वल्र्ड नेवाः अर्गनाइजेसनया न्ह्यसः लिसः कासा जुइगु
बछलागा द्धादशी ११४१, असार २२ मंगलवाः
वल्र्ड नेवाः अर्गनाइजेसन, डब्लुएनओया ग्वसालय् न्ह्यसः लिसः कासा याइगु जूगु दु ।
हलिंन्यंकंया नेवाःतय्गु मंका संस्था, डब्लुएनओं विज्ञप्ति सार्वजनिक यानाः कासा जुइगु विषयलय् जानकारी ब्यूगु खः । हलिं नेवाः न्ह्यसः लिसः कासा ११४१या नामं जुइत्यंगु कासाय् नेपाःलिसें विदेशय् च्वनाच्वंपिं नेवाःनापं नेवाः भाय् सःपिं अले नेवाः भाय्यात मतिना याइपिं न्ह्याम्हेसिनं नं ब्वति काये फइगु धागु दु ।
कोरोना संक्रमणया जोखिमयात मध्यनजर यानाः भर्चुअल प्रविधिया माध्यमं कासा जुइगु धागु दु । नेपाःपाखें ब्वति कायेत द्वछि तका व विदेशय् च्वंपिंत २५तका अमेरिकी डलर पुलेमाः । कासाय् ब्वति कायेत डब्लुएनओया वेब पेजय् वनाः फाराम जायेके फइगु धागु दु ।
वइगु गुंलाथ्व षष्ठि अथेधइगु साउन ३० गतेनिसें न्ह्याइगु न्ह्यसः लिसः कासाय् ब्वति काइपिंसं दिल्लागा सप्तमी, साउन १७ गतेदुने नां दुथ्याकेत इनाप याःगु दु ।
कासाय् न्हापयात ६सः अमेरिकी डलर, लिउयात ४००सः, लियांलिउयात ३००सः अले हःपाःयात सत्या अमेरिकी डलर सिरपाः बीगु धागु दु ।
कासा मू ग्वसाः पुचलय् अमेरिका, क्यानाडा, बेलायत, आयरल्याण्ड, बेल्जियम, इस्टोनिया व न्यूजिल्याण्डपाखें नं प्रतिनिधित्व दु ।
Categorized in राष्ट्रिय
