विक्रम छंत निर्वाण लायेमा !
उदेन न्हुसाय्मि
अति दुर्लभ मानव झीगु जुनि
मथुया बरु थ्व व्यर्थ वनी
खः । झीगु थ्व मानव जुनि अतिकं दुर्लभ । तर दुर्लभ धाःसां थुकियात सुलभ यायेगु कुतः झीसं हे यायेमाः । अथे धकाः थ्व अनित्य संसार त्वःता वने म्वाःलीगु धाःसा पक्कां मखु । बरु थ्व दुर्लभ जुनियात व्यर्थ मछ्वयेगु कुतः यायेमाः झीसं । उकिया निंतिं थः व थःगु परिवारयात जक मखु, थः च्वँच्वनागु त्वाः बहाः, समाज व राष्ट्रया निंतिं छुं यायेमाः । यायेगु कुतः यायेमाः ।
पासा विक्रम शाक्यं नं अज्याःगु छुं अवश्य नं याना वंगु दु, गुकिं यानाः थौं वया आपालं शुभ चिन्तकयात थ्व विचाः यायेत बाध्य याना बिल कि पासा विक्रम कालया नियतिया हे शिकार जूगु खः ।
खँ वंगु अनलाथ्व पुन्हि, विहीवाः । सदां थें मेट्रो एफएमया सुथसिया नेपालभाषा ज्याझ्वः सिधयेकथं जिपिं अर्थात पासा सुरेशकुमार श्रेष्ठ, एफएम प्राविधिक पूर्णबहादुर महर्जन (पूर्णदाई), सहकर्मि श्रीकृष्ण व जि राष्ट्रिय सभागृह लिक्कसं लाःगु पसलय् च्या त्वं वना । च्या त्वनाः लिहां वयाखतं निगु नियमित रुटिनकथं जि थः जहानयात अफिस वनेत काः वना । जि एफएमया ज्याकुथिं वनाः छेँय् जक छु थ्यन एफएम न्यनामि पासा रणबहादुर ताम्राकारया फोन वल । मोबाइल ‘साइलेन्ट’य् लानाच्वंगुलिं मसिउल । लिपा ‘साइलेन्ट मोड’ अफ यायेवं ज्यःनां यानाच्वनागु इलय् हाकनं फोन वल ।
ल्वहनेवं । गन, गथे, म्हं फु फुया औपचारिकता पूवनेवं पासा रणबहादुरं न्यन, ‘छता खँ सिल ला ?’ जिं थःगु अनभिज्ञता क्यना । रणबहादुरं धाल, ‘विक्रमयात ज्या दयाः फोन यानागु । व अस्पतालय् धाल । पलखं कायम्हं फोन यानाः बाः मंत धकाः धया हल । छु खः ?’ धकाः न्यन । जिं हाकनं अनभिज्ञता क्यँसें ‘जिं मसिउ’ धया । सिउसा छकः जानकारी कयाः फोन यायेत धाल । जिं हस् धयाः फोन तया बिया ।
तत्काल जिं मेट्रो एफएमया पासा सुरेशयात फोन याना ‘खः’ धाल । छु ? गय् ? गथे धकाः न्यने मालवं । अफिसय् वा दक्वं खँ कने धाल । आःयात जि व श्रीकृष्ण अस्पताल वनेत्यना धाल । फोन तया बिया ।
जहानयात ज्वनाः जि मेट्रो एफएमय् वया । अबलय् तक दुने पासा विक्रम शाक्य मंत धइगु खँ फय् थें न्यना वनेधुंकूगु जुयाच्वन । सकलें पासापिनि दथुइ गाइँगुइँ खँ विक्रमया बारे जक जुयाच्वन । जि एफएमय् थ्यंगु इलय्तक सुरेश व श्र्रीकष्ण अस्पताल वंपिं लिहां मवःनि । इपिं वयेवं न्हिनसिया २ ताः इलय् आर्मी वयाः काः वइ धइगु सुचं विक्रमया कायं बिउगु सिल ।
विक्रम मदये छन्हु न्ह्यः जक विक्रम थम्हं हे फोन यानाः एफएमया छम्ह पासायात अस्पताल भर्ना जूवने त्यनागु जानकारी बिउगु जुयाच्वन । खतुं विक्रम एफएमय् मवःगु करिब २०–२५ न्हु दयेधुंकल । वयात छुं भचा सेखं चाःथें जूगुलिं एफएमय् मवःगु खः । छेँय्् हे आराम यानाच्वंम्ह पासा विक्रमयात लिपांगु इलय् पिसाबया समस्याया कारणं अस्पताल वने त्यनागु जानकारी बिउगु जुयाच्वन ।
न्हापां पाटन अस्पताल वंम्ह विक्रम अन बेड खाली मदु धाःगुलिं वीर अस्पताल वःगु जुयाच्वन । वीर अस्पतालं हे विक्रमं दकलय् लिपा मेट्रो एफएमया सहकर्मि जुजुमानयात ज्या विशेषं फोन याःगु जुयाच्वन । गुगु फोन विक्रमलिसे खँल्हाबल्हा जूगु मेट्रो एफएमया पासापिंमध्ये दकलय् लिपांम्ह खः ।
विक्रम शाक्ययात जिं म्हसिउगु मेट्रो एफएमय् आवद्ध जुइ स्वयां न्ह्यः हे खः । जि नकतिनि पत्रकारिता ख्यलय् दुहां वयागु इलय् वयात म्हसिउगु खः । ‘सन्ध्या टाइम्स’ न्हिपतीइ आवद्ध जूगु इलंनिसें हे विक्रमलिसे सीमदयेक सम्पर्क दुगु जुल । अबलय् विक्रम शाक्य ‘सन्ध्या टाइम्स’ न्हिपौया निंतिं यलया प्रतिनिधि जुयाः ग्वाहालि यानाच्वनादीम्ह खः। यलय् जुइगु आपालं भाषिक, साहित्यिक, सांस्कृतिक, सामािजक, धार्मिक गतिविधिया समाचार संकलन यानाः छ्वया हइगु जक मखु, विज्ञापन नं संकलन यानाः ग्वाहालि याना वयाच्वंगु खः ।
‘सन्ध्या टाइम्स’ न्हिपौपाखें स्वाःगु जिमिगु मित्रता मेट्रो एफएमय् आवद्ध जुयागु इलय् अझ क्वातुया वन । मेट्रो एफएमया स्थापनाकालनिसें आवद्ध जिपिं परीक्षण प्रशारणया इलय् हे साप्ताहिक रुपं नेपालभाषा ज्याझ्वः संचालन यानागु जूगुलिं न्हियान्हिथं हे नाप लायेगु ज्या जुल । एफएम आवद्ध जुयागु शुरुया ई धइगु २०५६ सालया मध्यावधि चुनावया इलय् खः । अबलय् जिमिसं मध्यावधि चुनावया लिच्वः एफएमपाखें प्रशारण यानागु खः । विक्रम यलया प्रतिनिधि जुयाः अनया निर्वाचनया परिणाम छ्वया हइगु खः । एफएमय् वइबलय् धाःसा दक्वं थासय्या परिणाम बारे जानकारी ।
मेट्रो एफएमया शुरुवातया इलय् अर्थात परीक्षणकालय् बहनिसिया ७ निसें ९ ताःईतक निघौ नेपालभाषाया ज्याझ्वः संचालन जुइगु इलय् जिपिं ५ ताः ई न्ह्यः हे असनय् च्वंगु स्टेशनया ज्याकुथिइ थ्यने धुंकी । सकलें च्वनाः न्ह्यइपुक ख्याः यायां ज्याझ्वः निर्माण यायेगु व संचालन यायेगु खः ।
असनं कालिकास्थानय् मेट्रो एफएमया स्टेशन ल्ह्ययेगुया लिसें सुथय् व बहनि नेवाः भाय्या ज्याझ्वः संचालन जुइगु जुइवं जिमिगु सम्पर्क भचा सालुया वन । अथे खःसां सन्ध्या टाइम्सलिसेया विक्रमया सामिप्यता, नेपालभाषाया आन्दोलन, एफएमया हे छुं ज्याझ्वः, नेपालभाषाया साहित्यिक, सांस्कृतिक, सांगीतक वा अज्याःगु मेमेगु ज्याझ्वः नापं यलय् चाःहिउ वनेबलय् विक्रमयात बरोबर नापलाना हे च्वनी ।
येँ महानगरपालिकां संचालन यानाच्वंगु मेट्रो एफएम कालिकास्थानं मनपाया थःगु हे स्वामित्व दुगु राष्ट्रिय सभागृहय् ल्हययेगु ज्या जूगु इलय् हाकनं विक्रमलिसे न्हापा थें हे सतीगु अवसर चूलात । जि सुथसिया सिफ्टय् विक्रम न्ह्निसिया सिफ्टय् उकी न्हियान्हिथं धइथें नाप लाना हे च्वनी ।
धाथें धायेगु खःसा विक्रम शाक्ययात म्हसिउगु इलंनिसें थौंतक गबलें नं वं मेपिं सुयागुं बारे नकारात्मक धारणा तःगु वा मेपिं पासापिंसं नं वयागु बारे लिउने लिउनें खँ ल्हायेगु याः धइगु मसिउ । न्ह्याथाय् वंसां, न्ह्यागु अवस्थाय् नं परिस्थितियात सहज रुपं स्वीकार यानाः न्हिलाः न्हिलाः, खःथें मखु थें च्वं ख्याः यायेगु वयागु बानी । मजिउ, म्हाः, मसः, मेपिंत धा ले ? जि मलाः, यायेमखु, गबलें नं मधाः । जि व सहकर्मि पासा श्रीकृष्ण निम्हं छगू हे ज्याय् पिहां वनेमाल धाःसा विक्रमयात सुथसिया नेपालभाषाया ज्याझ्वः न्ह्याकेत इनाप यायेगु । वया ज्याझ्वः न्ह्याका बी ।
विक्रम शाक्य छम्ह स्पष्ट ज्याझ्वः न्ह्याकामि जक मखु, व छम्ह नेपालभाषाया च्वमि नं खः । सन्ध्या टाइम्स न्हिपती यल देय्, बुंगद्यः, बौद्ध न्ह्यसः लिसः कासाया च्वसुत इलय् व्यलय् पिदं । आपालं भाषिक, सामाजिक, धार्मिक संघसंस्थाय् नं आवद्ध जूगुलिं हे यलया गतिविधि बारे छुं न्यनेकने यायेमाल धाःसा अप्वःथें वयागु हे ग्वाहालि कायेगु । फुसा थम्हं ग्वाहालि याइ मखुसा सम्बन्धित व्यक्तिया नां बियाः ग्वहालि याइ । अझ नेपाल बन्द, आम हड्ताल जुल धाःसा थः हे ‘फिल्ड’ वनाः अनया घटनाया जानकारी नं बी ।
सन्ध्या टाइम्सनिसें कयाः नेपालभाषा टाइम्स व मेट्रो एफएमया प्रमुखनिसें कयाः सकलें सहकर्मि व कर्मचारीनाप न्ह्याबलें न्हिलाः न्हिलाः खँ ल्हायेगु वयागु बानी । तं चा हे चाःसां नं वयागु ख्वालय् अज्याःगु भाव खने दइमखु । शायद वयागु शब्दकोशय् ‘तं’ धइगु हे मदु । एफएमय् लिपांगु इलय् विक्रमं संचालन याना वयाच्वंगु ‘धम्प तछ्या’ न्यनामिपिनिगु दथुइ अतिकं लोकंह्वाःगु ज्याझ्वःमध्ये छगू खः । अथे हे विक्रमं ‘न्यनामि दबू’ व ‘सहलह दबू’या नामं वालय् स्वन्हु ज्याझ्वः न्ह्याका वयाच्वंगु खः । उकीमध्ये सहलह दबूया निंतिं गबलें गबलें जि व श्रीकृष्णयाके नं ग्वाहालि काइ ।
लिपांगु इलय् एफएमय् सुयातं ‘डिस्टर्ब’ मजुइमा धकाः लाइबे्ररीइ च्वनाः थःगु ज्याझ्वः तयार यानाच्वनीम्ह व लिसे आपालं ख्याःनी यानाः खँ ल्हाल्हां थःगु ई छ्याना च्वनेगु । तर वंगु करिब नीन्यान्हु, नीखुन्हु न्ह्यः वयात सेखं चाया च्वंगु धइगु जानकारी वयेवं पासा सुरेशं सेखं पूर्ण रुपं क्वमलायेकं एफएमय् मवयेत धाःगु जुयाच्वन । थुकिं यानाः वंगु असोज १ गते मेट्रो एफएमया २१ क्वःगु वार्षिकोत्सवय् वयागु उपस्थिति मदुगु जुल ।
सेखं चायाः एफएमय् मवःम्ह विक्रमया बारे इलय् व्यलय् प्राविधिक पूर्ण दाईनाप खँ जुइगु । मवः धाइगु । वयागु ज्याझ्वलय् म्येँ जक हायेका तइगु । थथे जुइबलय् शायद कन्हय्निसें वइ धइगु मती जुइगु । तर वइमखु । शायद वया सेखं क्वमलाःनि जुइ धइगु तायेका च्वनेगु । थ्व हे दथुइ अस्पताल भर्ना जूवने त्यनागु खः न्यनेवं छझाः थारान्हूगु खः । पिसाबया समस्या धइगु न्यनेवं मन शान्त जुल । तर थ्व शान्त मन छन्हु हे सुम्क च्वने मफुत आकाझाकां सुथय् विक्रम मदुगु खँ न्यने माल ।
थौं पासा विक्रम मदुगु खँ न्यनाः येँ मनपाय् वयात म्हसिउपिं जक मखु, मेट्रो एफएमया सहकर्मि, एफएम न्यनामिपिं, गबलें नं वनाप प्रत्यक्ष नापमलाःपिं व सः न्यनाच्वंपिं सकलें सकलें भाव विह्वल जुयाच्वंगु दु । शायद थ्व विक्रमया मनय् पाप मदुगु, वयागु स्वच्छ, निश्चल, मनया लिच्वः खः।
अथे जुयाः दुर्लभ मानव झीगु थ्व जुनि, यक्वसिया मथुयाः व्यर्थ वंसां विक्रमया जीवन गबलें व्यर्थ मवं । वं थःके दुगु ज्ञान, गुणया खँ मेट्रो एफएमया माध्यमं सकसितं कनाः वन । शत्रु मखु असल मित्र कमे यानाः वन ।
अन्त्यय् पासा विक्रम छंत श्रद्धा सुमन वापत छंत थुलि हे शब्द श्रद्धाञ्जली बियाच्वना । छंत सुगति लायेमा । निर्वाण लायेमा ।
