लकडाउन अप्वयावंलिसे राहतया माग नं अप्वल
शोभा श्रेष्ठ | चौलागा अष्टमी ११४०
लकडाउन अप्वयावंलिसे राहतया माग नं अप्वयावंगु दु । न्हियान्हिथंया आर्थिक ज्याखँ व आम्दानी दिनाच्वंगु अवस्थाय् छेँय् छेँय् ल्हाः म्हुतु चूलाकेत समस्या जुयावःलिसे ज्यालादारि नयेमाःपिं लिसें स्थानीय मध्यमवर्गीय परीवारपाखें नं राहतया माग अप्वयावःगु दु ।
स्थानीय तगिमं लकडाउनया स्वंगूगु वाःपाखे राहत वितरण याःबलय् त्वःफ्यूपिं लिसें उबले राहत जरुरी मतायेकूगु परिवारं नं आः राहत माःगु धासें जनप्रतिनिधि व सामाजिक संघसंस्थातयथाय् समस्या प्वंकःवनेगु यानाहःगु दु ।
‘राहत वितरण याःबलय् त्वःफ्यूपिं, राहत वितरणबारे जानकारी मदयाः व माःथें मच्वनां मकाःगु परिवारं नं आः राहत माल धकाः वडाय् वयाच्वंगु दु’ येँ महानगरपालिकाया मेयर विद्यासुन्दर शाक्यं धयादिल ।
बुधबाःतक्कय् राहतया लागिं ५३द्वः ९सः २२ परिवारया पहिचान जुइधुंकूगु दु । व मध्ये ४४द्वः ५सः व १३ परिवारयात राहत वितरण जुइधुंकूगु मेयर शाक्यं जानकारी बियादिल ।
संघीय मामिला तथा सामान्य प्रशासन मन्त्रालयया निर्देशन कथं राहतया लागिं लगत मुंकेत क्वःछ्युगु ई पुलेधुंकाः वःगु परिवारयात नं राहत वितरण यानाच्वनागु मेयर शाक्यया धापू खः ।
यल महानगरपालिकां नं चैत्र २२ व २३ गते दुने तथ्याङ्क मुंकाः राहत वितरण याःगु खः । व इलय् त्वःफ्यूपिं लिसें न्हापा माःथें मतायेकूपिं राहतया माग यानाः वडाय् वयेगु अप्वयावःगु यल महानगरपालिका १६ या वडाअध्यक्ष निर्मलरत्न शाक्यं धयादिल ।
‘अथे वःपिन्त राहत इनेगु कि मइनेगु धइगु खँय् महानगरपालिकां निर्णय याःगु मदुनि । जिपिं नं अन्यौलय् हे दु’ वडाअध्यक्ष शाक्यया धापू खः ।
समस्याय् लाःगु परिवारयात राहत थ्यंकेत सामाजिक संस्थालिसे नं समन्वय यानाच्वनागु वडाअध्यक्ष शाक्यं धयादिल । गुलिसिया ला दुःख स्वये मफयाः थःके दुगु भचा धेबा तकं बियाछ्वयागु नं वय्कलं धयादिल ।
यल महानगरपालिका ११य् राहत काये त्वःफ्यूगु धासें समस्या प्वंकः वइपिं नं अप्वयाच्वंगु वडा सदस्य कृष्ण महर्जनं धयादिल ।
यल महानगरपालिकां १९द्वः ४सः व ७३ परिवारयात राहत इंगु खः ।
वडा नं ६या हिटलर शाक्यं नं राहत माल धकाः फोन याइपिं अप्वःगु धयादिल ।
दक्वसिया धइथें व्यापार व्यवसायया लिसें न्हियान्हिथंया आर्थिक ज्याखँ ठप्प जुयाः आम्दानीया लँ बन्द जूगु अवस्थाय् नसा ज्वलंलिसेंया न्हियान्हिथंया अत्यावश्यक ज्वलंया व्यवस्थापनय् स्थानीय सरकारं इलय् हे ठोस योजना न्ह्याके आवश्यक खनेदु ।
Categorized in राष्ट्रिय
