लिबियाय् डुंगा दुर्घटना जुयाः म्ह्वोतीं ५७म्ह मनूत मन्त
दिल्लागा चतुर्थी ११४१,साउन १२ मंगलवाः
लिबियाय् डुंगा दुर्घटना जुयाः ५७म्ह मनूत मन्त । मदुपिं उप्व धइथें आप्रवासीत जूगु अन्तर्राष्ट्रिय आप्रवासी संगठनं धागु दु ।
मदुपिं मध्ये म्ह्वोतीं २०म्ह मिसात अले निम्ह मस्त खः । लिबियाया पश्चिम तटीय क्षेत्र खुम्सपाखें यात्रु ज्वनाः वंगु डुंगा दुर्घटनाय् लाःगु खः । क्षमता स्वयां उप्वः यात्रु दुगुलिं डुंगा दुर्घटनाय् लाःगु सरकारी अधिकारीतय्गु प्रारम्भिक अनुसन्धानं क्यंगु दु ।
दुर्घटना जूगुलिसे ८म्हेसित उद्धार याःगु खः । डुंगाय् गुलि यात्रु दु धइगु सीमदुनि । दुर्घटनाय् लानाः न उद्धार याःपिं नाइजेरिया, घाना व गाम्बियाली नागरिक खः । लिबियाय् वंगु वाः न डुंगा दुर्घटना जुयाः २०म्ह मनूत मन्त ।
थुगुसिइ थ्यंमथ्यं १५द्वम्ह शरणार्थीतय्त लिबियाली समुद्री तटं उद्धार याःगु अधिकारीतय्सं धागु दु । थ्व ल्या सन् २०२० सालय् देय् त्वःतूपिं स्वयां उप्वः खः । एमनेष्टी इन्टरनेशनलं लिपांगु खुलादुने ७द्व मल्याक आप्रवासीतय्सं गैरकानुनी रुपय् सीमा पार यायेत्यंगु द्वपनय् हिरासतय् काःगु दु ।
सन् २०११ या विद्रोहलिपा मुहम्मद गद्दाफीयात सत्ताच्यूत यायेवं युरोप दुहाँवनेत लिबिया महत्वपूर्ण ट्रान्जिट प्वाइन्ट जूगु दु ।
Categorized in अन्तर्राष्ट्रिय
