सीके राउत नेतृत्वया जनमत पार्टीं गौर नरसंहारया भाला जनता समाजवादी पार्टीं काःगु धका दोषीतयेत कारवाही यायेत माग याःगु दु ।

भौतिक पूर्वाधार मन्त्री तकं दीम्ह रेणु यादवं म्हिगः जनमत पार्टी विरुद्ध मेगु गौर घटना याकेगु ख्याच्वः बिउगु खँ न्ह्यथसें उगु जनमत पार्टीं नरसंहारया ख्याच्वः बिउम्ह मन्त्री यादवयात बर्खास्त याना कारवाही यायेत माग खः ।

उगु पार्टीया न्वकू दिपक कुमार साहं म्हिगः चान्हय् प्रेस विज्ञप्ति जारी याना चरम आपराधिक अभिव्यक्ति बिउम्ह मन्त्री यादवयात बर्खास्त याना २०६४ सालया गौर नरसंहारय् दुथ्यापिन्त थथें ज्वनेत माग याःगु खः ।

अपराधिक अभिव्यक्ति बिइगु, हत्या हिंसा न्यंकेत स्वइम्ह व नरसंहारया षडयन्त्र याःम्ह मन्त्रीयात थथें बर्खास्त याना सरकारं कारवाही यायेमागु वक्तब्यय् धयातःगु दु ।

गौर घटनाया अभियुक्ततयेत सुरक्षाकर्मीं विशिष्ट सुरक्षा घेराय् तःगु धका उगु पार्टीं उमित थथें ज्वना कारवाही यायेत व पीडिततयेत न्याय बिउगु जक मधेशय् आपराधिक राज क्वचाइगु धाःगु दु ।

सीके राउत नेतृत्वया जनमत पार्टीया ज्यासनामिं थःपिन्त हाकुगु ध्वाँय् क्यंगु धका मन्त्री यादवं गौरय् ग्वसाःग्वःगु ज्याझ्वलय् मेगु गौर नरसंहार याकेगु ख्याच्वः बिउगु खः ।

Categorized in राष्ट्रिय