२०८० चैत्र १६, शुक्रबार

वर्तमान परिवेशय् विभेद स्वीकार्य जुइमखु : प्रधानमन्त्री ओली

लहनान्युज | ने.सं. ११३९ तछलाथ्व पारु (४ जुन, २०१९) मंगलवाः

प्रधानमन्त्री केपी शर्मा ओलीं थःगु नेतृत्वया सरकारं न्याय व समानतालिसेंया समृद्धिया लँपुइ देशयात न्ह्यःने यंकागु धयादीगु दु ।
 
 
थौं जुन ४ कुन्हु दँय्दसं हनीगु जातीय भेदभाव व छुवाछुत उन्मूलन दिवसया भिन्तुना बियादिसें प्रधानमन्त्री ओलीं उगु खँ धयादीगु खः । वय्कलं वर्तमान परिवेशय् विभेद व अन्याःया अवस्था स्वीकार्य मजुइगु नं उगु भिन्तुना सन्देशय् न्ह्यथनातःगु दु ।
 
 
सुखी नेपाःमि, समृद्ध नेपाःया राष्ट्रिय आकांक्षा पूवंकेत थजाःगु फुक्ककथंया कुरीति न्हंकेगु नितिं सरकार कटिबद्ध जूगु नं वय्कःया भिन्तुना सन्देशय् न्ह्यथनातःगु दु ।
 
 
राज्यया हरेक क्षेत्रय् समानता बीत थःपिं न्ह्याबलें न्ह्यज्यानाच्वंगु धयादिसें प्रधानमन्त्री ओलीं दलित समुदाययात शिक्षा, स्वास्थ्य व लजगाःया क्षेत्रय् न्ह्यःने यंकेत तल्लिन जूगु नं न्ह्यथनातःगु दु ।
 
 
भिन्तुना सन्देशय् न्ह्यथनातःगु दु, ‘न्हापा ल्यूने लाकातःपिन्त राज्यया मूलप्रवाहस समाहित याकाच्वना । २१गूगु शताब्दीइ नं सामन्तवादया अवशेषकथं दयाच्वंगु मनू मनू दथुइ याइगु जातीय भेदभाव व थीत्यः मत्यःया दुव्र्यवहारयात कयाः छुं नं कथंया सहिष्णुता क्यनीमखु । समानता, सद्भाव व फुक्कसिगु मानवाधिकार पूर्ण रक्षाया नितिं सरकार दृढ दु ।’
Categorized in राजनीति