लकडाउनया इलय् सरकारी गाडीं हे मलङ्गवां मनूत येँय् हल
विकाश | बछलाथ्व चतुर्दशी ११४०,बैसाख २२ गते
सरकारं स्वनिगः दुहांवयेगु नाकाय् कडाई यानागु धयाच्वंबलय् चांचां मलङ्गवां छगू परिवार सरकारी गाडीइ हे च्वनाः येँय् थ्यंकःवःगु दु ।
छम्ह मिसा थः म्ह्याय् व काय्लिसें सरकारी गाडीइ च्वनाः थौं सुथय् येँय् थ्यंकःवःगु खः ।
उपिं मलङ्गवानिसें हे सरकारी गाडीइ च्वनाः येँय् थ्यंकःवःगु खः । बा २ झ २४१३ ल्याःया सरकारी गाडीं उमित येँय् हःगु खः ।
मलङ्गवां येँय् वःपिं उपिं शुरुइ येँ महानगरपालिका २३ वडा ओमबहालय् वंगु खः । ओमबहालय् थःथितिया डेराय् च्वंवःपिं उमित अनया स्थानीयं च्वनेमबीगु धकाः विरोध यायेवं उपिं हाकनं २२ वडा वटुइ वंगु खः ।
वटुइ नं स्थानीय विरोधय् कुहांवयेधुंकाः तिनि उमित प्रहरीं टेकुस्थित राष्ट्रिय जनस्वास्थ्य प्रयोगशालाय् परिक्षणया लागिं यंकूगु खः ।
उमिगु आरडिटि परिक्षणय् रिपोर्ट नेगेटिभ वःगु कामपा २३ वडाध्यक्ष मचाराजा महर्जनं जानकारी बियादिल ।
पिसिआर विधिं याःगु परिक्षणया रिपोर्ट मवःनि ।
आरडिटि परिक्षणया रिपोर्ट नेगेटिभ वयेधुंकाः पिहां मवःसे पूवंक होम क्वारेन्टाइनय् च्वनेगु शर्तय् उमित वटुइ हे च्वनेब्यूगु दु ।
उखे जोखिम अप्वयावःगुलिं छम्ह थःथितियापाखें सरकारी गाडीइ च्वनाः येँय् वयागु उम्ह मिसां धाल ।
उपिं आः च्वनाच्वंगु थाय् कामपा २५ वडालिसे नं स्वानाच्वंगु दु ।
येँ महानगरपालिका २५ वडाध्यक्ष नीलकाजी शाक्यं लकडाउनया इलय् उकथं सरकारी गाडीं मनू ल्ह्ययाः येँय् हयेगु धइगु पद व सुविधाया दुरुपयोग जूगु धयादिल । थुकी आवश्यक अनुसन्धान यानाः कारवाही यायेमाःगु वडाध्यक्ष शाक्यं धयादिल ।
अथे हे छथासं मेथाय् वनेमज्यूगु अवस्थाय् सरकारी गाडिं हे मनू ल्ह्ययेगु आपत्तीजनक जूगु धयादिल । थ्व विषयस येँ महानगरपालिकाया प्रमुख विद्यासुन्दर शाक्ययात जानकारी याकेधुनागु व थुकी माःगु कारवाहि जुइमाःगु खँय् नं महर्जनं बः बियादिल ।
येँ महानगरपालिका २२ वडाया अध्यक्ष चिनिकाजी महर्जनं नं थज्याःगु इलय् राज्यं अभिभावकीय भूमिका म्हितेमाःगु धयादिल । सरकारी निकायपाखें लकडाउन उल्लंघन जूगु खँय् दोषियात कारवाही यायेमाःगु खँय् वयकलं नं बः बियादिल ।
Categorized in राष्ट्रिय
