ल्वमंके मफइगु विक्रम दाइया लुमन्ति
मीना बज्राचार्य 
 
स्वंगू दशकंनिसें निरन्तरकथं पत्रकारिताख्यलय् सक्रिय जुयाच्वनादीम्ह दाजु विक्रम शाक्यया असामयिक निधनया खँ न्यनाबलय् पत्याः याय् थाकुल जितः । दाजुं थुलि याकनं त्वःता वनीगु म्हगसय् मखना । दैवया लीला सु गबलय् गथे जुयाः थ्व अनित्य संसारं सदांया नितिं त्वःता वनी धइगु सुयागु ल्हातय् मदु । विक्रमदाइयात लुमंकाबलय् जिगु नुगलय् बुयावःगु छुं छुं खँ थन छसिकथं न्ह्यब्वय्गु कुतः याना ।
 
 
१) नापं ज्याझ्वः न्ह्याकागु 
 
विक्रम दाइयात म्हस्यूगु नीन्यादँ नीखुदँं हे मयात जुइमाः । उगु इलय् नेपालभाषाया थीथी गतिविधि, थीथी ज्याझ्वः जुयाच्वनिबलय् वय्कःलिसे नापलाना च्वनि । जि नं छम्ह भाषाह्यःमि व सञ्चारकःमि जूगुलिं नं इलय्ब्यलय् दाइयात नाप लानाच्वनिगु । थ्व हे झ्वलय् नीस्वदँ नीप्यदँ न्ह्यः हे जुइमाः, यलया मंगलबजारय् ख्यालः धेंधेंबल्ला कासा जूगु खः । उगु ज्याझ्वः न्ह्याकेत विक्रम दाइ व जितः भाला बिल । निम्हेसिनं जानाः ज्याझ्वलय् उद्घोषण याना । जिमिगु प्रस्तुति खनाः सकसिनं च्वछाःगु खः । ख्यालः कासाय् विक्रम दाइ व जिं मिलय् जुयाः ज्याझ्वः न्ह्याकागु बांलागुलिं जिमित हाकनं यल महोत्सवया साँस्कृतिक ज्याझ्वलय् उद्घोषण याय्गु भाला नं बिल । यलया अशोक हलय् जूगु यल महोत्सवया ज्याझ्वः नं न्ह्याइपुक्क न्ह्याका । उगु इलय् विक्रम दाइ व जिं नापं ज्याझ्वः न्ह्याकेगु दर्शक व श्रोतातय्सं अतिकं यय्कू । उकिं कलश मिडियाया भिन्तुना सच्छि एफ.एम.य् नेपालभाषाया छगू ज्याझ्वः नं जिपिं निम्हं जानाः हे न्ह्याकागु खः । 
 
 
२) जुगःचःह्रेबलय् स्वयम्भूइ 
 
यलय् जूगु ख्यालः कासा क्वचाःबलय् अथे हे बहनी १२ताः धइथें जुइधुंकल । व दिं जुगःचःह्रेया दिं जूगुलिं दक्वः पासापिं मुनाः स्वयम्भुूइ वनेगु ग्वसाः ग्वल । छाय्धाःसा उकुन्हू स्वयम्भूया किचः आकाशय् खनेदइगु धकाः न्यना तयागु । गबलें मखनागु लू स्वय्त जिपिं आय्बुल । सकलें वनाः । अन तसकं हुलमुल । च्वनेथाय् तक्कं मदु । किचः मवःनि, उकिं जिपिं ग्वारामरी नि नःवनेगु धकाः सकलें तँ नं कुहाँ वयाः । चान्हय्या इलय् चाय्कातःगु छगू जक ग्वारामरी पसलय् नं तसकं हुल । जिमिगु पाः मवःनिगुलिं अन हे च्वनाः विक्रम दाइ नं गफ मुइकाः सकसितं न्हिइकाच्वन । उबलय् हे छम्ह ल्यासेम्ह मिसा घः ब्यकुंच्यानाः लः कया वल । वइत स्वयाः विक्रम दाइ नं धाल, “का स्व ! वं लखय् गपाय्ग्वःगु घः तयाहःगु ।” थुलि धाय्वं जिपिं जक मखु लः कयावःम्ह मिसा तकं घः हे कुतुंवनिथें च्वंक न्हिला वन । वय्कःया हरेक खँय् सेन्स अफ ह्यूमर दु । खँ कनेगुलिइ आकर्षण दु । उकिसनं न्ह्याथें जाःगु खँ नं कने न्ह्यः “छं मस्यु” धकाः न्हिला न्हिलाः कनेसः ।
 
 
३) यलया दँ मनू 
 
ने.सं. ११२०य् नेपालभाषा मंका खलः, यलया ग्वसालय् दकलय् न्हापांखुसी यलया दँ मनू (एभचकयल या तजभ थभबच) सिरपाः घोषणा याय्गु ज्याझ्वः न्ह्याकेत नं विक्रम दाइ व जितः हे भाला बिल । विक्रम दाइ नं जितः स्क्रिप्ट तयार यानाति धकाः भाला क्वबिकल । अले लिपा छुं मथूसा छुं न्यनेमाःसा जितः धाः धयादिल । जिं दाइयागु उजंकथं स्क्रिप्ट तयार याना फोन याना । तर वय्कःयात नापमलाः । तःक्वःमछि फोन यानां नं फोन ल्ह्वनामदी । कन्हय् कुन्हु ज्याझ्वः जुइधुंकल । छन्हु न्ह्यःतक विक्रम दाइयागु अत्तोपत्तो मदुगुलिं जिं पासापिन्त न्यनेकने याना । थ्व हे झ्वलय् छम्ह पासां जितः धाल, “का छं छुं नं खँ मस्यू नि ला अझं ? छन्त नेपालभाषा मंकाः खलकं पौ ब्यू मवःनि ला ?” वयागु खँ न्यनाः जि वाताँ जुल । घौछिति लिपा हे पौ जिगु ल्हातय् लात । दच्छिया दुने दकलय् अप्वः नेपालभाषाया नितिं ज्या यानाच्वम्ह यलया छम्ह ल्याय्म्हयात बीगु एभचकयल या तजभ थभबच या सम्मान जितः हे लःल्हाइगु जुयाच्वन । उबलय् जिं सञ्चारख्यःया स्वंगू हे विधा (छापा)पत्रपत्रिकाय् लेख रचना च्वय्गु, (रेडियो)एफ.एमय् ज्याझ्वः न्ह्याकेगु व (टिभि)नेपाल टेलिभिजनं प्रसारण जुइगु “हसना” ज्याझ्वः न्ह्याकाच्वनागु ई खःसा स्वनिगः साहित्य पालाया नायःलिसें थीथी संघसंस्थाय् आबद्ध जुयाः ज्या यानाच्वनागु खः । उकिं जितः बीत्यंगु थुगु सम्मानयात विक्रम दाइ नं ‘सरप्राइज’ बीगु धकाः सुयातं धाय्मते धकाः सुचुकातःगु जुयाच्वन । लिपा थुगु ज्याझ्वः विक्रम दाइ याकचां हे न्ह्याकादिल । 
 
 
४) दुर्घटना
 
वि.सं. २०५६ सालया मंसीर ४ गते सञ्चरवाः जिमिगु छेँय् तःधंगु दुर्घटना जुल । जिमि दातिम्ह किजा रबिन्द्र बज्राचार्य पासापिंनाप मलेखुइ पिकनिक वंगु इलय् खुसिइ चुइका यंकल । छवाःतक मालां नं लुइकेमफू । सुनानं लुयावइगु आश हे मकाय्धुंकूसां लुयामवतलय् मालाच्वने धकाः जिद्दी यानाः छवाः लिपाया सञ्चरवाः मंसिर ११ गते जि, विजयरत्न असंबरे (अबलेतक जिमिगु इहिपाः मजूनि) व बिराजकाजी राजोपाध्याय स्वम्ह उखेपाखे मालेत वना । अन थ्यनेवं जिमित सल्यानघाट धाःगु थासय् छम्ह सीम्ह चुइकाहःगु जानकारी बिल । मोबाइल मदुनिगु ई । जिपिं गजुरीतक वयाः प्रहरीयात खबर बिया । अनं लिपा फोन यानाः छेँजः व पासापिन्त खबर याना । अनं ७गू किलोमिटर तापाक्क च्वंगु सल्यानघाटय् वनाः । अन किजाया सीम्ह खनेवं जिं जिगु नुगः चिनां ची मफुत, जि चिल्लाय् दना ख्वःगुलिं जित च्वय्पाखे हल । चिकुलाया ई तुरुन्त ख्युँया वल । उगु थासय् न बिजुली मत दु न त फोन । जि व विराज छेँजःपिं वइगु आसं टर्चलाइट च्याकाः लँ स्वयाः पियाच्वना । विजयरत्न पुलिसतलिसे किजाया सीम्ह थत हय्त खुसी क्वय् वनाच्वन । सुनसान सुं मदु चिचाधंगु पसः छगू जक दु । उगु हे इलय् अन बस छगः दिके हल, तर ख्युँसे च्वनाः छुं खनेमदु । बसं कुहाँ वयाखतं जिगु नां कयाः सतल, “मीना जिपिं थ्यन न्हिं ! धन्दा काय्मते । छिपिं गन दु ?” दकलय् न्हापां थ्वःगु विक्रमदाइया थ्व सलं किजाया सीमह खनेवं थः हे सीम्हथें जुयाच्वंम्ह जितः म्वाःसु तयाः म्वाकूथें जुल । बल्ल जिगु सासः थहाँ वल । हाकनं विक्रम दाइ नं धाल, “मीना मेपिं दक्व बस रिजर्भ यानाः मुना वयाच्वंगु दु । जिपिं निम्हनि बसय् च्वनाः ब्वाँय् वयाछ्वया ।” वय्कःया थ्व सः आःतक जिगु न्हाय्पनय् थ्वयाच्वंगु दु । अजाःगु दुःखया इलय् हःपाः, तीबः व ग्वाहालि यानादीम्ह दाजुयात जिं गथे ल्वमंकेफइ ? उबलय् वय्कलं थःहे केँहेंयात थें बिचाः यानाः मद्दिक्क यानादीगु सेवा व गुण सदां लुमन्ति जुयाः म्वानाच्वनी ।
 
 
५) मचाया नां 
 
जिम्ह जहान विजयरत्न असंबरें नेपाली संकिपा “वीर गणेशमान”या निर्देशक जुयाः ज्या यानाच्वंगु इलय् जिम्ह काय् बूगु जुयाः विक्रम दाइ नं न्ह्याबलें मचायात “गणेशमान” धकाः हायका च्वनी । वयागु नां गणेशमान हे ति धकाः नं धया च्वनिगु । जिमिसं जिमि काय्या नां विशेष धकाः छुना । छक्वः ईलोहंया मचा सिरपाः बीगु ज्याझ्वलय् जिमि काय् ज्वना वनागु । अन थीथी विधाया मस्तय्त सिरपाः बीगु झ्वलय् विशेष सिरपाः धकाः ब्यूबलय् जिम्ह काय्नं वयात सिरपाः बिइत्यंगु धकाः च्वन । विशेष सिरपाः धकाः ब्यूगु सिरपाः मेपिन्सं हे कयाः यंकेवं जिगु सिरपाः मेपिन्सं यंकल धकाः ह्वाँय् ह्वाँय् ख्वल । मचा ख्वःगुलिं नरेशवीर शाक्य दाजुं मचा ख्वःगु कारण न्यनादिल । मचाया नां विशेष जूगुलिं वयागु सिरपाः मेपिन्सं यंकल धकाः ख्वःगु खँ कनेवं सकलें न्हिल । नरेशवीर दाइ नं मचा ख्वःगुलिं मचायात नं सिरपाःया छगू प्याकेट हे बिल । मचा लय्ताल । थ्व खनाः विक्रम दाइ नं जिमित हाय्कल, “ओहो ! गपाय्सकं कतिलागु नां काय्यात तय्सःगु का । गणेशमानयात विशेष धकाः नां तःगु थथे कतिलाकेत धकाः खनी सा ।” 
थुकथं थीथीकथंया लुमन्ति त्वःता वंम्ह विक्रम शाक्य आपासित ग्वाहालि याना जुइम्ह खः । अजाःम्ह दाजु आकाझाकां मदुगु खँ वःबलय् दकलय् न्हापां ला पत्याः हे याय् थाकुल । विक्रम दाइयागु गुणयात लुमंकाः वय्कःया आत्मा सुखावति भूवनय् वास लाय्मा धकाः कामना याना ।