रोनाल्डों इटालियन सिरी ’ए’ फुटबलया गोल्डेन बुट अवार्ड त्याकल
कछलाथ्व त्रयोदशी ११४१,जेष्ठ १० सोमवाः
युभेन्ट्सया पोर्चुगिज फरवार्ड क्रिस्टियानो रोनाल्डों इटालियन सिरी ’ए’ फुटबलया गोल्डेन बुट अवार्ड त्याकूगु दु ।
सिरी ’ए’ फुटबलय् थुगुसीया सिजनय् सर्वाधिक गोलकर्ता जुसें रोनाल्डों गोल्डेन बुट अवार्ड त्याकेत ताः लाःगु खः । रोनाल्डों च्याम्पियन टिम इन्टर मिलानया रोमेलु लुकाकुयात ल्यूने लाका गोल्डेन बुट अवार्ड त्याकूगु खः ।
रोनाल्डों थ्व सिजनया ३३गू कासाय् २९गू गोल यात । वय्कलं स्वंगू असिस्ट तकं यात । लुकाकुं ३६गू कासां २४ गोल यात । थ्वलिसें रोनाल्डों युरोपया शीर्ष स्वंगु लिगय् गोल्डेन बुट अवार्ड त्याका न्हापांम्ह त्याकुमिया कीर्तिमान दयेकूगु दु ।
थुखे टोटनह्याम हट्सपया फरवार्ड ह्यारी केनं इंग्लिस प्रिमियर लिगय् निगूगु उपाधि त्याकेत ताःलाःगु दु । लिगया लिपांगु कासाय् लेस्टरविरुद्ध गोल व असिस्ट याना केनं प्रिमियर लिगया सर्वाधिक गोलकर्ता व सर्वाधिक असिस्टया उत्कृष्ट प्लेमेकरया उपाधि तक्कं त्याकूगु दु ।
आइतबाः टोटनह्यामं लेस्टरयात ४–२ गोलं बुकुसें केनं छगोल व छगू बिउगु खः । केनं न्ह्यानाच्वंगु सिजनय् २३गू गोल यासें दकले अप्वः गोलकर्ताया उपाधि त्याकूगु खः ।
