लाओसयात ट्राइबेकरय् बुकूसें नेपाः सोलिडारिटी कपया फाइनलय्
नेपाल एफसी सोलिडारिटी कप फुटबल कासाया फाइनलय् दुहांवंगु दु । मलेसियाया कुचिङ्गय् च्वंगु नेगेरी स्टेडियमय् थौं शनिवाः जूगु सेमीफाइनल कासाय् लाओसयात ट्राइबेकरय् बुकूसें उपाधि लिक्क थ्यंगु खः । नेपालं लाओसयात ट्राइबेकरय् ३गू गोलं बुकूगु खः । 
 
कासाया निर्धारित व अतिरिक्त ईलय् जूगु कासा निखेरं निगू निगू गोलया ज्वलिंज्वः जुइवं कासाया निर्णय् ट्राइबेकरपाखें जूगु खः । ट्राइबेकरय् नेपाःया गोलकिपर किरण चेम्जोङ्गं निगू पेनाल्टी प्रहारयात उत्कृष्टकथं बचेयायेवं नेपाः कासाया फाइनलय् थ्यंगु खः । नेपाःया हेमन गुरुङ्ग, विक्रम लामा व सुजल श्रेष्ठया पेनाल्टी गोलय् परिणत जूगु खः ।
 
कासाय् नेपाःया कमजोर डिफेन्सया फाइदा कासें १८गूगु मिनेटय् लाओसं अग्रता काःगु खः । लाओसया नितिं स्ट्राइकर फिमासेनं गोल याःगु खः । तर कासाया ४७गूगु मिनेटय् भरत खवासया क्रसय् बिमल घर्तीमगरं हेडपाखें उत्कृष्ट गोल यासें कासा बराबरीइ हःगु खः । निर्धारित इलय् निखेरं गोल मजुइवं कासा अतिरिक्त इलय् वंगु खः । अतिरिक्त ईया १०४गूगु मिनेटय् अनन्त तामाङ्गं गोल यासें नेपाः विजय लिक्क थ्यंगु खःसां कासा क्वचायेगु स्वंगू मिनेट ल्यं दनीगु इलय् लाओसया फिमासेनं व्यक्तिगत निगूगु गोल यायेवं कासा ट्राइबेकरय् वंगु खः ।
 
आः नेपालं उपाधिया नितिं मकाउ व ब्रुनाइ दथुइ जुइगु कासाया विजेता लिसें वइगु मंगलवाः धेंधेंबल्ला याइ ।
Categorized in कासा