Display Style:
Column Style
नेवाः मिसा दबू गठन
लहनान्यूज सम्वाददाता | कछलाथ्व षष्ठी ११३७ (नोभम्बर ६ २०१६)
नेृवाः देय् दबूया विषयगत संगठन कथं ‘नेवाः मिसा दबू’ गठन जूगु दु ।
थौं येँय् दबूया प्रारम्भिक अधिवेशन यासें रश्मिला प्रजापतिया अध्यक्षताय् मिसा दबू गठन याःगु खः । थौं क्वचाःगु अधिवेशनं ३३ दुजःया केन्द्रिय समिति नं ल्यःगु दु ।
पारिवारीक व सांस्कृतिक ज्याखँय् जक तक्यनाच्वंपिं नेवाः मिसातय् दथुइ नेतृत्वदायी भुमिका दयेकेगु आज्जुलिसें दबू गठन जूगु न्ह्यथंगु दु ।
राष्ट्रिय व अन्तराष्ट्रिय रूपं नेवाः मिसातयत एकिकृत यासें नेतृत्व विकास यानावनेगु आज्जु दुगु दबूया नकिं प्रजापतिं धयादीगु दु । लिसें नेवाः मिसातयगु आर्थिक, सामाजिक व राजनैतिक सशक्तिकरण दबूया तातुनां खःगु प्रजापतिया धापू खः ।
अधिवेशनं केन्द्रिय समितिपाखें प्रदेश समिति व जिल्ला समिति गठन यानाः खुलाया दुने राष्ट्रिय अधिवेशन यायेगु क्वःछित ।
नेदरलायन्दय् न्हूदँ व म्हपूजा ज्याझ्वः
लहनान्यूज सम्वाददाता | कछलाथ्व पंचमि ११३७ (नोभम्बर ५ २०१६)
न्हूदँ नेपाल संबत ११३७या लसताय् वल्र्ड नेवाः अर्गनाइजेशन नेदरलायन्ड च्याप्टरं नेपाल मंकाः म्हपूजालिसें भिंतुना कालबिल ज्याझ्वः याःगु दु ।
मंकाः म्हपुजा ज्याझ्वलय् आमस्तरदम, रोटरदम, दहेग, उतरेख्त, लाइदनया लिसें नेदरलायन्डया थीथी थासं नेवाःतलिसें मेमेगु जातिया नेपाःमिपिनिगु नं ब्वति दुगु खः ।
नितु श्रेष्ठ व अणु श्रेष्ठया ग्वाहालिइ श्रीलक्ष्मी श्रेष्ठं सकसितं म्हपुजा यानादिल । च्याप्टरया दुजःपिं सुदर्शन बज्राचार्य, बिरेन्द्र श्रेष्ठ, बिनोद श्रेष्ठ, झलक श्रेष्ठ, सुरेश श्रेष्ठ, जितेन्द्र श्रेष्ठ, कृष्णहरि महर्जन, नितु श्रेष्ठ व श्रीलक्ष्मी श्रेष्ठया संयोजनय् ज्याझ्वः जूगु खः ।
ज्याझ्वः न्ह्याके न्ह्यः वल्र्ड नेवाः अर्गनाइजेशनया संस्थापक नायः व सल्लाहकार डाक्टर बालगोपाल श्रेष्ठं नेपाल संबत व म्हपूजाया महत्वया बारे नवानादीगु खः । म्हपुजा क्वचायेकाः गंगा नेमकुलं दयेकादीगु संकिपा टेम्पो चालकया क्यने ज्या नं जूगु खः ।
ने.सं. ११३३स शरद जोशीया कजिसुइ नेदरलायन्ड च्याप्टरया गठन धुंकाः वंगु ने.सं. ११३४निसें थुगु संस्था मदिक्क मंकाः म्हपूजा ज्याझ्वः यानावयाच्वंगु दु ।
ज्यापु दिवसया लसताय् प्रशिक्षण ज्याझ्वः
लहनान्यूज सम्वाददाता | कछलाथ्व पंचमि ११३७ (नोभम्बर ५ २०१६)
ओन्दे ल्याय्म्ह पुचःया ग्वसालय् थौं नेवाः तजिलजि कथं पुजा तयेगु, पुजाया बिधिलिसें वः, चतांमरि यःमरि दयेकेगु, लप्ते, ब्वःता सुयेगु स्यनेज्या जूगु दु ।
स्यनेज्याय् बाबुराजा बज्राचार्यं पुजा बिधि स्यनादीगु खःसा वः, चतांमरि यःमरि दयेकेगु व लप्ते, ब्वःता सुयेगु ओन्दे लिधंसा मिसा पुचलं स्यंगु खः । स्यनेज्याय् ८८म्ह प्रशिक्षार्थीपिनिगु ब्वति दुगु खः ।
१३क्वःगु ज्यापु दिवसया लसताय् ज्याझ्वःया ग्वसाः ग्वःगु खः । स्यनेज्या क्वचायेकाः मू पाहां तीर्थराम डंगोलं प्रशिक्षार्थीपिन्त दसिपौ लःल्हानादिल ।
स्यनेज्याया समापन ज्याझ्वलय् श्रीज्यापू महागुुथि नेपाःया सन्तु महर्जन, ज्यापू महागुथि येँ महानगर समितिया नायः बाबुराजा महर्जन, ज्यापु सांस्कृतिक बिकास कोषया निमित नायः मंगलकृष्ण सिंह, १३क्वःगु ज्यापु दिवस समारोह समितिया नायः राम महर्जन, नारायण परिवार क्लवया नायः प्रचण्डमान बज्राचार्य व ओन्दे ल्यायम्ह पुचःया नायः अमिना प्रजापतिया उपस्थिती दुगु खः ।
साहित्य व संगीतया लकसय् भिन्तुना
लहनान्यूज सम्वाददाता | कछलाथ्व पंचमी ११३७ (नोभम्बर ५ २०१६)
न्हूदँ नेपाल सम्वत ११३७ या लसताय् बिराट नेपालभाषा साहित्य सम्मेलन गुथिं भिंतुना कालबिल ज्याझ्वः याःगु दु ।
न्हूदँया लसताय् विराट गुथिं थिमिइ ‘संगीतया सलय् साहित्यया जलय्’ लिसें तुच्चा ज्याझ्वः याःगु खः ।
गुथिया नायः साहित्यकार कृष्णभक्त बोडेया सभानायकय् जूगु ज्याझ्वलय् साहित्यकार व संगीतकःमिपिनिगु ब्वति दुगु खः ।
ज्याझ्वलय् न्हूदँया भिन्तुना देछासें साहित्यकारपिन्सं थःथःगु कृति बाचन नं याःगु खः । अथे हे कलाकारपिन्सं थःगु म्ये हालाः न्यंकूगु खः ।
ब्वतिमिपिन्सं साहित्य व संगीतया लकसय् भिन्तुना कालबिल यानाः न्ह्यइपुकूगु खः ।
बोस्टनय् नं म्हपुजा
बोस्टनं कुमार सिन्दुराकारपाखें | कछलाथ्व पंचमि ११३७ (नोभम्बर ४ २०१६)
अमेरीकाया बोस्टन शहरय् नं म्हपुजा झःझः धायेक याःगु दु ।
अमेरीकाया बोस्टन शहरय् न्यू इङलायन्ड (Six States) यात प्रतिनिधित्व याना वयाच्वंगु संस्था नेवाः अर्गनाइजेसन अफ अमेरीका न्यू इङलायन्ड च्याप्टरया ग्वसालय् प्यक्वःगु म्हपुजा यायेगुया लिसें न्हूदँ नेपाल सम्वत ११३७ झःझः धायेक हंगु खः ।
म्हपुजाय् बोस्टनय् लिसें लिक्क लिक्क च्वनाच्वंपिं नेवाःतयगु तःधंगु ल्याखय् ब्वति दुगु खः । पराम्परागत मन्दः दयेकाः धौसिन्हः, ख्येँयसगं, सिसगं बियाः पूवंक हे नेवाः तजिलजि कथं बोस्टनय् म्हपुजा याःगु खः ।
वंगु प्यदँ न्ह्यःनिसें याना वयाच्वंगु म्हपुजाय् आकर्षण कथं दँयदसं न्हून्हूगु ब्वसा ज्वलं तयेगु यानाच्वंगु दु । उकिया झ्वलय् थुगुसी धाःसा तपाःगु मन्दः दयेकातःगु खः, गुकीयात आपाःसिनं ययेकूगु खनेदत ।
प्यदँ न्ह्यः स्थापना जूगु अर्गनाइजेसनं अमेरीकाया बोस्टन शहरय् अन च्वनाच्वंपिं नेवाःतयत मुंकाः थीथी ज्याझ्वःत याना वयाच्वंगु दु । थ्व हे झ्वलय् वंगु येँयाःया इलय् येँयाः पुन्हि नं हंगु खः ।
उगु इलय् कुमारी, लाखय्, पुलुकिसिलिसें थीथी बाजं लिसें येँयाः हंगु खः । हलिं नेवाः दबूया केन्द्रिय नायः सिजन श्रेष्ठया मू पाहांसुइ, अमेरीकाया नेवाः पुरोहित बासब राजोपाध्यायं ज्यापौ न्ह्यब्वसें छगू गोष्ठी नं याःगु खः ।
