राहत इनेगु एकद्वार प्रणाली यायेत निर्देशन
लहनान्युज | चौलाथ्व एकादशी ११४०, २२
कोरोनापाखे प्रभावित जुपि निजी तथा सरकारी संघसस्थां थः यः थे राहत बिइ मदइगु जुगु दु ।
संघीय मामिला तथा सामान्य प्रशासन मन्त्रालयं दक्को हे स्थानीय तहयात परिपत्र छ्वया राहत वितरण एकद्वार प्रणाली अवलम्बन यायेत निर्देशन बिःगु दु ।
कारोनाया सम्भावित संक्रमणया कारण प्रतिकूल इलय् सरकारं लकडाउन घोषणा याःगु खः । थुगु इलय् न्हिथं ज्यायाइपिन्त नयेगु समस्या जुगु दु ।
खास याना असंगठित क्षेत्रय् ज्यायाइपि श्रमिक वर्ग, विपन्न तथा असहायपिन्त नयेगु लागि स्थानीय तहपाखे राहत उपलब्ध बिइगु ज्या सुरु जुगु दु ।
थुगु इलय् थीथी मनूत, संघसंस्था, सरकारी तथा गैरसरकारी निकायपाखे उपलब्ध याये त्यःगु राहत स्थानीय तहय् जम्मा याना व एकद्वार प्रणालीपाखे जक बिइगु व्यवस्था यायेत मन्त्रालयं स्थानीय तहयात निर्देशन बिःगु खः ।
स्थानीय तह नं बिइगु राहतय् न्हि न्हि विवरण मन्त्रालयय् छ्वय् माःगु ब्यवस्था याःगु दु । सरकारं कोरोना नियन्त्रण तथा उपचार कोषय् तक एकद्वार दयेकेगु निर्णय याःगु खः ।
आ कोरोना नियन्त्रण तथा उपचारया नामय् मेगु कोष दयेके दइ मखु । सरकारं दयकिगु कोषय् हे दक्को ध्यवा जम्मा याये माःगु निर्णय सरकारं याःगु खः । उठे जुइ धुकुगु ध्यवा उगु कोषय् हयेमाःगु प्रावधान दु ।
