लच्छिया दुने देय् दबूया साधारणसभा यायेत निर्देशन
नृपेन्द्रलाल श्रेष्ठ | दिल्लाथ्व तृतिया ११३९ (जुलाई ५ २०१९)
येँ जिल्ला प्रशासन कार्यालयपाखें थौं छगु पौ च्वया हया अन्जीता खड्गीयात हे नेवाः देय् दबूया कोषाध्यक्ष कायम यायेगु निर्देशन ब्युगु दु ।
उगु पतिइ फागुन २४ व २५ गते धनगढी जुगु नेवाः देय् दबूया केन्द्रिय कार्य समिति बैठकया निर्णय कार्यान्वयन मयायेत निर्देशन न ब्युगु दु ।
अथेहे नेवाः देय् दबूया आर्थिक नियमावली ११३७ या दफा ३ (छ) खँय् तत्काल याये दु धका अध्यक्षं आतक याःगु दक्को खर्च व खर्च जुगु हिसाव कितावया प्रमाणित भ्वं व सम्झौता नापं लेखापरीक्षण याना कार्य समिति व साधारण सभापाखें अनुमोदन याना लच्छिया दुने प्रतिवेदन पेश यायेत निर्देशन ब्युगु दु ।
अथेहे, देय् दबूया संस्थाया बिधान लोकतान्त्रिक प्रकृति व आः या संस्थाया ढाँचा कथं मजुगुलीं लच्छिया दुने बिशेष साधारण सभा सःताः उगु साधारण सभां बिधान संशोधन याना स्वंगु महलया फारम भरे याना स्वीकृतीया नितिं पेश यायेत निर्देशन न ब्युगु दु ।
उगु पौ लिपा थौं हे अन्जीता खड्गी पाखे कोषाध्यक्षया पदभार ग्रहण याःगु दु । वयेकयात दबूया मू छ्यान्जे माईला बाबू द्यौलां खादा व स्वामा क्वखायेखा लसकुस यानादिगु खः ।
