लोकगायक रत्न बेहोशीया जहान चन्द्रमाया मन्त
ने. सं. ११३८ चिल्लाथ्व पारु । २०७४ फाल्गुण ४ । फेब्रुअरी १६, २०१८
नेपालभाषा साँगितिक ख्यलय् विशिष्ट योगदान यानादिम्ह लोक गायक एवं बरिष्ठ संगीतकार रत्न बेहोशीया ६५ दँया जहान चन्द्रमाया बज्राचार्यजूया देहावसानं सकल नेपालभाषा संगीतप्रेमीपिनित शोकाकूल यानाब्यूगु दु ।
शुक्रवाः बहनी ८ः१५ बजे देहत्याग यानादिम्ह थम्ह जहानया पशुपति आर्यघाटय् अन्तिम संस्कार जुइगु जानकारी लोक गायक बेहोशीयापाखें वरिष्ठ कलाकार एवं संचारकर्मी सुरज ब्यञ्जनकारं जानकारी बियादिइगु दु ।
क्यान्सर ल्वय्या उपचार यानाच्वनादिम्ह लोकगायक रत्न बेहोशीया जहान भक्तपुर क्यान्सर अस्पतालय् उपचारया झ्वःलय् देहत्याग यानादिइगु खः । स्वर्गीय चन्द्रमाया बज्राचार्यया सुपुत्र आनन्द बज्राचार्य व चेतन बज्राचार्य व भौमचा प्रशंसा बज्राचार्य, म्ह्याय् मुनु बज्राचार्य लिसें छय्पिं अञ्जली, सुमन र आशा बज्राचार्य खः ।
न्हापा थः काय् इलं मत्यवं मदयावंगु इलय् नं दाहसंस्कार तत्काललिपा नेपालभाषा सांगीतिक ज्याझ्वःलय् न्ह्यज्यानादिम्ह लोकगायक बेहोशीजु नापं परिवारजनयात थुगु घटनापाखें वःगु तढंगु दुःख सामना यायेत धैर्यताया कामनालिसें दिवंगत आत्माया चीर शान्तियानितिं कलाकारिता ख्यःनापं संलग्न सकसिनं कामना याःगु दु ।
फोटो एवं समाचार श्रोत ः सुरज ब्यञ्जनकार
Categorized in राष्ट्रिय
