लहनां प्रेमध्वजयात हनीगु
लहनान्यूज | पोहेंलागा सप्तमि ११३७ (जनवरी १९ २०१७)
लहना मिडियां गोल्डन भ्वाइस अफ नेपाल धकाः म्हस्यूम्ह वरिष्ठ म्येहालामि प्रेमध्वज प्रधानयात हनीगु जूगु दु ।
थौं येँय् पत्रकार सम्मेलन यानाः लहना मिडियां थ्व हे वइगु पोहेंलागा आमै (माघ १४) शुक्रबाःया दिनय् येँय् ‘यूएफओ भिन्तुना सनिल’ ज्याझ्वःया ग्वसाः ग्वयाः वरिष्ठ म्येहालामि प्रधानयात हनेगु धाःगु खः । प्रधानयात दोसल्लां न्ययेकाः हनापौ लिसें ५१,१११ तका राशिलिसें हनेगु पत्रकार सम्मेलनय् जानकारी ब्यूगु खः ।
पत्रकार सम्मेलनय् बिस्कं कथंया सम्मान कथं कलाकारपिनिपाखें सांगितिक सम्मान नं देछायेगु धाःगु खः । उकिया लिसें गोल्डन भ्वाइस भाजु प्रधानं ज्याझ्वलय् म्ये नं हालाः न्यंकादीगु धाःगु दु ।
भारतया संकिपा ख्यःया प्रतिष्ठित फिल्मफेयर अवार्डया न्हयक्वःगु संस्करणय् भ्वाइस अफ नेपाल, प्रेम साहव नामं स्टेजय् आमन्त्रण जूगु ईयात नं पत्रकार सम्मेलनय् लुमंकूगु खः । लिसें उगु हे इलय् थःत भारतय् हे च्वनेत तःक्वः हे याःगु इनापयात छखे तयाः मातृभुमिइ हे लिहांवयाः प्रधानं निरन्तर रुपं नेपाली संगीत ख्यलय् बियाच्वनादीगु योगदानयात च्वछासें वयकःयात हनेत्यनागु धाःगु खः ।
न्हूदँ नेपाल सम्वत ११३७ या लसताय् यायेत्यंगु ज्याझ्वलय् लोकंव्हाःपिं कलाकारपिनिपाखें सांगितिक न्ह्यब्वया नं न्ह्यब्वइगु धाःगु दु ।
ज्याझ्वलय् लोकंव्हाःपिं म्येहालामिपिं भीम तुलाधर, ज्योति घिमिरे, जेम्स प्रधान, निशा देसार, सुरजबीर बज्राचार्य, एन्जिला सिं, भुपेन्द्र बज्राचार्य, अन्जन श्रेष्ठ, पंकज राजोपाध्याय, सुलिन्द्र शाक्यं म्ये लिसें आराध्यलक्ष्मी खड्गीं हुलाप्याखं न्ह्यब्वयादीगु धाःगु दु ।
स्रष्टा व कलाकारया सम्मानया परम्पराया निरन्तरता कथं हे थुगु ज्याझ्वः यायेत्यनागु ग्वसाः खलकं धाःगु दु । लिसें देयया न्हाय् तइपिं कलाकारपिनिगु सम्मान यायेमफूगु राज्यया नितिं जनस्तरपाखें जुइगु थुकथंया सम्मानपाखें राज्यं नं सयेका कायेमाःगु पत्रकार सम्मेलनय् धाःगु खः ।
ज्याझ्वः वइगु पोहेंलागा आमै (माघ १४) शुक्रबाःया दिनस येँ खुसिबुँया विनायक मल्टि भेन्यूस न्हिनसिया ३ः३०ताः इलय् जुइगु जूगु दु ।
