लियोनल मेस्सीं बार्सिलोना त्वःतिगु
दिल्लागा त्रयोदशी ११४१,साउन २२ शुक्रवाः
नाँ जाःम्ह अर्जेन्टाइनी फुटबल कासामि लियोनल मेस्सीं बार्सिलोना त्वःतिगु पक्का जूगु दु ।
क्याटलन फुटबल क्लबं म्हिगः छगू विज्ञप्ती जारी याना मेस्सीलिसे न्हूगु सम्झौताया नितिं क्लबया वित्तिय व संरचनागत पंगः ब्वलंगु जानकारी बिउगु खः । वंगु जुलाई १ तारिखय् बार्सिलोनालिसेया करार सम्झौता क्वचाम्ह मेस्सी फ्रि एजेन्टया रुपय् दु ।
तर वयेकलं बार्सिलोनाय् हे थप ५ दँ च्वनेत सहमति न्ह्यथंगु बुखँ थ्वयान्ह्यः सार्वजनिक जूगु खः । मेस्सीं आः चूलाकाच्वंगु तलब लिसें मेगु सुविधाय् बाब्व कटौति याना वयेक क्लबय् हे च्वनिगु धाःगु खः । तर आः मेस्सीलिसे न्हूगु सम्झौताया नितिं थी थी कठिनाई जूगु क्लबया धापू दु ।
मू कथं स्पेनिस लिग फुटबल ला लिगाया व्यवस्थाया हुनिं मेस्सीलिसे सम्झौता जुइ मफूगु बार्सिलोनां न्ह्यथंगुृ दु । मेस्सी सन् २०२६ तक्क बार्सिलोनाय् हे च्वनिगु धाःसा नं क्लबय् मेस्सी वा मेपिं सुं नं न्हूपिं कासामि दर्ता यायेत तलब क्वपालेमाःगु बाध्यताया हुनिं मेस्सीं बार्सा त्वःतेत्यंगु खः ।
मेस्सीया सम्झौता लिच्वःलय् लायेधुंका युरोपया मेगु नाँ जाःगु क्लबतयेसं वयेकयात थःगु क्लबय् दुकायेगु कुतः न्ह्याकुगु दु । फ्रान्सया पेरिस सेन्ट जर्मेन व इंग्ल्याण्डया म्यान्चेस्टर सिटीं ताः ई निसें मेस्सीयात थःगु क्वबलय् दुथ्याकेगु मनंतुना क्यनाच्वंगु खः ।
Categorized in कासा
