लुँ वहः पेशा सञ्चालन सम्वन्धी सचेतना ज्याझ्वः
लहनान्युज | सिल्लागा द्धादशी ११३९ (माच ३ २०१९)
लुँ वहः ब्यवसायय् समस्या व समाधानयात ग्वाहालि जुइ कथंया उद्धेश्यं येँ ‘सुनचाँदी पेशा सञ्चालन सम्वन्धी सचेतना कार्यक्रम’या ज्याझ्वः जुगु दु ।
नेपाल सुनचाँदी ब्यवसायी महासंघया ग्वसालय् जुगु उगु ज्याझ्वलय् सरकारी निकायकया प्रतिनिधी नाप ब्यवसायीपिनिगु ख्यलय् खनेदुगुु समस्या व उकिगु निराकरणया बिषय खँय् ज्याझ्वः जुगु खः ।
उगु ज्याझ्वलय् मूपाँहा कथं गुणस्तर तथा नापतौल विभागया महानिर्देशक विश्ववावु पुडाशैनीं छु न पेशा ब्यवसाय यायेगु न्ह्यः उकिगु सम्वन्धी कानूनी पक्षया जानकारी दयेमाःगु खँ न्ह्थनादीगु खः । लुँ वहःया ब्यवसाय यायेत तौल गुणस्तर, जर्ति, ज्याला थे जाःगु बिषयलय् गंभिरतापुर्वक कायेत आग्रह न यानादीग खः ।
अथेहे गुणस्तर तथा नापतौल विभागया पुर्व महानिर्देशक डा. सिताराम जोशीं कार्यपत्र न्ह्यब्बयादीसे गुणस्तर व कारोवार सम्वन्धी मापदण्ड हे जक तःधगु मखु कयादीसे प्रभावकारी कार्यान्वयन पक्ष महत्वपूर्ण जुइ धका ब्यवसायीपिनिगु ध्यानाकर्षण यानादीगु खः ।
उगु ज्याझ्वलय् महासंघया अध्यक्ष मोहन कुमार सुनार, वरिष्ठ उपाध्यक्ष माणिकरत्न शाक्य व राष्ट्रिय उपभोक्ता मञ्चया अध्यक्ष प्रेमलाल महर्जन व महासंघया कानूनी सल्लाहकार शिव रिजालपिन्स न थःथःगु नुँगः खँ तयादीगु खः ।
महासचिव धर्मशुन्दर बज्राचार्य न्ह्याकादीगु उगु ज्याझ्वलय् महासंघया निवर्तमान अध्यक्ष मणिरत्न शाक्य, उपाध्यक्षपिं दियसरत्न शाक्य, मोहनकाजी शाक्य, शिव सर्राफ, कोषध्यक्ष महेन्द्ररत्न
शाक्य, सचिव किरणभाई बज्राचार्य व सुदिप श्रेष्ठ लगायत पिनिगु न ब्बति दुगु खः ।
