ला लिगाय् बार्सिलोना शिर्ष थासय्
लहनान्यूज | चिल्लाथ्व सप्तमी ११३७ (मार्च ५ २०१७)
सेल्टा भिगोयात ५÷० या तःधंगु गोल अन्तरं बुकाः बार्सिलोना स्पेनिस लिग फुटबलया शीर्ष थासय् थहांवंगु दु ।
शनिबार चान्हय् थःगु हे ख्यलय् जूगु कासाय् बार्सिलोनायात त्याकेत लियोनेल मेस्सीं निगू गोलया योगदान बिल । अथे हे बार्सिलोनाया नितिं नेईमार, उम्तिती व ईभाँ राकितीचं १/१ गोल यात ।
ला लिगा अन्तर्गत शनिबार हे जूगु मेगु कासाय् रियाल मड्रिडं आइबारयात ४/१ गोल अन्तरं बुकाबिल । कासाय् रियाल मड्रिडया नितिं करिम बेन्जमां २ गोल यात सा जेम्स रोड्रिग्वेज व मार्को असेन्सीयों १÷१ गोल यात ।
ला लिगा अन्तर्गतया हे मेगु कासाय् भियारियालं ईस्पानियोलयात २/१ गोलं बुकाबिल । अथे हे लेगानेजं ग्रानाडायात १/० बुकल ।
शनिबार चान्हयया कासात लिपा लिगया ल्याः धलखय् २६ कासापाखें ६० ल्याः मुंकूगु बार्सिलोना शीर्ष थासय् दु । छगू कासा म्ह्वः म्हितूगु रियाल मड्रिड ५९ ल्याः लिसें निगूगु थासय् दु ।
Categorized in कासा
