाषाया ज्याझ्वः समयबजि पुचःया ख्यालः, भीम तुलाधर, प्रवेशमान शाक्य लिसेंया लोकं व्हाःपिं म्येहालामिपिनिगु म्ये नं न्ह्यब्वःगु खः ।
स्थानीय भाषा, कला, संस्कृतिया संरक्षणया लिसें स्थानीय न्हूपिं प्रतिभापिनिगु नितिं दबूया विकास यायेगु आज्जुं गुथिं भिन्तुना वसन्त उत्सव ज्याझ्वःया ग्वसाः ग्वया वयाच्वनागु, ज्याझ्वः कजि विद्यासागर तुलाधरं जानकारी बियादिल ।
गुथिं थ्व स्वयां न्ह्यवः नेपाल सम्वत ११२९, ११३०, ११३१ व ११३६य् नं वसन्त उत्सव ज्याझ्वःया ग्वसाः ग्वयेधुंकल । थुकिया लिसें गुथिं दँय्दसं नेपालभाषाया उत्थानय् योगदान ब्यूपिं भाषासेवीपिनिगु किपा कियातःगगु पाँय्म्वः नं पिथना वयाच्वंगु दु ।
