लियोनल मेस्सी फ्रेन्च फुटबल क्लब पेरिस सेन्ट जर्मेनय् दुथ्यात
गुंलाथ्व तृतीया ११४१,साउन २७ बुधवाः
अर्जेन्टिनी फुटबल स्टार लियोनल मेस्सी फ्रेन्च फुटबल क्लब पेरिस सेन्ट जर्मेन, पिएसजीइ दुहाँवंगु दु ।
स्पेनिस लिगया न्हूगु वित्तीय व्यवस्थाया हुनिं बार्सिलोना त्वःतेत बाध्य जूम्ह मेस्सीं निदँया नितिं पिएसजीलिसे सम्झौता याःगु खः । पिएसजीइ वय्कया तलब वाःया १०गू लख पाउण्ड दु ।
थुकिया झण्डै ४५गू प्रतिशत वय्कलं कर पुलेमाः । मेस्सी वःगुलिसे पिएसजी फुटबल क्लब झं शक्तिशाली जूगु क्लबया नायः नासिर अल खलिफां धयादिल ।
पिएसजीइ थ्वसिवे न्ह्यः हे हलिंया स्टार कासामि नेयमार व किलियन एम्बाप्पे दु । मेस्सीं आवलिं थुपिं निम्ह कासामिलिसे न सहकार्य याइ ।
मेस्सी वःगुलिसे क्लबं युरोपियन च्याम्पियन्स लिग फुटबल त्याकीगु सम्भावना अप्वयाःवःगु दु । सन् २००४ निसें बार्सिलोनापाखें व्यवसायीक कासा म्हितूम्ह मेस्सीया १७दँया कासा ख्यःया करियरय् पिएसजी निगूगु क्लब खः ।
Categorized in कासा