लहना वाःपौ खुदँ क्यंगु लसताय् पत्रकारपिं सम्मानित
नृपेन्द्रलाल श्रेष्ठ | बछलाथ्व नवमी ११३९ (मे १३ २०१९)
‘ब्यावसायिक पत्रकारिता, थौंया आवश्यकता’ धइगु नारा ज्वनाः नेपालभाषाया ख्यलय् थनिं न्यादँ न्ह्यः पिदंगु ‘लहना’ वाःपौया खुदँया बार्षिकोत्सव ज्याझ्वः जुगु दु । उगु ज्याझ्वलय् नेवाः ख्यःलिसें नेपाःया थीथी सञ्चार माध्यमपाखें नेवाः जाति, भाषा, कला, संस्कृतिया आदिया संरक्षण व सम्बद्र्धन याय्गु ज्याय् योगदान बिया वयाच्वंपिं नेवाः पत्रकारपिन्त नं सिरपाः लःल्हाय्गु ज्या जूगु खः ।
उगु ज्याझ्वलय् कान्तिपुर न्हिपौया पत्रकार हिमेश बज्राचार्ययात ‘लहना धर्म–मोति पत्रकारिता सिरपाः’ व झिंन्याद्वःतका, भिजन संसार डट् कमया श्याम स्मृतयात ‘लहना सूर सम्मान’ व झिद्वःतका, नेवाः न्ह्यलुवा लक्ष्मण श्रेष्ठयात ‘लहना पञ्चवीर सिरपाः’ व नीद्वः निसः व नीनितका, गोरखापत्र न्हिपौया पत्रकार उपेश महर्जनयात ‘लहना मोहनी सिरपाः’ व झिद्वः तका, नेपालमण्डल टेलिभिजनया पत्रकार अनुप शाक्ययात‘लहना न्यू जेनिथ पत्रकारिता सिरपाः’ व झिद्वः तका अथे हे नेवाः अनलाइन न्यूजया सम्पादक सुजीव बज्राचार्ययात ‘लहना केशव–कृष्णबदन मातृभाषा पत्रकारिता सिरपाः’ व झिद्वः व सच्छितका दां सिरपाःकथं लःल्हाःगु खः ।
अथेहे ज्याझ्वःया मूपाहाँ लिसें येँ महानगरपालिकाया प्रमुख विद्यासुन्दर शाक्यं हनापौ लःल्हानादीगु खःसा सिरपाःया दातापिं छसिकथं लक्ष्मण गमाल, सूरबहादुर श्रेष्ठ, पञ्चवीर सिं तुलाधर, मोहिनी श्रेष्ठ, राजु महर्जन व केशवलाल श्रेष्ठं दां लःल्हानादीगु खः ।
नाप नेपालभाषा ख्यःलिसें सामाजिक सेवाय् विशेष योगदान बियादीपिं कृष्णलाल महर्जन, राज्यलक्ष्मी बज्राचार्य, अञ्जना ताम्रकार, मोतिशान्ति शाक्य व मिस्कुल तामाङ (च्याङ्बा लामा)यात येँ महानगरपालिकाया प्रमुख शाक्यं विशेष सम्मान पत्र लःल्हानादीगु खः ।
ज्याझ्वःया मूपाहाँ शाक्यं नेपालभाषा पत्रकारिता ख्यलय् आःतक नं लुधनेफूगु अवस्था मदुगु खँ न्ह्यथनादिसें थःगु लक्ष्य कथं न्ह्याःवन धाःसा अवश्य नं पूवनीगु खँ धयादीगु दु । अथे हे मातृभाषा पत्रकारिता ख्यलय् येँ महानगरपालिकापाखें याय्फूगु ग्वाहालि याय्त तयार दुगु खँ कनादिसें भावना स्वयां नं नीतिगत व प्रशासनिककथं ज्या पूवंकेगु खँय् नं ध्यानाकर्षण यानादिग् खः ।
लहना वाःपौया सम्पादक जुजुमान महर्जनया सभाध्यक्षताय् जूगु ज्याझ्वलय् लहना वाःपौयात कयाः पूर्व सम्पादक के.के. मानन्धरं न्ववानादीगु खःसा नेपाल आदिवासी जनजाति पत्रकार महासंघ (फोनिज)या बरिष्ठउपाध्यक्ष गजुरधन राई, सम्मानित जुयादीम्ह समाजसेवी मोतिशान्ति शाक्यं नं थःथःगु नुगःखँ तयादीगु खः ।
ज्याझ्वलय् जनकवि दुर्गालाल श्रेष्ठ, समाजसेवी लक्ष्मीदास मानन्धर, प्रदेश ३या सभासद राजेश शाक्य, कीर्तिपुर नगरपालिकाया प्रमुख रमेश महर्जन, समाजसेवी मोतिलाल शिल्पकार, नेपाः राष्ट्रिय पार्टीया नायः डा. विजय सैंजुलिसें थीथी सञ्चार मिडिया, नेवाः संघसंस्थाया प्रतिनिधि व भाषिक ख्यःया व्यक्तित्वपिनिगु उपस्थिति दुगु खः ।
लहना वाःपौया प्रकाशक नृपेन्द्रलाल श्रेष्ठं लसकुस यानाः न्ह्याःगु उगु ज्याझ्वः लिपा लोकंह्वाःपिं कलाकारपिन्सं साँस्कृतिक ज्याझ्वः व ख्यालि न्ह्यब्वःगु खः । ज्याझ्वः पत्रकारलिसें एफ.एम.ज्याझ्वः न्ह्याकामि सुरजवीर बज्राचार्यं न्ह्याकादीगु खःसा लहना वाःपौया व्यवस्थापक सुरेन्द्रभक्त श्रेष्ठं सुभाय् देछानादीगु खः ।
https://www.facebook.com/photo.php?fbid=634615130336263&set=pcb.634622250335551&type=3&theater
