लुकाकु इंग्लीश फुटबल क्लब चेल्सी लिहाँवल
गुंलाथ्व पंचमी ११४१,साउन २९ शुक्रवाः
बेल्जीयन कासामि रोमेलु लुकाकु इंग्लीश फुटबल क्लब चेल्सी लिहाँवःगु दु ।
थ्वयान्ह्यः इटालीया इन्टर मिलानय् दूम्ह लुकाकुं चेल्सीलिसे किर्तीमानी ध्यबाया सम्झौता याना पुलांगु हे क्लब दुहाँवःगु खः । लुकाकुया नितिं चेल्सीं इन्टर मिलानयात ९७ गू फुति ५ गू मिलियन पाउण्ड स्टर्लीङ खर्च याःगु दु ।
सन् २०१४ य् चेल्सी त्वःता एभर्टन वंबलय् लुकाकुया भाः २८गू मिलियन पाउण्ड दूगु खः । थ्वयान्ह्यः एभर्टन व म्यान्चेस्टर युनाईटेडं तकं म्हितेधुंकुम्ह लुकाकु बेल्जीयमया राष्ट्रिय टोलीपाखें सर्वाधिक गोल याम्ह कासमि खः ।
उख इंग्लीश कासामि ह्यारी केन म्यान्चेस्टर सिटी वनिगु संभावना अप्वःगु दु । टोटनह्याम हट्सपरया कासामि केनया नितिं सच्छि व २७गू मिलियन पाउण्ड खर्च यायेत म्यान्चेस्टर सिटी तयार जूगु सीदूगु दु ।
थ्व सम्झौता जूसा केन इंग्लीश प्रिमियर लिगया आःतक्कया हे दक्वःलय् थिकेम्ह कासामि जुइ ।
Categorized in कासा
