रोनाल्डो म्यानयू हे लिहाँवल
गुंलागा षष्ठी ११४१, भाद्र १२ सनिवाः
क्रिस्टियानो रोनाल्डो म्यानचेस्टर युनाईटेड क्लबय् लिहाँवइगु पक्का जूगु दु । युनाईटेडं क्लबया लिजेण्ड कासामि रोनाल्डो ओल्ड ट्राफोर्ड लितहयेगु विषयलय् सहमति जूगु जानकारी ब्यूगु दु ।
युनाईटेडं रोनाल्डोयात क्लबय् लितहयेगु विषयलय् युभेन्टसलिस सहमति याःगु खः । युनाईटेडं रोनाल्डोलिसे निदँतकया सम्झौता याइगु धागु दु । युनाईटेडया शहरी प्रतिद्वन्द्वी म्यान्चेष्टर सिटीं तकं रोनाल्डो अनुबन्ध यायेत इच्छा क्यंगु खः ।
युनाईटेडं इच्छा क्यंगुनाप सिटी लिच्यूगु खः । युनाईटेडया प्रशिक्षक ओले गुनर सोल्सायरं पोर्चुगिज सहकर्मी ब्रुनो फर्नान्डेजं रोनाल्डोया भविष्यया विषयलय् खँल्हाबल्हा यानाच्वनागु धयादीगु खः । युनाईटेडं रोनाल्डोयात पोर्चुगलया स्पोर्टिङ लिस्वोनपाखें ईङ्ल्याण्ड हःगु खः ।
रोनाल्डों थ्वसिवे न्ह्यः युनाईटेडय् ६गू सिजन म्हितेधुंकूगु दु । उगु ईलय् वय्कलं स्वंगू प्रिमियर लिग, छगू च्याम्पियन्स लिग, निगू लिग कप अले छगू एफए कप त्याकूगु खः । वय्कलं युनाईटेडया नितिं फिफा क्लब, विश्वकपनिसें कम्युनिटी सिल्ड तकं चूलाकूगु दु ।
न्याक्व तक वालेन डी ओर त्याकूम्ह रोनाल्डों थःगु करियरय् ३०गू मूमू उपाधि त्याकेधुंकूगु दु । वय्कलं इङ्ल्याण्ड, स्पेन व ईटालीपाखें न्यागू युईएफए च्याम्पियन्स लिगनाप प्यंगू फिफा क्लब, विश्वकप अले ७गू लिग त्याकेधुंकूगु दु ।
वय्कलं देय्या नितिं युरो कप तकं त्याकूगु दु । रोनाल्डों २सः व ९२गू कासापाखें सछि व १८गोल याःगु धलः दु । वय्क तत्कालिन ईलय् कीर्तिमानी कासामिया कथं स्पेनिस क्लब रियल मड्रिड वंगु खः ।
Categorized in कासा
