लकडाउनय् आः दुनेया वस्तीइ नं कडाइ
समाचार श्रोत : विगेन तुलाधर | चौलाथ्व पञ्चमी ११४०
लकडाउनयात पूर्ण रुपं पालना याकेत आः स्वनिगःया दुनेया वस्तीइ नं कडाइ याइगु जूगु दु । थ्व हे झ्वलय् थौं जनसेवा प्रहरी प्रभागं येँय् दुनेया वस्तीया थीथी थासय् लकडाउन उल्लंघन याःपिन्त नियन्त्रणय् काःगु दु ।
दुनेया वस्तीइ मनूत म्वाःमदयक मुनाच्वनीगु व जुयाच्वनीगु गुनासो अप्वयेधुंकाः जनसेवा प्रहरी प्रभागं येँया दुनेया वस्तीइ कडाइ यानाहःगु खः ।
आइतबाः सुथय् जक हे लकडाउन उल्लंघन यानाः म्वाःमदयक पिहांवःपिं करीब ६सःम्हेसित नियन्त्रणय् कयागु जनसेवा प्रहरी प्रभागया डिएसपि सुनिल जंग शाहं धयादिल ।
थीथी थासं नियन्त्रणय् काःपिं उमित सचेतना कक्षा कयाः त्वःताछ्वयागु डिएसपि शाहं धयादिल ।
थौं सुथसिया ७ः३०ताः ईतक्कया दुने नियन्त्रणय् काःपिं ५सः व १२ मिजं अले सच्छि व ५म्ह मिसातयत सामाजिक दुरी कायम यासें सडकय् हे ३घौ तयाः सचेतना कक्षा काःगु खः ।
लकडाउन उल्लंघन याइपिन्त ६ला कैद वा ६सः तका जरिवाना अथवा नितां सजायँ जुइफइगु व्यवस्था दु ।
आःया अवस्थाय् थुनाय् तयेयंकूसां संक्रमणया जोखिम दुगुलिं प्रहरीं लकडाउन उल्लंघन याःपिन्त नियन्त्रणय् काःगु हे थासय् सचेतना कक्षा कयाः लितछ्वयेगु याःगु दु ।
अथे हे, लकडाउन उल्लंघन याःगु सच्छि व ३ सवारी साधन नं होल्ड यानागु प्रहरीं न्ह्यथंगु दु ।
Categorized in राष्ट्रिय
