लुति अजिमाया सतः पुनर्निर्माण
लहनान्युज | चिल्लागा तृतिया ११४०
येँ महानगरपालिकाया मेयर विद्यासुन्दर शाक्यं येँ कामपा १७ वडास्थित लुति अजिमा देगः लागाय् च्वंगु ताः हाकःगु सतःया शिलान्यास यानादिगु दु ।
लुतिइ जूगु उगू ज्याझ्वलय् मेयर शाक्य नाप उपमेयर हरिप्रभा खड्गी श्रेष्ठं सतःया जग स्वनादीगु खः । द्यःपाःलाः गुथि मातहत इन्द्रायणी परिसर गुरुयोजना निर्माण सहयोग तथा अनुगमन उपसमितिया ग्वसालय् उगु ज्याझ्वः जूगु खः ।
ज्याझ्वलय् न्ववासें सम्पदा न्ह्यागु हे वडाय् च्वंगु जूसां व सकस्यां मंकाः सम्पत्ति जुइ, उकिं अज्याःगु मंकाः सम्पत्ति पुनर्निर्माण यायेगु ज्याय् मनपा सक्रिय जुयाच्वंगु दु धयादिल । मनपां यानाच्वंगु ज्यायात ग्वाहालि याःथाय् ज्या सम्पन्न जूगु व विरोध याइथाय् ज्या पनाच्वंगु खँ कँसें मेयर शाक्यं धयादिल, ‘थःपिंसं ज्या छुं मयासे केवल महानगरपालिकां यानाच्वंगु ज्यायात आलोचना जक याइपिं छथ्वः सम्पदाप्रेमित नं थौंकन्हय् सक्रिय जुयाच्वंगु दु । वय्कःपिंत विरोध यायेगु त्वःताः थःगु थासं छु यायेफु व यानाः क्यनेत इनाप याना ।’
लिसें मेयर शाक्यं सम्पदा निर्माण यायेगु ज्याय् मनपाय् मेयर, उपमेयर लिसें सकलें वडाध्यक्षत छप्पँ दुगु कारणं थुमित विभाजित यानाः म्हितेगु बिचाः सुनानं मयाःसां जिउ धकाः नं ख्याच्वः बियादिल ।
बागमती प्रदेशया सांसद बसन्त मानन्धरं बिष्णुमति खुसि सफा यायेगु खःसा फोहोरयात तप्यंक खुसिइ वांछ्वयेगु ज्या दिकेमाः धासें थुखेपाखे जनचेतना ब्वलने मगाःनिगु खँ कनादिल ।
उपमेयर हरिप्रभा खड्गी श्रेष्ठं लुति अजिमाया लागाय् थ्व फल्चा जीर्ण जूगुलिं अन अन्तिम संस्कारया लागिं वइपिं मनूतय्त तसकं सास्ति जुयाच्वंगु खँ कँसें थुकिं यानाः आः सहज जुइगु बिचाः तयादिल ।
कामपा कार्यपालिकाया दुजः प्रेम पुजारीया सभापतित्वय् जूगु उगु ज्याझ्वलय् १७ वडाया वडा अध्यक्ष नविन मानन्धर, छत्रपाटी निःशुल्क चिकित्सालय (अस्पताल) या उपाध्यक्ष कुमार मानन्धर आदिपिंसं नं न्ववानादीगु खः ।
१ करोड १७ लाख ४ हजार १७९ तकाया लागत खर्चं दयेकेत्यंगु थ्व सतः २०७७ सालया मंसिरं सिधयेकेगु ताः तयातःगु दु ।
