विदेशं नेपालय् तप्यंक्क लगानी यायेत अपुल
कलछलागाः चर्तुर्थी ११४१, जेठ २६ गते बुधबाः
नेपाल राष्ट्र बैंकं विदेशं नेपालय् तप्यंक्क लगानी यायेत अःपुइगु कथं व्यवस्था याःगु दु ।
राष्ट्र बैंकं म्हिगः विदेशी लगानी व विदेशी ऋण व्यवस्थापन विनियमावली–२०७८ जारी यानाः तप्यंक्क लगानी याइबलय् राष्ट्र बैंकया स्वीकृति कायेम्वाःगु न्हूगु व्यवस्था हःगु खः ।
विदेशी लगानीकर्तातय्सं विदेशी लगानी स्वीकृति यायेगु निकायपाखें विदेशी लगानीया नितिं स्वीकृति चूलाकेवं विदेशी मुद्रा नेपाः छ्वयाहये दइगु अले दुकाये दइगु यानाः विनियमावली दयेकूगु दु ।
तर, विदेशी लगानी स्वीकृत जुइवं विदेशी मुद्रा दुकाये न्ह्यः अले पितछ्वये न्ह्यः अनुसूची–२ या ढाँचाया एकाईलय् लिखित जानकारी बीमाःगु व्यवस्था याःगु दु । अथेहे राष्ट्र बैंकं विदेशी लगानी व कमे याःगु ध्यबा लित यंकेत विदेशी
मुद्राया सटहीलय् न छ्वासुकूगु दु ।
Categorized in राष्ट्रिय
