ललितपुर सुनचाँदी व्यवसायी संघं रजत जयन्ती हन
नृपेन्द्रलाल श्रेष्ठ | पोहेलाथ्व पंचमी ११३९ (जनवरी ११ २०१८)
ललितपुर सुनचाँदी व्यवसायी संघं रजत जयन्तीया लसताय् निम्ह पत्रकारयात सम्मान याःगु दु ।
उगु रजत जयन्तीया लसताय् निम्ह पत्रकार नेपाल भाषा टाईम्सया सम्पादक सुरेशकिरण मानन्धर व नेपाल समाचारपत्रया सहायक सम्पादक सुनील महर्जनयात छगु ज्याझ्वः दथुइ संघया अध्यक्ष किरणभाई बज्राचार्यं खादा न्यय्का, मूपाँहा उद्योग, वाणिज्य नाप आपूर्ति मन्त्री मातृका यादवं प्यंगु तोलाया वहःयागु मुद्रा दुगु सम्मान पत्र लःल्हागु खः ।
अथेहे ललितपुर सुनचाँदी व्यवसायी संघया संस्थापक नायः ज्ञानराज शाक्ययात नं संघया अध्यक्ष किरणभाई बज्राचार्यं दोसल्ला न्ययेका व मूपाँहा उद्योग, वाणिज्य नाप आपूर्ति मन्त्री मातृका यादवं हनापौ लःल्हानादीगु खः ।
उगु ज्याझ्वलय् यलया क्षेत्र नं ३ या सांसद् पम्फा भुसाल, प्रदेश नं ३ या सांसद् राजकाजी महर्जन, शोभा शाक्य, पूर्वमन्त्री बुद्धिराज बज्राचार्य, नेपाल उद्योग बाणिज्य संघ प्रदेश नम्बर ३ या संयोजक दिनेश श्रेष्ठ , पूर्व मुख्य सचिव तीर्थमान शाक्य, ललितपुर महानगरपालिकाया प्रमुख चिरिबाबु महर्जन, ललितपुर महानगरपालिका वडा नं १६ या वडाअध्यक्ष निर्मलरत्न शाक्य पिनिगु न उपस्थिति दुगु खः ।
