लहना प्यदँ फुनाः न्यादँय् क्यन
जुजुमान महर्जन
नेपालभाषा पत्रकारिता ख्यलय् रंगीन वाःपौकथं पिहांवःगु ‘लहना’ वाःपौ आः प्यदँ फुनाः न्यादँ क्यंगु दु । विशेष यानाः नेपालभाषाया पत्रकारिता ख्यलय् व्यवसायिक पत्रकारितायात तिबः बिया वनेगु तातुनां पिहांवःगु थुगु पत्रिका प्यदँ पूवंगु छगू लसताया खँ जुल ।
नेपाःया पत्रकारिता ख्यलय् यक्व हे पत्रपत्रिका पिहांवःगु दु, तर निरन्तरकथं पिहां वयाच्वंगु पत्रिका धाःसा म्हो हे जक खनेदु । थ्व छगू खायुगु सत्य खः । तर थुकियात दीर्घकालीनकथं न्ह्यःने यंकेगु नितिं नेपालभाषाय् थःगु जीवन पानाच्वंपिं फुक्क पत्रकारपिन्सं बिचाः याय् हथाय् जुइधुंकूगु दु ।
लहना वाःपौ प्यदँ फुनाः न्यादँ क्यंगु धइगु छगू थुगु पत्रिकाया नितिं ब्वँमिपिन्सं माया, मतिना, सद्भाव क्यनाः गुगु ग्वाहालि यानाच्वंगु खःसा मेखे थुकियात निरन्तर कथं पिनथनेगु नितिं थीथीकथं विज्ञापन बियाः आर्थिक कथं सबल याय्गु ज्यां नं खः । झीसं स्यू अर्थ फुक्कं मखुसां पत्रिका पिथनेगु वा छुं नं ज्या याय्गु नितिं अर्थया नं अहम् भूमिका दइगु खः ।
उकिं विज्ञापनदातापिन्सं थुगु पत्रिकाय् मदिक्क बियाच्वनादीगु विज्ञापन नं थुगु पत्रिकाया नितिं निरन्तरकथं पिथनेगु नितिं लिधंसा जूवनाच्वंगु दु । अथेहे थुगु पत्रिकाया नितिं च्वमि भाजु मय्जुपिन्सं च्वसु बियाः ग्वाहालि यानाच्वनादीगुलिं नं थुगु पत्रिका धस्वानाच्वनेमफू मेगु कारण खः । थ्वया नापनापं थुगु पत्रिका स्वयाः प्रत्यक्ष अप्रत्यक्षकथं समालोचना यानाः लँ क्यनादीपिंपाखें नं थुगु वाःपौ कृतज्ञ जुयाच्वना ।
थुगु वाःपौपाखें नेपालय् विशेषयानाः नेवाः ख्यलय् जुयाच्वंगु बांमलाःगु पक्षयात कुलाः सकारात्मक ढंगं न्ह्याःवनेगु नितिं वकालत याना वयाच्वनागु दु । थुगु खँय् आपालं समस्यात थुगु पत्रिकां फय्मालाच्वंग दुसा गुलिस्यां च्वछाःगु नं दु ।
खः, पत्रकारिता ख्यलय् बांलाःगु खँ जक मखु, गुलिखे खायुगु खँयात नं धुर्का छ्वय्माली । थजाःगु अवस्था लहनाय् नं मवःगु मखु, तर थ्व हे खँयात स्मरण यानाः थुगु वाःपौयात न्ह्यःने यंकेगु नितिं संजीवनी बुटी थें जूगु नं महसूस यानाच्वनागु दु । अर्थात थुकियात निरन्तरता बीगु नितिं छगू हःपाः जुयाच्वंगु दु ।
खः, थुगु वाःपौपाखें मतिना यानादीपिं ब्वँमिपिनिगु अपेक्षाकथं विषयवस्तुयात निरन्तरता बियाच्वनेफूगु मदुनि । थुकी दुथ्याःगु विषयवस्तु अझ नं कम जुल धइगु नं गुनासो मवःगु मखु ।
निश्चितरुपं आः वइगु दिनस ब्वँमिपिनिगु अपेक्षायात प्राथमिकता बियाः न्ह्याःवनेगु जुइ । थुगु ज्याय् वइगु दिनस ताःलाइ धइगु भलसा कयाच्वना । नापं लहना वाःपौ थौंया दिनतक थ्यंकेत प्रत्यक्ष अप्रत्यक्ष ग्वाहालि यानादीपिं सकलसित सुभाय् देछानाच्वना ।
