लोकंह्वाःम्ह संगीतकार खय्याम मन्त
हिन्दी सिनेमाया चर्चित लय्चिनामि खय्याम वंगु सोमवाः चान्हय् मन्त । वय्कः ९२दँया बैंशय् मदुगु खः ।
 
हिन्दी संकिपाया आपालं लोकंह्वाःगु म्येय् खय्यामं लय् तयादीगु दु । ‘उमराव जान’, ‘बाजार’, ‘खानदान’, ‘कभी कभी’ आदि संकिपाया नितिं बियादीगु संगीतया नितिं तसकं लोकंह्वाः । 
 
खय्यामया पूवंगु नां ‘जहूर खय्याम हाशमी’ खः ।
 
स्वन्हु न्ह्यः स्वँय् संक्रमण जुइधुंकाः वय्कःयात अस्पताल भर्ना जुयादीगु खः । उकी छुं सुधार मजुइवं सोमवाः चान्हय् वय्कः मन्त ।
 
खय्याम सन् १९२७ फरवरी १८ तारिखय् पञ्जाव विभाजित मजूगु इलय् अनया नवांशहर जिल्लाया राहोनय् बूगु खः । ब्वनेगुली खास हे मन मदुम्ह खय्याम संगीतह्यःमि खः । थ्व हे हुनिं वय्कः दिल्लीइ बिस्युं वल । बिस्युं वःसां नं छेँजःपिन्सं हाकनं वय्कःयात पढाइ पूवंकेगु नितिं छेँय् लित यंकल । तर छेँय् वःसा नं ब्वनेगुली मखु, संगीतय् हे मन वनाच्वन ।
 
छेँजःपिंलिसे खँ मिले मजुल । उकिया छुं ई लिपा संगीत सयेकेत खय्याम लाहोर वन । अन वय्कलं बाबा चिश्तीलिसे संगीतया ज्ञान कयादिल । लिपा हाकनं दिल्लीइ लिहांवल व पण्डित अमरनाथया शिष्य जुयादिल ।
Categorized in मनोरन्जन