वातावरण प्रदुषण सचेतनायानितिं वडाया अभियान
राजेश बज्राचार्य | ने. सं. ११३८ पोहेलागा अमाइ (जनवरी १६, २०१७) यँ
जनसमस्याकथं वातावरण प्रदुषण उप्वयाच्वंगु धापूया थी थी पक्षयात बिचाःयाना येँ महाराजगंजस्थित वडा नम्वर ३ या वडाध्यक्ष दिपक के.सीं. छगू अभियान न्ह्याकूगु दुु ।
वडाया ज्याकू लिक्क च्वंगु कान्ति बाल अस्पताल मथ्यंवं लँ या निखेरंच्वंगु पेटीइ गमलासहितया स्वाँ व्यवस्थापन यासें अध्यक्ष के.सीं. “सफा, हराभरा सुन्दर सडकपेटी अभियान”या घोषणा याःगु खः ।
“सफा हरियाली व प्रदुषणमुक्त लकसय् च्वनेगु वडावासीपिनिगु जायज अपेक्षायात वडाया हैसियतकथंं सम्भव दूगु ज्याः पाखें अभियान न्ह्याकाःगुु खः ,” वयेकलं धैदिइ , “न्हापाँगु ब्वय् कथं शान्ग्रिला होटलनिसें न्यूरो अस्पताल क्षेत्रया सडकपेटीइ न्यासः मल्याक गमला व स्वाँम्हाःया व्यवस्थापन यायेगु जुइ, लिपा नीजि क्षेत्रनापं सहकार्य न्ह्याःका वडादनुेया दक्वः सडकपेटीइ थुगु अभियान पलिस्था यायेगु तातुना दु ।”
अभियानकथं वडापाखें बिइगु गमला व स्वाँमा थपु याइम्ह सु जुइ धैगु न्ह्यःसया सवालय् अध्यक्ष के.सी. स्पष्ट जुयादी । वयेकलं शुरुवातयानितिं वडाया हे आह्वानय् प्रगतिशील धारा सुधार समिति वातावरण समूह (पिडिएसएस)नापं सहकार्य याना अभियान न्ह्याकादीगु दु । नमूनाकथं जूगु थुगु शुरुवातनापं थी थी स्थानीय संघसंस्था व वडास्थित व्यवसायिक संस्थापाखेें थःथगु लागाया सडकपेटी बाँलाकेत अभियानय् ग्वाहाली दैगु व अभियान निरन्तर जुइगुलि वयेक विश्वस्त जुयादी ।
“तःतधंगु म्हगसः सिबेंं बरु चिधंगु ज्याः पाखें वडा क्षेत्र न्यंकभनं वडाध्यक्षज्यूया वातावरणमैत्री सडक स्थापनाया सन्देश बिइकेत न्ह्याकूगु व्यवहारिक ज्याझ्वःलय् जिमिसं ग्वाहाली यानागु ख ः।” पिडिएसएस या अध्यक्ष कृष्ण पौडेलं जानकारी बियादिल । वयेकया धापू कथं अभियानयात तजिकेत स्थापना याःगु गमला व स्वाँया निरन्तर संरक्षण व व्यवस्थापनपाखें कमसेकम थःथगु छेँ, पसः व ज्याकूलिक्कया सडकपेटीयात फोहोर मयायेगु, मयाकेगुलिइ वडावासी सचेत जुुइगु लकस ब्वलनी ।
करीब ७लाः न्ह्यः प्रकाशित छगु तथ्यांकं येँं विश्वया प्रदुषित शहरमध्ये ५औं स्थानय् लानाच्वंगु न्ह्यथनातःगु दु । विश्व स्वास्थ्य संगठन नापं मेमेगु सम्बन्धित अध्ययन आधारय् पिथनातःगु उगु तथ्यांक अनुसार हलिंन्यंकया २६९ शहरहरुमध्ये अफ्रिकाया घाना व भारतया फरिदाबादलिपा येँ रत्नपार्कया प्रदुषण मापन ९६.५७ थ्यंगु क्यनातःगु दु ।
नेपाल सरकार वातावरण विभागया अनुसार यँे रत्नपार्कय् २.५ माइक्रोन सिबे चिधंगु हानिकारक कण (पिएम २.५) सिबें उप्वः (१०७ µg³) जुयाच्वंगु क्यनातःगु दु । थीथी कारकमध्ये लँबिस्तार कार्यसुस्तता, मेलम्ची खानेपानी व्यवस्थापननापँ सवारीसाधनया इन्धनपाखें पिलूइगु कुँ आदिपाखें शहरवासीपिं विशेषतः श्वासप्रश्वास व छयंगु सम्बन्धित ल्वचं पिडित जुगु खनेदु ।
Categorized in राष्ट्रिय
