लिपांगु साउनया देय्न्यंक महाद्यःया ल्हुल
नृपेन्द्र लाल श्रेष्ठ | गुंलागा सप्तमी ११३७ (अगष्ट ३० २०१७)
साउनया लिपांगु सोमवाः थौं देय्न्यंक महाद्यःया देगः नापं तीर्थस्थलय् भक्तजनत म्वःम्वः भीड खनेदु दु । पशुपति, देवघाट हनुमान ढोकाया महाद्यःया लगायतया देगः दुगु थासय् पुजा याइपिं भक्तजनतय्गु तसकं भीड दगु खः । थौं सोमवाः देवघाटय् नं भक्तजनतय्गु विशेष मेला जुगु दु ।
कालिगण्डकी व त्रिशुलीया संगम वेणीइ स्नानयात धाःसा पुण्य लाइगु लिसें थीथी ल्वचं तकं मुक्त जुइ धइगु जनविश्वासया कारणं देवघाटधामय् म्व ल्हुइपिं यक्व हे खने दुगु खः । अथेहे येँया ग्वल लागाया पशुपतिइ नं भक्तजनत सुथ्निंसें भिड जुगु खः । साउनया सोमवाः पतिकं अप्सं च्वना स्नान याना बेलपत्र महाद्यःयात छायेगु याइ ।
धर्मशास्त्रय् साउन महिनायात दच्छिया हे दकलय् मध्ये चोखो महिनाया रुपय् तकं नाला तःगुलीं साउनय् पूजाआजा याइबले पूण्य दइगु जन विश्वास खने दु ।
Categorized in राष्ट्रिय