लहना गतिविधिया २५ ब्व पूवन
लहानान्युज | कछलागा पञ्चमी ११४१, मंसिर २० शनिवाः
लहना मिडियाया न्ह्यब्वया कथं नेवाः टिभि एचडिइ न्ह्यानाच्वंगु समाचारमूलक ज्याझ्वः लहना गतिविधिया २५ ब्व पूवंगु दु । थ्व हे झ्वलय् लहना मिडियां छगू ज्याझ्वःया ग्वसाः ग्वसें लसता हंगु दु ।
ज्याझ्वलय् नवाःपिं वक्तापिन्सं नेवाः टिभि ज्याझ्वःया ख्यलय् समाचारमूलक ज्याझ्वःया अभाव जुयाच्वंगुलिइ लहना गतिविधि ज्याझ्वलं उगु अभावयात पूवंकाब्यूगु धाःगु खः । ज्याझ्वलय् नवासें नेवाः पत्रकार राष्ट्रिय दबूया मू छ्यान्जे सुनिल महर्जनं सूचना विभाग लगायतया सरकारी निकाय दुने नेवाःतय्गु पत्रिका धकाः गर्व यानाः नां काय्गु पत्रिका लहना वाःपौ जुयाच्वंगु धासें आः टेलिभिजनय् नं व हे कथं लहना गतिविधिं थःगु छवि दय्कावनाच्वंगु बिचाः तयादिल । ‘लकडाउनया इलय् न्हूगु ज्याझ्वः न्ह्याकाः निरन्तर सामग्री न्ह्यब्वयाच्वनेफुगु धइगु लहनाया सफलता खः,’ महर्जनं धयादिल । ‘आः थुगु सफलतायात कायम यानातय्त लहना मदिक्क न्ह्याःवनाच्वनेमाः ।’
अथे हे वरिष्ठ सिने पत्रकार विजयरत्न असंबरें समाचारमूलक ज्याझ्वःया दथुइ लहना गतिविधि बिस्कं कथंया ज्याझ्वः जूगु धासें ई कथं थुकी ह्यूपाः नं बियाच्वनेमाःगु छ्याता बियादिल । रंगीन वाःपौलिसें नेवाः पत्रकारीता ख्यलय् पलाः न्ह्याकूगु लहना मिडियां ई कथं न्यूज पोर्टल अले आः वयाः टेलिभिजनपाखे नं न्ह्याःवंगु च्वछाय्बहःगु धयादिल ।
अथे हे संस्कृतिविद् जितेन्द्र विलास बज्राचार्यं सत्ययूगनिसें कलियूगतक्कया दसु ब्युसें ईकथं स्वकुमिया चाहनायात थुइकाः न्ह्याःवनेमाःगुलिइ बः बियादिल । इन्द्रजात्रा व्यवस्थापन समितिया वरिष्ठ न्वकू शरद कुमार डंगोलं न्हापा राजतन्त्रया इलय् नवाय्ग स्वतन्त्रता मदुगु ई लुमंकुसें आः व्यवस्था ह्यूगुलिसें सूचनाया स्वतन्त्रता नं दुगु खँय् लसता प्वंकादिल ।
वरिष्ठ पत्रकार सुरेश किरण मानन्धरं नेवाः पत्रकारिता ख्यलय् लहना मिडियां मदिक्क न्ह्याकाच्वंगु पलाःया प्रशंसा यानादिल । लहनां पत्रकारिता ख्यलय् पत्रिका, वेबसाइट धुंकाः आः टेलिभिजनय् नं पलाः न्ह्याकाः थःगु गतिशिलता प्रमाणित याःगु व इलय्ब्यलय् थीथी ज्याझ्वःत नं यानाः नेवाः ख्यलय् छगू तरङ्ग बियाच्वंगु बिचाः तयादिल । ‘लहनां छापालिसें विद्युतीय संचारपाखे पलाः न्ह्याकाच्वंगु ला बांलाःगु हे खत, उकिया नापं युट्युबय् नं न्ह्याःवंगु झन च्वछाय्बहःजू,’ पत्रकार मानन्धरं धयादिल । ‘टिभि स्वय्गु स्वयां आः मनूतय्सं युट्युब स्वइगु जुयाच्वंगु इलय् लहनां युट्युबय् नं सामग्री बियाच्वंगुलिं थनया गतिविधित हलिन्यंक थ्यनेत ग्वाहालि जूगु दु ।’
उगु हे ज्याझ्वलय् लहना गतिविधियात ग्वाहालि यानाच्वंपिं व्यक्ति व संघसंस्थायात मतिनाया चिंलिसे सुभाय् देछाःगु खः । व झ्वलय् नेवाः टिभि एचडि व ज्याझ्वः कजि लिसें निर्देशक अनुप प्रधानयात विशेष सुभाय् कथं विशेष सुभाय् पौ लःल्हाःगु खः । लहना मिडियाया नायः नृपेन्द्रलाल श्रेष्ठया नायःसुइ जूगु ज्याझ्वलय् लहना मिडियाया व्यवस्थापक सुरेन्द्रभक्त श्रेष्ठं लसकुस यानादीगु खः।
