लाखे लक्ष्मणया बाखं अंग किपाय्
लहनान्यूज | चौलाथ्व सप्तमी ११३७ (अप्रिल ३ २०१७)
१८दँ तक्क निरन्तर येँयाःया इलय् लाखय् जुयाः सांस्कृतिक ख्यलय् योगदान बियादीम्ह लक्ष्मण रंजितया बाखंयात यंगालय् च्वकिपाय् न्ह्यब्वःगु दु ।
Kathmandu Triennale International Art Festival 2017 अन्तर्गत कलाकार मर्टिन ट्राभर्सं लाखे लक्ष्मण रंजीतया किपा दयेकादीगु खः । ट्राभर्सं लक्ष्मणया लिसें वंगु २०७२ बैसाख १२या तःभुखायया बाखं कःघानाः यंगालय् च्वकिपा दयेकूगु खः ।
च्वकिपा दयेकेगु नितिं मार्टिनयात कला शिक्षा अभियानपाखें ग्वाहालि याःगु खः । च्वकिपा दयेकेगु ज्याय् मार्टिनलिसें कला शिक्षा अभियानया विकिल स्थापित व न्हूजः श्रेष्ठं ग्वाहालि याःगु खः ।
किपाय् लाखयया ख्वाःपातय् लक्ष्मणया तपाःगु किपा च्वयातःगु दु । उकिया नापं सर्गतय् बखुं ब्वयाच्वंगु व काष्ठमण्डपं लाखय् व झ्यालिंचा पिहां वयाच्वंगु क्यनातःगु दु ।
दक्कले च्वय् सर्गतय् बैसाख १२या भुखाचय् लानाः मदुम्ह लक्ष्मण रंजितया जहान निलु रंजीतया किपा च्वयातःगु दु ।
बैसाख १२ गते भुखाय् ब्वःगु इलय् काष्ठमण्डपय् हिदान यानाच्वंम्ह लक्ष्मण अनं थः कायलिसें पिहां वयेत ताःलाःगु खः । तर वयकःया जहान निलु काष्ठमण्डपय् हे ल्हानाः मदुगु खः ।
लक्ष्मणया थ्व हे भोगाइयात च्वकिपाय् थःपिन्सं न्ह्यब्वयागु कला शिक्षा अभियानया विकिल स्थापितं कनादिल । नेवाः संस्कृतिया ख्यलय् मदिक्कया योगदानया सम्मानलिसें वयकःया जीवनया स्याःचाः सकसितं कनेत थःपिन्सं च्वकिपा दयेकागु स्थापितं लहनान्यूजयात धयादिल ।
Categorized in मनोरन्जन
