राहत मखसें रोजगार बीगु नीतिइ नगरपालिका फोरम
बिराजकाजी राजोपाध्याय | बछलागा तृतीया ११४०,बैसाख २८ गते
उपत्यका नगरपालिका फोरमं आः राहत बीगु मयासें दक्ष जनशक्तियात लजगाः बीगु निर्णय याःगु दु ।
संघीय सरकारं न्ह्याकातःगु लकडाउनयात पालना यासें सक्षम जनशक्तियात श्रम व लजगाःलिसें स्वानाः अर्थतन्त्रयात चलायमान दयेकेगु निर्णय नगरपालिका फोरमं याःगु खः ।
स्वनिगः दुनेया निगू महानगर व १६ नगरपालिकाया मेयर–उपमेयरतय् मंकाः संगठन उपत्यका नगरपालिका फोरमया बैठकं थथे निर्णय याःगु खः ।
‘संघीय सरकारं लकडाउन छुं छ्वासुकेगु निर्णय याःगु अवस्थाय् न्हापा थें राहत बीमाःगु अवस्था दइमखु’ कामपा प्रमुख शाक्यं धयादिल । ‘अथेसां भुथू हे मच्याइगु अवस्था दुसा जिपिं ग्वाहालि यायेत तयार दु ।
प्रमुख शाक्यं अत्यावश्यक उद्योगत न्ह्याकेत सहजीकरण यासें लकडाउन पालना यायेगु याकेगु निर्णय नं बैठकय् जूगु जानकारी बियादिल ।
आगमनयात व्यवस्थित यासें संक्रमण रोकथाम व नियन्त्रणया लागिं स्वनिगः दुहांवयेगु नाकाय् वयेधुंकाः जक पनेगु मयासें गनं वःगु खः अन हे वयेवने याकेमबीगु व्यवस्था ताःलाकेत संघीय सरकारयात इनाप यायेगु निर्णय नं वैठकय् जूगु दु ।
मजिमगाःगु ज्याया लागिं स्वनिगः दुहां वयेमाःगु बाध्यता हे खःसा अनुमति कयाः जक दुहां वयेदइगु व्यवस्था यायेत नं इनाप यायेगु निर्णय वैठकं याःगु दु ।
छुं दिं न्ह्यः तिनि नगरपालिका फोरमया पदाधिकारीं कोभिड–१९ सम्बन्धी उच्चस्तरीय समन्वय समितिया कजि तकं खःम्ह उपप्रधान अले रक्षामन्त्री ईश्वर पोखरेलयात नापलानाः स्वनिगलय् निर्वाध वयेवनेयात कडाई यानाः स्वनिगलय् लकडाउन छुं छ्वासुकेमाःगु माग याःगु खः ।
‘वयेवनेगुलिइ कडाई यायेगु व निश्चित क्षेत्र दुने सामाजिक दूरी तयाः आर्थिक ज्याखँ चलायमान यानातयेगु खःसा संक्रमणं नं तापायेफइ, भविष्यय् जुइफुगु आर्थिक संकटयात नं छुं हदतक्क क्वपालेफइ’ शाक्यया धापू खः ।
मध्यपुर ठिमी नगरपालिकाया प्रमुख अले नगरपालिका फोरमया सचिव मदनसुन्दर श्रेष्ठं बैठकय् संक्रमणया खँय् शंकास्पद मनूत तयेत क्वारेन्टाइनया व्यवस्थापन यायेत संघीय सरकारयात इनाप यायेगु निर्णय जूगु जानकारी बियादिल ।
‘वइगु दिनय् विदेशं तःधंगु ल्याखय् नेपाली नागरिकतयत उद्धार यानाः थन हयेमालेफु । अज्याःगु अवस्थाय् स्थानीय तगिमं थःथःगु पहलं क्वारेण्टाइन दयेकेबलय् आपाः खर्च जुइ’ श्रेष्ठं धयादिल । ‘स्वनिगलय् क्वारेण्टाइनया व्यवस्थापन संघीय सरकारं यायेगु व उकिया लागिं माःगु ग्वाहालि स्थानीय तगिमं यायेगु निर्णय बैठकं याःगु दु ।’
फोरमं थ्वयां न्ह्यः हे छगू प्रदेशं मेगु प्रदेश, छगू जिल्लां मेगु जिल्ला व छगू स्थानीय तगिमं मेगु स्थानीय तगिमय् निर्वाध रुपं वयेवने यायेबलय् संक्रमणया खतरा अप्वइगु धासें अथे मयायेत इनाप याःगु खः ।
Categorized in राष्ट्रिय
