२०८० चैत्र १६, शुक्रबार

लानीपुखू पुनःनिर्माणय् सेना

जुजुमान महर्जन
 
भुखाचं ध्वस्त जूगु येँया लानीपुखूया पुनःनिर्माणया ज्यायात कयाः थीथी वाद विवाद जुजुं आः थुकियात पुनःनिर्माण याय्गु जिम्मा नेपाःया सेनायात बीगु महानगरपालिकां क्वःछ्यूगु दुसा व हे कथं जिम्मा नं बीधुंकूगु दु ।
 
आःतकया इतिहासय् सेनां काःगु जिम्मेवारीयात पाय्छि इलय् पूवंकूगु व विवाद मदय्क हे ज्या क्वचाय्कीगु धइगु विश्वासं महानगरपालिकां उगु पुखू दय्केगु जिम्मा सेनायात ब्यूगु खनेदु । झीसं स्यू, पुरातत्व विभागं लानीपुखूया दथुइ च्वंगु बालगोपालेश्वर देगःया पुनःनिर्माणया जिम्मा काःगु खःसा ल्यं दनीगु ब्वया पुनःनिर्माण याय्गु ज्या महानगरपालिकां काःगु खः । तर आःतक नं थुगु नितां ज्या न्ह्याःगु मदुनि ।
 
 
पुखूया अवस्था स्वय्गु खःसा थ्व पुखू मखु, ख्यःथें च्वनेधुंकल । तर सम्पदाया पुनःनिर्माण याय्गु बचं बिया वयाच्वंगु महानगरपालिकां धाःसा थ्व खँय् ल्यूने लानाच्वंगु खनेदु । आः वयाः थुगु जिम्मा सेनायात ब्यूगु ज्यापाखें धात्थें छु महानगरपालिका थुगु ज्या याय्त असक्षम हे खः ला धइगु न्ह्यसः चिं ब्वलंगु दु ।
 
 
 
 
महानगरपालिकापाखें लानीपुखू दय्केगु ज्याय् ल्हाः तसांनिसें विवादय् लाःगु खनेदु । विशेष यानाः सम्पदाया क्षेत्रय् गुलि नं ल्हाः तःगु दु, उकियात कयाः विवाद हे जुयाच्वंगु खनेदु, न्हूसतकय् च्वंगु व्यापारिक भवन जुइमाः वा बागदरबार (हरिभवन) जुइमाः । थुकियात कयाः सम्पदाह्यःमिपिन्सं विरोध याना वयाच्वंगु दु ।
 
 
अथे हे थुगु लानीपुखू दय्कूगु इलय् ला महानगरपालिकाया प्रमुख व उप–प्रमुख दथुइ हे विवाद जुयाः ज्या तकं दिकेमाःगु खः । गुगु ज्या आःतक नं न्ह्याःगु मदुनि । विज्ञपिनिगु सुझाव काय् धुंकूगु दु । तर पुनःनिर्माणया ज्या धाःसा न्ह्याःगु मदुनि ।
 
 
महानगरपालिकां आः थुगु जिम्मा सेनायात बीधुंकाः अझ नं विवाद ब्वमलनी धकाः धाय्मफु । थुगु ज्या येँ महानगरपालिकाया जनप्रतिनिधितय्सं हे न्ह्यसः थनेगु ज्या शुरु जुइधुंकूगु दु । छखे नेपाःया सेना वा प्रहरीयात ठेकेदार दय्केगु खँय् जनप्रतिनिधित सहमत जुयाच्वंगु मदु । सम्पदाया पुनःनिर्माण जनताय्तगु हे सहभागीताय् दय्केमाःगु खँ वयाच्वंगु इलय् थुकथं सेनायात बीगु गुलितक पाय्छि जुइ ?
 
 
अले स्थानीय सरकारय् जनप्रतिनिधित वय्धुंकूगु अवस्थाय् हाकनं थजाःगु ज्याया नितिं सेनायात हे छाय् भाला बीमाःगु खः ? वा जनप्रतिनिधिपिनिगु छुं हे दायित्व मदुगु खः ला ? वा असक्षम जुयाः जक सेनायात ब्यूगु खः ला ? न्ह्यसः थनेगु यानाहःगु दु ।
 
 
खय्त ला, लानीपुखू पुनःनिर्माण याःगु इलय् कंक्रिट जक चीकेगु व मल्लकालीन पहलं दय्केगु खँ जूगु खः । विज्ञतय्सं नं थुकथं हे सुझाव ब्यूगु खःसा आः वयाः पुरातत्वं बालगोपालेश्वर देगः शाहकालया थें दय्केगु अडान काःगु दु । थजाःगु अवस्थाय् लानीपुखू दय्केगु जिम्मा गैर सम्पदाप्रेमीयात बिल धाःसा थुकिया पुनःनिर्माण ला जुइ, तर ईतिहासयात हे ल्वमंकेगु कथं जक जुइगु मखुला ?