रुसी टेनिस कासामि ड्यानियल मेद्बेदेभ सेमिफाइनलय्
ञंलाथ्व द्धितीया ११४१, भाद्र २३ बुधवाः
रुसी टेनिस कासामि ड्यानियल मेद्बेदेभ युएस ओपनया सेमिफाइनलय् थ्यंगु दु । क्वाटरफाइनलय् नेदरल्याण्ड्सया कासामि बोटिक भान डे ज्याण्डस्लपयात बुका निगूगु वरियतायाम्ह मेद्बेदेभ सेमिफाईनलय् थ्यंगु खः ।
डच कासामि विरुद्धया कासा मेद्बेदेभं ६गू–३गू, ६गू–०, ४गू–६गू व ७गू–५गूया सेटय् त्याकुगु खः । मेद्बेदेभं आः फाइनल कासाया नितिं क्यानाडाया कासामि फेलिक्स औगरलिसे म्हितिइ । क्वाटरफाईनलय् स्पेनिस प्रतिद्धन्दी कार्लोस अल्कारेज निगूगु सेटय् रिटायर जुइधुंका फेलिक्स सेमिफाईनलय् थ्यंगु खः ।
उखे मिसापाखे क्यानडाया टिनएजर लेला फर्नान्डेज सेमिफाईनलय् थ्यंगु दु । क्वाटरफाईनलय् ५गूगु वरियताया एलिना भितोलिनायात ६गू–३गू, ३गू–६गू व ७गू–६गू ल्याःखं बुका फर्नान्डेज लिपांगु ४गूलिइ थ्यंगु खः ।
फर्नान्डेज न्हापांखुसिइ छुं नं ग्रान्ड स्लाम टेनिसया सेमिफाइनलय् थ्यनेत ताःलाःगु खः । फर्नान्डेजं आः सेमिफाईनलय् बेलारुसया एरिना साबालेन्कालिसे म्हितिइ ।
Categorized in कासा