Display Style:
Column Style
यलया ऐतिहासिक कात्ति प्याखं न्ह्यात
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
यलया ऐतिहासिक कात्ति प्याखं थौंनिसें न्ह्याःगु दु ।
थौं कात्ति प्याखंया दक्कले न्हापांगु दिं सूरदास प्याखं क्यंगु दु । थनिं १२न्हुतक्क न्ह्याइगु प्याखंया झ्वलय् कन्हय् धाःसा यलय् बाथः प्याखं दुने कौलाखिचा प्याखं क्यनी ।
कात्ति प्याखंया मू आकर्षण कथं काइगु नरसिंह अवतार प्याखं धाःसा वइगु कछलाथ्व त्रयोदशि (नोभम्बर १२) शन्चरबाःया दिनय् क्यनीगु जूगु दु ।
थगुने नरसिंह अवतार प्याखंया कन्हय् कुन्हु वस्त्रहरण लीला क्यनाः क्वचाःगु प्याखनय् थुगुसी अझ छन्हु अप्वः प्याखं क्यनीगु जूगु दु । थुगुसी वस्त्रहरण लीलाया कन्हय् कुन्हु दधिलीला प्याखं नं क्यनीगु जूगु दु ।
न्हापा न्हापा क्यना वयाच्वंगु दधिलीला प्याखं दथुइ दिनावने धुंकूगु खः । कृष्णं धौ खुयानइगु लीलाया प्याखंयात थुगुसीनिसें हाकनं न्ह्याकेत्यंगु खः ।
जुजु सिद्धिनरिसंह मल्लंं दँयदसंं च्यान्हू ल्हुइका वंंगु प्याखं लिपा सिद्धिनरिसंह मल्लया काय् श्रीनिवास मल्लंं बाथः प्याखं न्हयन्हु तनाः झिंन्यान्हू दयेकूगु खःसा श्रीनिवास मल्लया काय् योगनरेन्द्र मल्लं मेगु थीथी प्याखंत झिंन्यान्हू तनाः लच्छियंकं हुइका थकूगु खः । लिपा वयाः झिन्हुइ लिकुंगु प्याखं थुगुसी धाःसा झिंनिन्हु हुइकूगु जूगु दु ।
थौंनिसें न्ह्याःगु प्याखं वइगु पुन्हिया दिंतक्क न्ह्याइतिनि । प्याखं न्हियान्हिथं यलया मंगः लायकू न्ह्यःने कात्ति दबुलिइ बहनीसिया ७ताः इलंनिसें क्यनेगु न्ह्यथंगु दु ।
भारतीय राष्ट्रपति मुखर्जीया थौं न्हिछि
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
नेपालया स्वन्हुया राजकीय भ्रमणय् दीम्ह भारतीय राष्ट्रपति प्रणव मुखर्जी थौं न्हिच्छि थीथी ज्याझ्वलय् व्यस्त जुल ।
भारतीय राष्ट्रपति मुखर्जीं थौं येँया पशुपतिनाथया दर्शन यानादिल । मुखर्जीं सुथय् जःछि वं १०ताः ईपाखे पशुपतिइ थ्यंकाः दर्शन यानादीगु खः । वय्कलं वासुकीया पूजा यानाः पशुपतिइ विशेष पूजा आराधना यानादिल ।
राष्ट्रपति मुखर्जीं करिब ४५ मिनेट बिकाः पशुपतिनाथया पूजा आराधना यानादिल । व धुंकाः वय्कलं पशुपति क्षेत्र विकास कोषया अधिकारीतलिसे छुं ई खँल्हाबल्हा नं यानादिल ।
राष्ट्रपति मुखर्जीं पशुपतिइ लाखबत्ती व पञ्चामृत अभिषेकलिसेंया विशेष पूजा यानादीगु पशुपति क्षेत्र विकास कोषं न्ह्यथंगु दु ।
पशुपतिया पश्चिम मूध्वाखां भारतीय राष्ट्रपति मुखर्जी दुहां झायेधुंकाः नेपाल वेद विद्याश्रमया १०८ वटुकं वय्कःयात लसकुस यासें विशेष स्वस्ति वाचन याःगु खः । वय्कःयात लसकुस यायेत धिमय् बाजं, पञ्चेबाजं लिसेंया बाजंगाजं अले मौलिक धुन न्ह्यब्वःगु कोषं न्ह्यथंगु दु ।
येँ महानगरपालिकां ताःचा लःल्हात
येँ महानगरपालिकां भारतीय राष्ट्रपति मुखर्जीयात नागरिक अभिनन्दन याःगु दु ।
थौं सनिलय् राष्ट्रिय सभागृहस ग्वसाः ग्वःगु विशेष समारोहस महानगरपालिकां अभिनन्दन याःगु खः । उगु इलय् महानगरपालिकाया कार्यकारी अधिकृत रुद्रसिंह तामाङ्गं मुखर्जीयात महानगरया ताःचाः लःल्हायेगुया लिसें अभिनन्दन पौ लःल्हानाः हनादिल ।
लिसें सिँया कलात्मक झ्याः व मञ्जुश्रीया मूर्ति नं लःल्हात ।
अभिनन्दन समारोहयात सम्बोधन यासें भारतीय राष्ट्रपति मुखर्जीं ऐतिहासिक व पवित्र शहर येँया भ्रमण यायेखनाः थः तसकं लयताःगु धयादिल । येँ राजनीतिक केन्द्र जक मखसें छगू आध्यामिक शहर तकं खःगु वय्कःया बिचाः खः ।
समारोहस प्रधानमन्त्री पुष्पकमल दाहाल, परराष्ट्रमन्त्री प्रकाश शरण महत, पर्यटन मन्त्री जीवनबहादुर शाही लिसेंया ब्वति दुगु खः ।
काठमाडौं विश्वविद्यालयपाखें मानार्थ विद्यावारीधि लःल्हात
नेपाल भ्रमणय् दीम्ह भारतया राष्ट्रपति प्रणव मुखर्जीयात थौं काठमाडौं विश्वविद्यालयं मानार्थ विद्यावारिधिया उपाधी लःल्हाःगु दु ।
विश्वविद्यालयं राजधानीया भद्रकालीस्थित आर्मी अफिसर्स क्लवय् विशेष दीक्षान्त समारोहया ग्वसाः ग्वयाः मुखर्जीयात विद्यावारिधिया उपाधी ब्यूगु खः । विश्वविद्यालयया कुलपति तकं खःम्ह प्रधानमन्त्री पुष्पकमल दाहालं वयकःयात मानार्थ विद्यावारिधि लःल्हानादीगु खः ।
काठमाडौं विश्वविद्यालयपाखें मानार्थ विद्यावारिधि चूलाःम्ह भारतीय राष्ट्रपति मुखर्जी स्वम्हम्ह मनू खः । थ्वयां न्ह्यः विश्वविद्यालयं संस्कृतिविद् सत्यमोहन जोशी व भारतीय बुद्धिजीवि करण सिंहयात मानार्थ विद्यावारिधिया उपाधी बीधुंकूगु दु ।
ज्याझ्वलय् शिक्षामन्त्री धनीराम पौडेल, सरकारया मेपिं मन्त्रीपिं, शिक्षा ख्यःलिसे सम्बन्धित उच्च पदस्थ मनूतयगु ब्वति दुगु खः ।
छठया तयारी न्ह्यात
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
नेपाःमिपिनिगु तःजिगु नखः स्वन्ति क्वचायाकथं न्ह्याइगु छठ पर्वया तयारी न्ह्याःगु दु ।
छठ पर्वया लागिं धकाः राजधानीया पुखूत यचुपिचुकेगु ज्या न्ह्याःगु खः । छठ पुजा समारोह समितीं यचुपिचुया ज्या न्ह्याकूगु खः ।
राजधानीया कमलपुखू, तिसापुखू लिसेंया पुखुलिइ छठ पूजाया ग्वसाः ग्वइ । न्हापा न्हापा येँय् न्हुपुखुलिइ छठया पुजा याना वयाच्वंगुलइ न्हुपुखुलिइ भुखाचं क्षति याःगुलिं थुगुसी मेमेगु पुखुलिइ छठ पूजाया तयारी याःगु खः ।
छठ पर्व वइगु आईतबाः लाःगु दु ।
छठया नितिं तराइ झःझः धायेकल
तराइ लागाय् नं छठया चहलपहल न्ह्याःगु दु ।
प्यन्हुतक्क हनीगु छठ तराइ लागाय् कन्हयनिसें न्ह्यायेत्यंगु खः । धनुषा, महोत्तरी, सिरहा, सप्तरी, बारा, पर्सा, रौतहटलिसेंया पूर्वी तराईया जिल्लाय् छठया चहलपहल न्ह्याःगु खः ।
जनकपुरया गंगा सागर, अरगजा सर, धनुष सागर, रुक्मिणी सर, दशरथ तलाउलिसेंया दर्जनौं पुखू छायेपीगु ज्या न्ह्याःगु दु । भारतीय राष्ट्रपति प्रणव मुखर्जी जनकपुर झाइगु जूगुलिसें थुगुसी जनकपुरय् विशेष यचुपिचु याःगु दु ।
पारिवारिक सुख, शान्ति, कल्याण, ल्वचं मुक्ति अले थीथी मनंतुना पूवनेमा धइगु आज्जुं सुद्र्यःया उपासना यानाः थुगु नखः हनेगु याइ । महाभारतया कथं द्रौपतिलिसें पाण्डवतय्सं अज्ञातवासय् च्वंबलय् उगु गुप्तबास ताःलायेमा धकाः सुद्र्यःया आराधना याःगु व व हे इलंनिसें छठ हनेगु परम्परा न्ह्याःगु धापू दु ।
तराईया बजारय् छठया ज्वलं न्यायेत आः सर्वसाधारणत म्वःम्वः मुंगु दु ।
चारुमति बुद्धविहारय् कथिन चीवर दान
लहनान्यूज सम्वाददाता | कछलाथ्व चौथि ११३७ (नोभम्बर ३ २०१६)
भिक्षु तपस्सी धम्म व समित भन्तें चारुमती बुद्ध विहारय् स्वलाया वर्षावास क्वचायेकूगु अवसरय् थौं कथिन चीवर दान महोत्सव क्वचाःगु दु ।
चारुमती बुद्धिस्ट मिसन नेपाल चाबहीया ग्वसालय् याःगु महोत्सवय् थाइल्याण्डया धम्मकाय व वल्र्ड फेलोसिप अफ बुद्धिष्ट युथया नायः डा. पोर्नचाइ पिनयापोंगं कथिन चीवर व अष्ट परिस्कार दान याःगु खः ।
महोत्सवय् स्वास्थ्यमन्त्रि गगन थापां भगवान बुद्धया उपदेशयात सकसिनं आत्मसात यायेमाःगु धयादिल ।
ज्याझ्वलय् थाइल्यान्डं हःगु भगवान बुद्धया अस्थिधातु चारुमति बुद्ध विहारय् प्रतिस्थापन याःगु खः । अस्थिधातु दँयदसं स्वांया पुन्हिकुन्हु सार्वजनिक यायेगु न्ह्यथंगु दु ।
ज्याझ्वःया मेपिं वक्तातय्सं चारुमती स्तुपायात विश्व सम्पदा धलखय् दुथ्याकेत माग याःगु खः ।
अमेरीकाय् नं न्हूदँ तःजिक न्यायेकल
अमेरीकां नरेश शाक्यपाखें | कछलाथ्व चौथि ११३७ (नोभम्बर ३ २०१६)
न्हूदँ नेपाल संवत ११३७या लसता अमेरीकाय् च्वनाच्वंपिं नेवाःतयसं तःजिक न्यायेकूगु दु ।
न्हूदँया हे दिं कछलाथ्व पारुकुन्हु नेवाः नखः न्यूयोर्कया ग्वसालय् न्यूयोर्क शहरया एम्हर्सत धइगु थासय म्हपूजा व न्हूदँ तःजिक न्यायेकूगु खः । ज्याझ्वलय् सच्छिम्हं मल्याक्क नेवाःत व थीथी नेपाली पुचःया प्रतिनिधितलिसें विदेशीतयसं तकं ब्वति कागु खः ।
उगु हे ज्याझ्वलय् नेवाः नखः न्युयोर्कया न्ह्यब्वया कथं नेपाल संवत ११३७या क्यालेन्डर न पितब्वज्या याःगु खः ।क्यालेन्डरया उलेज्या ज्याझ्वःया मूपाहाँ न्यूयोर्कय च्वंगु नेपाली महावाणिज्यदूतावासया वाणिज्यदूत कृसु क्षेत्रीं यानादीगु खः ।
म्हपुजा ज्याझ्वःया लिसें नेपाल व नेपाली समुदायया निम्ति महत्वपुर्ण योगदान व ज्या यानादीपिं नेपाली व गैरनेपालीपिन्त नं हंगु खः । ज्याझ्वलय् जोली अमात्य, कञ्चन अमात्य, अलेक्जेण्डर गर्गिल, शेरी ओना हाडलिन, नातासा ओजनाइक, लुना रञ्जित, सन्जिता प्रधान, एलेन कून व नखःया पुलांम्ह नायः बिरेन्द्र प्रधानयात हंगु ख ।
नेवाः नखः न्यूयोर्कया नायः राजा शाक्यं म्हपूजाय् ब्वति काःपिन्त लसकुस यानादिलसा संस्थाया न्वकू विष्णुमान प्रधानं सुभाय् देछानादिल ।
पुजाविधि धाःसा अजय छोचूंनं न्ह्याकादीगु खः ।
