रेजिना न्हापांम्ह ‘मिसेस् नेवाः २०१७’
नृपेन्द्रलाल श्रेष्ठ | दिल्लागा चतुर्दशी ११३७ (जुलाई २२ २०१७)
नेपालय् ब्यूटी प्याजेण्टया इतिहास स्वय्गु खःसा उलि पुलां मजूनि । थ्वया दथुइ मिस नेपालया नापनापं नेपाःया थीथी जातिदुने नं थुकथंया ब्यूटी प्याजेण्टया धेंधेंबल्ला जुयाच्वयाच्वंगु खनेदु । अझ जाति दुने जक मखु, क्षेत्र, थीथी पेशागतकथं नं थजाःगु कासा जुयावयाच्वंगु दु ।
थ्वहे झ्वलय् मिस नेवाः न्ह्याय्धुंकाः थुकथंया थीथी विधाय् धेंधेंबल्ला याय्गु कासा न्ह्याःगु खःसा वंगु शुक्रवाः नेवाः ख्यलय् ‘मिसेस् नेवाः २०१७’ जुल ।
नेपालभाषा ख्यलय् दक्कलय् न्हापांगु ज्याझ्वःकथं जूगु ‘मिसेस् नेवाःया उपाधि रेजिना शाक्यं त्याकादीगु दु । येँया राष्ट्रिय नाचघरय् जूगु उगु ज्याझ्वलय् ल्यू ग्रीष्मा तुलाधर व लियांल्यू सरीता नेम्कुल प्रधान जुयादीगु दु ।
उगु कासाय् थीथी विधा मध्ये बेस्ट स्माईल शिला पुजारी, बेस्ट नेपालभाषा गंगा महर्जन अवाले, बेस्ट हेयर सरिता नेमकुल प्रधान, बेस्ट क्याटवाक एलिसा शाक्य, फोटोजेनिक रमिता बज्राचार्य, कल्चरल एम्बेसडर मुदिता तुलाधर, बेस्ट फिजिक इन्दिरा महर्जन, बेस्ट ट्यालेन्ट सम्झना थुसा, बेस्ट पर्सनेलिटि नानीछोरी महर्जन (नेन्सी), पिपल्स च्वाईस अर्वाड सरिता महर्जन व बेस्ट फ्रेण्डशीप ग्रीष्मा तुलाधर जुयादीगु खः ।
ईहिपाः जुइधुंकूपिं मय्जुपिं दथुइ बांलाःम्ह मय्जुकथं ल्यःगु उगु ज्याझ्वलय् मुक्कं १४म्ह मय्जुपिन्सं ब्वति कयादीगु खःसा सिरपाः त्याकादीपिं नापं ब्वति कयादीपिं मय्जुपिन्त ख्यालि जुजु मदनकृष्ण श्रेष्ठं ताजनापं दसिपौ लःल्हानादीगु खः ।
म्हसिका एजुकेशन एण्ड इन्टरटेन्मेन्टया व्यवस्थापनय् के.टि.एम मिडिया इभेन्टस् ग्वसालय् जूगु न्हापांगु मिसेस् नेवाः धेंधेंबल्लाया निर्णायक मण्डलय् प्रेमलाल महर्जन, दीपक तुलाधर, डा. चुन्दा बज्राचार्य, प्रदीप खड्गी, सुरेश प्रधान, डा. अन्जान शाक्य व दर्शनवीर शाक्य च्वनादीगु खः ।
ज्याझ्वलय् राजेश मर्हजन, सानुबाबु मर्हजन, सुरजबीर बज्राचार्य, सुरज ब्यञ्जनकारं म्ये हालादीगु खःसा सजेना चित्रकार चित्रकार, प्रलिसा शाक्य, स्वजन रधुवंशी आदि कलाकारपिन्सं हुलाप्याखं न्ह्यब्वयादीगु खः ।
