लामिछानेया जहान निकिताया जाहेरी दर्ता यायेत अस्वीकार
लहना न्यूज | ने.सं. ११३९ गुंलागा षष्ठि (२१ अगष्ट, २०१९), बुधवाः
प्रहरी हिरासतय् दुम्ह टेलिभिजन कार्यक्रम प्रस्तोता रवि लामिछानेया जहान निकिता पौडेलं चितवनया एसपी दानबहादुर मल्ल, प्रेस काउन्सिलया नायःलिसें जनआस्था वाःपौया सम्पादक किशोर श्रेष्ठ व नेपाल आज अनलाइनया सम्पादक संकेत कोइराला विरुद्ध बीत स्वयादीगु जाहेरी महानगरीय प्रहरी परिसर येँ नं दर्ता यायेत अस्वीकार याःगु दु ।
पत्रकार शालिकराम पुडासैनी आत्महत्या याये न्ह्यः काःगु धयातःगु भिडियो कीर्ते याःगु धयादिसें पौडेलं थौं बुधवाः न्हिनसिया १ः३०ताः इलय् महानगरीय प्रहरी परिसर येँय् जाहेरी बीत थ्यंकादीगु खः ।
परिसरया प्रमुख एसएसपी उत्तम सुवेदीं थःगु क्षेत्राधिकार स्वयां पिनेया विषय जूगुलिं जाहेरी दर्ता यायेत अस्वीकार याःगु धाःगु दु । प्रहरी श्रोतकथं पौडेलयात महानगरीय प्रहरी परिसर येँ नं थःगु जाहेरी जिल्ला प्रहरी ज्याकू, चितवन वा प्रदेश ल्याः ३ प्रहरी ज्याकुथी दर्ता यायेत सुझाव ब्यूगु दु ।
पौडेल विद्युतीय कारोबार ऐनकथं स्वम्हेसित कारवाही यानादिसँ धकाः उजुरी दर्ता यायेगु तयारीलिसें परिसर ज्याकू टेकू थ्यंकादीगु खः । प्रहरीं ताःहाकः सहलह लिपा जाहेरी दर्ता याये मिले मजूगु धकाः उमित लित छ्वःगु खः ।
पुडासैनी वंगु साउन २० गते नारायणगढय् च्वंगु पोखरा बसपार्कया होटल कंगारुइ यग्गानाच्वंगु अवस्थाय् सीम्ह लुइकूगु खः । वय्कःयात आत्महत्या यायेत दुरुत्साहन याःगु द्वपनय् प्रहरीं वंगु विहिवाः रवि लामिछानेलिसें पत्रकार युवराज कँडेल व अस्मीता कार्कीयात ज्वनाः अनुसन्धान यानाच्वंगु दु ।
Categorized in राष्ट्रिय
