ललितपुर महानगरपालिकाया उद्घोषण तालिम क्वचाल

ललितपुर महानगरपालिका, समाज कल्याण महाशाखां थीथी महिला समूहया नितिं न्ह्याकूगु छवाःया उद्घोषण व वक्तृत्व विकास तालिम क्वचाल । महिला समूहया पदाधिकारीपिनिगु नितिं नुगःखँ तयेगु व ज्याझ्वः न्ह्याकेगु नितिं अःपुइमा धकाः थुगु स्यनेज्याया ग्वसाः ग्वःगु खः । तालिम २०७६ माघ २१ न्ह्याःगु खः ।

पत्रकार सुरजवीर बज्राचार्यं बियादीगु प्रशिक्षणय् २० म्हसिन ब्वति कयादीगु खः । वयकलं न्वंवायेगु गुण जक मखःसे छगू ज्याझ्वः ताःलाक ग्वसाः ग्वयेगु बारे नं स्यनादीगु खः ।

महाशाखाया प्रमुख बाबुराजा महर्जनया सभापतित्वय् जूगु समापन समारोहय् मूपाहाँं सामाजिक विकास समितिया कार्यवाहाक संयोजक यल महानगरपालिका ५ वडाया अध्यक्ष विकासमान श्रेष्ठं  ब्वतिकयादीपिन्त दसिपौ लःल्हानादिल । दसिपौ लःल्हासें थुगु तालिमं अतिकं उत्साहित प्रशिक्षार्थीपिन्सं माग यानादीगु एडभान्स कोर्सया नितिं थःम्हं पहल यायेगु बचं नं वयकलं बियादिल । वयकलं छवाःया तालिमं ब्वति काःपिंके विकास जूगु गुण व आत्मविश्वासं थः अतिकं प्रभावित जूगु खँ कनादिसें लसता नं प्वंकादिल । ज्याझ्वलय् विशेष पाहाँकथं सामान्य प्रशासन महाशाखा महाशाखा प्रमुख श्रीभद्र ओझां थःम्हं कयागु तालिमं विकास जूगु गुणया उपयोग फयांफक्वः अप्वः यायेमा धयादिसें भिंतुना देछानादिल । ज्याझ्वलय् ललितपुर महानगरपालिकाया वरिष्ठ अधिकृत सरीता महर्जन व सामुदायिक विकास शाखा अधिकृत ज्ञानीशोभा महर्जन नं पाहाँया आशन ग्रहण यानादीगु खः ।

तालिम काःगु पुचःपाखें स्वस्ति प्रधान, नवनिता महतो, रमा के.सी. केशरी डंगोलं तालिमया अनुभव कनादिल । शान्ता शाक्यं लसकुस यानादीगु थुगु ज्याझ्वलय् मीना महर्जनं सुभाय् देछानादीगु खः । सुनीता श्रेष्ठ व लक्ष्मी शाक्यं न्ह्याकादीगु थुगु ज्याझ्वः दथुइ ज्याझ्वः न्ह्याकामि सुनीता श्रेष्ठं हुलाप्याखं नं न्ह्यब्वयादिलसा प्रशिक्षक बज्राचार्यं नं वयकःया लोकंह्वाःगु म्ये ग्यानापु स्टाइल न्ह्यब्वयादीगु ज्याझ्वलय् नुगःखँ तयेगु झ्वलय् तालिम क्वचाःगु धइगु आः बांलाक नुगःखँ तयेगु व ज्याझ्वःया जिम्मेवारी कायेगु दिंया शुरूवात जूगु धयादिसें भिंतुना देछानादिल ।